Isa. 11 - Bhaibheri Rakachena muChindau

Umambo Hwakanyarara

¹ Nhuu inozobuda kubva paguri raJesi, nenhai inozokura kubva kunzinde dzake.

² Mweya waMambo Mwari unozogara padera pake, mweya woungwaru nokuzwisisa, mweya wokupanga nesimba, mweya wokuzia nowokutya Mambo Mwari.

³ Kudakara kwake kuri mukutya Mambo Mwari. Aazotongi ngokuona kwemadziso ake, nokuti kugura ngokuzwa kwenzee dzake.

⁴ Asi ngokururama unozotonga varombo, nokutongera vakapfaa venyika ngokuedzanisa; unozoponda nyika ngendonga yomuromo wake, ngefemero remiromo yake unozouraya vakashata.

⁵ Kururama kunozoita bhande rechiunu chake, nokugondeka kunozoita bhande romuzvizva zvake.

⁶ Gava rinozogara nekakwai, nekhamba rinozoata pashi nekambudzi; konyana nemhondoro itsva nen'ombe yakakora zvinozogara pamwepo; nomwana mudoko unozozviusha.

⁷ N'ombe nebere zvinozofura, vana vazvo vanozoata pashi pamwepo; mhondoro inozofura mwenje kudai ngekabi.

⁸ Noruchiya runozotamba padera pomurindi wemhakure, nomwana warumurwa unozoisa nyara yake padera pebako rerovambira.

⁹ Azvizoremadzi nokuti kuparadza pamutunhu wangu weshe wakachena; ngokuti nyika inozozara ngokuzia Mambo Mwari, kudai ngemvura inofukidza ruandhle.

Vanhu Vakabatwa Vanozopetuka

¹⁰ Ngeiro zuva runzinde rwaJesi runozoema kuita mujeki wevanhu; madzinza anozomutsvaka, nendau yougaro hwake inozozara ngouthende.

¹¹ Ngeiro zuva Mambo Mwari unozotambanudza nyara yakezve kwechipiri kutora avo vakasara vevanhu vake, kubva Asiria, Egipite, Phathrosi, Khushi, Eramu, Shina, Hamathi nezviwi zvoruandhle.

¹² Unozomirudzira marudzi mujeki, naye unozoshonganisa vakarashwa vaIsuraeri, nokuunganidza pamwepo vakaparadzirwa vaJudha kubva kumagumo marongomuna enyika.

¹³ Godo raEfuremu rinozopera, ugaa hwaJudha hunozoparadzwa; Efuremu aachazoitiri Judha godo, naJudha aachazotambudzi Efuremu.

¹⁴ Asi vanozojatira padera pevaFiristia ngokumabirirazuva; pamwepo vanozovachakata vanhu vokumabvazuva. Vanozotambanudza nyara yavo padera peEdhomu neMoabhi, nevanhu veAmoni vanozovapurutana.

¹⁵ NaMambo Mwari unozoparadza yaamho rurumi rworuandhle rweEgipite; naye unozozungunyisa nyara yake padera porwizi nemhepo yake inopisha; unozoparadza kuita mironga minomwe, nokuita kuti vanhu vaambuke vasikatsiki mvura;

¹⁶ ndizvo rinozoapo pato guru rinobva Asiria revakasara vevanhu vake, kudai ngezveraiyapo kuvaIsuraeri apo pevakakwira kubva munyika yeEgipite.