Isa. 13 - Bhaibheri Rakachena muChindau

Mwari Unozoorora Bhabhuroni

¹ Izwi guru ngendaa yeBhabhuroni raakaona Isaya mukororo waAmozi.

² Emesai mujeki padera pomutunhu usina chiro, daidzirai kwevari, koperai ngenyara kuti vapotere kumisiwo yevakuru.

³ Inini pachangu ndapanga vakacheneswa vangu, ndadaidza ngwazi dzangu dzendinodada ndidzo kuti dziunzidzire ngendaa yokutseneka kwangu.

⁴ Purutanai, bope rechiunga riri pamitunhu, rakadai ngerevanhu vazhinji! Purutanai bope renyongano youmambo hwemadzinza akaungana pamwepo! Mambo Mwari wehondo unounganidza hondo yokurwa.

⁵ Vanobva kunyika iri kuretu, kubva kumagumo ematenga, Mambo Mwari nezvokurwa ndizvo zvoushungu hwake, kuparadza nyika yeshe.

⁶ Chemai, ngokuti zuva raMambo Mwari raapasinde; rinozouya kudai ngokuparadzwa kunobva kunoUwo Unesimba-reshe.

⁷ Ndizvo nyara dzeshe dzinozotama simba, nomwoyo weshe womunhu unozonyunguruka.

⁸ Navo vanozohuta, kurumiwa nokugomera kunozovabata; vanozorumiwa kudai ngomukadzi unobereka. Vanozoringirana vechishamiswa umwe noumweni; hope dzavo dzinozodai ngemirazvu yomuriro.

⁹ Ringira, zuva raMambo Mwari rinouya, rinazvo zveshe kushata, ushungu hunotyisa, kuita kuti nyika iparadzwe, nokuparadza vashaishi vayo kubva mukati mwayo.

¹⁰ Ngokuti nyeredzi dzomudenga nezviunga zvadzo adzizojeki; zuva rinozosvipiswa mukubuda mwaro, nomwedzi auzobudisi kujeka kwawo.

¹¹ Ndinozoorora nyika ngokushata kwayo, nevashaishi ngokushata kwavo; neni ndinozopedza kudzida kwevanodzikudza, nokuisa pashi kudada kwevanotyisa.

¹² Ndinozoita kuti munhu apinde kutsonga kunomukore wakaera, munhu kupinda mukore weOfiri.

¹³ Ndizvo ndinozoita kuti matenga ahute, nenyika inozozungunyiswa kubva pandau yayo, ngoushungu hwaMambo Mwari wehondo, muzuva roushungu hwake hunotyisa.

¹⁴ Kudai ngeshoma inorumbirirwa, nokuti kudai ngemakwai asina unoaunganidza, veshe vanozohwirira kuvanhu vavo, veshe vanozotizira kunyika dzavo.

¹⁵ Kunyazwi ndiani unooneka unozobaiwa; kunyazwi ndiani unobatwa unozowa ngeshoti.

¹⁶ Vana vavo vanozopwanyiwa kuitwa zvigurwa pamberi pemadziso avo; mhatso dzavo dzinozochakatwa, nevakadzi vavo vanozobhinywa.

¹⁷ Ringira, ndinozomusa vaMedhe kuvarwisa, avo vasikapinimidzi ngesirivha nokudakarira mukore.

¹⁸ Misee yavo inozofura majaha; avazoitiri nyasha vanoberekwa; madziso avo aazokunguriri vana.

¹⁹ NeBhabhuroni, uthende hwoumambo, unaku nokudada zvevaKharadhea, rinozodai ngeSodhoma neGomora apo Mwari paakaparadza.

²⁰ Arizotongogarwi, nokuti kugarwa ngemibarirwana yeshe; muArabhia aazodzimiki tende rakepo; vaushi avazoiti kuti zvifuyo zvavo zviatepo pashi.

²¹ Asi mhuka dzomushango dzinozoatapo pashi, nemhatso dzavo dzinozozara ngezvisikwa zvinorira; apo mhowani dzinozogarapo, mbudzi dzomushango dzinozotomukapo.

²² Mapere anozorira mumapako aBhabhuroni, nemakava mungome dzawo dzakanaka; nguva yaro yaa pasinde, nemazuva aro anozofupiswa.