Isa. 10 - Bhaibheri Rakachena muChindau

¹ A, imwimwi munoita mitemo isina kururama, avo vanonyora zviemeso zvinotsikirira,

² kupaukisa parutii vatami kubva mukutonga kwakanaka, nokudusa zvakarurama zvevarombo vevanhu vangu, kuti shirikadzi dziite dzachakatwa dzavo, vechibira nherera.

³ Munozoitenyi ngezuva rokuororwa, mukati mwokuparadzwa kunozobva kuretu? Munozotizira kunaani koodetserwa? Munozosiya pari upfumi hwenyu?

⁴ Apana chiro chinosara asi vanozokotama pashi pakati pemabhanditi, nokuti kuwira pashi pakati pevaurawa. Ngeizvi zveshe ushungu hwake ahuzi kupetuka, asi nyara yake ichakatambanudzwa nazvinopano.

Mutongi weAsiria Unoitwa Kudai ngeNdonga yaMwari

⁵ A Asiria, ndonga youshungu hwangu nenduku iri munyara mwavo ushungu hwangu.

⁶ Ndinomutuma koorwisa dzinza risikadi Mwari nokuvanhu voushungu hwangu ndinomupanga, kutora zvinochakatwa nokutora zvakabvukwa nokuvatsika tsika pashi kudai ngematope omumapato.

⁷ Asi izvi andizvopi zvaaipinimidza kuita kudaro, nokuti kuwa nazvo mumwoyo wake; asi kuripo mumwoyo mwake kuda kuuraya nokugura madzinza mazhinji.

⁸ Ngokuti unoti, “Nduna huru dzangu dzehondo dzeshe adzisiri madzimambo here?

⁹ Kharino arizi kudai ngeKharkhemishi here? Hamathi arizi kudai ngeAriphadhi here? Samaria arizi kudai ngeDhamasekusi here?

¹⁰ Kudai ngenyara yangu yakagumira umambo hwemiedzaniso yokudira, iyo miedzaniso yayo yakatsetswa yaiya yakakura kupinda iyo yeJerusarema neyeSamaria,

¹¹ andizoiti here kuneJerusarema nemiedzaniso yaro yokudira kudai ngezvendakaita kuSamaria nemiedzaniso yaro yokudira?”

¹² Naapo Mambo Mwari apedza mushando wake weshe padera poMutunhu weZioni nepadera peJerusarema, unoti, “Ndinozojezisa zvinobva mumwoyo unodzikudza wamambo weAsiria, nemanyau okudzikudza mumadziso ake.

¹³ Ngokuti unoti, ‘Ngesimba renyara yangu ndakazviita, zvengoungwaru hwangu ngokuti ndinokuzwisisa; neni ndakadusa migano yevanhu, ndakabvuka upfumi hwavo; kudai ngomukono ndakadzasa pashi vanhu vanogara pamadendemaro.

¹⁴ Nyara yangu yakaona upfumi hwevanhu, kudai ngechisaki; nokudai ngounounganidza mazanda akasiiwa, ndizvo ndakaunganidzazve nyika yeshe; apana naumwe waizungunyisa phaphiro, nokuti waishama muromo, nokuti kurira.’ ”

¹⁵ Demo rinoganzira unotema ndiro here nokuti saho inozodzikudza kupinda unoihambisa here? Kudai ngendonga ingazungunyisa avo vanoimirudza, nokuti mudondoro unodzimirudza ausiri muti!

¹⁶ Ndizvo Mambo Mwari, Mambo Mwari wehondo unozotumira nhenda inoondesa pakati pevakafema vake vehondo; nepashi pouthende hwake unozobasa kupisha kwakadai ngokwomuriro.

¹⁷ Kujeka kwaIsuraeri kunozoita muriro, noWakachena wake unozoita murazvu; unozobaka nokupedza minzwa nemakato ake ngezuva rimwe.

¹⁸ Uthende hwegwasha rake nohwomunda wake hunobara zvakawanda Mambo Mwari unozopedza, zveshe mweya nomuiri, kudai ngomunhu murwere unoramba echipera muiri.

¹⁹ Nemiti inosara yegwasha rake inozoita mishomani nomwana mudoko ungakona kuinyora pashi.

Vashomani Vanozopetuka kuNyika yavo

²⁰ Ngeiro zuva, vanosara vaIsuraeri, naavo vanopona vemhatso yaJakobe, avachazotseyami padera pouwo wakavaponda; asi vanozotseyama padera paMambo Mwari, Uwo Wakachena waIsuraeri, mugwinyiso.

²¹ Unosara, eya, unosara waJakobe unozohwirira kunaMwari unesimba.

²² Kunyazwi vanhu vako vaIsuraeri vakadai ngejecha roruandhle, asi unosara wavo unozohwirira. Kuparadzwa kwakaemeswa, kunoerera kururama.

²³ Ngokuti Mambo Mwari, Mwari wehondo, unozoita magumo akaperera, kudai ngeakaemeswa.

Mambo Mwari Unozoorora Asiria

²⁴ Ndizvo Mambo Mwari, Mwari wehondo, unoronza izvi, “A vanhu vangu vanogara muZioni, musatyiswa ngevaAsiria apo voomuponda ngendonga, nokumirudza midondoro yavo kwemuri, kudai ngezvakaita vaEgipite.

²⁵ Ngokuti mumukuwo mudodoko yaamho ushungu hwangu huchapera, nokunyangadzwa kwangu kuchatungamirirwa mukuparadzwa kwavo.

²⁶ Mambo Mwari wehondo unozovamirudzira mboma, kudai ngezvaakaponda vaMidhiani pabuwe reOrebhi; unozomirudza ndonga yake padera poruandhle, unozoimirudza kudai ngezvaakaita muEgipite.

²⁷ Ngeiro zuva mutwaro wake unozobviswa kubva papfudzi rako, nejoka rake rinozoparadzwa kubva pamutsipa wako.”

Vapambi Vanorwisa

²⁸ Wauya kuAiathi, wahamba ngemuMigroni; paMikhimashi unongwaririsa mutwaro wake;

²⁹ vadarika mukana wakamanikana, paGebha vakaatapo usiku; Rama rinohuta; Gibhea raSauri ratiza.

³⁰ Boorera, iwewe mwanasikana waGarimu! Purutana, iwewe Raisha! Mupingure, Anathothi!

³¹ Madhimena riri mukutiza; vanogara Gebhimu vanotiza kuti vapone.

³² Nyamashi unoema muNobhi; unozomirudza chibhakera chake kumutunhu wemwanasikana weZioni, chimutunhu cheJerusarema.

³³ Ringira, Mambo Mwari, Mambo Mwari wehondo, unozotema matai ngesimba rinotyisa; vakareba mumuemo vanozotemerwa pashi, vanodzikudza vanozopfaiswa.

³⁴ Unozotemera pashi matenhere egwasha ngesanho, Rebhanoni nemiti yaro inozorigwa ngoUmwe Unesimba.