Isa. 12 - Bhaibheri Rakachena muChindau

Ngoma yoKubonga

¹ Pairo zuva unozoti, “A, Mambo Mwari, ndinozokubonga, ngokuti kunyazwi waiya wakanditsenekera, kutseneka kwako kwakapera, newe ukandiembedzera.

² Ngegwinyiso, Mwari ruponeso rwangu; ndinozogonda, andizotyi, ngokuti Mambo Mwari, Mwari isimba rangu, nokugwinya kwangu; naye waita ruponeso rwangu.”

³ Ngokudakara munozochera mvura kubva kuzvinyuka zvoruponeso.

⁴ Nemwi munozoti ngeiro zuva, “Bongai Mambo Mwari, daidzai zina rake, teketesai zviito zvake pakati pemadzinza, ronzai kuti zina rake rinokudzwa.

⁵ Embai kukudza Mambo Mwari, ngokuti waita zvakanakisisa; izvi zviziikanwe munyika mweshe.

⁶ Daidzirai nokuemba ngokudakara, imwimwi munogara muZioni, ngokuti Wakachena waIsuraeri mukuru pakati penyu.”