Isa. 1 - Bhaibheri Rakachena muChindau

¹ Chioniso chaIsaya mukororo waAmozi chaakaona ngendaa yaJudha neJerusarema, mumazuva aUzia, Jothamu, Ahazi naHezekia, madzimambo aJudha.

Mwari Unopangira Vanhu Vake

² Izwai, A matenga, upurutane, A nyika, ngokuti Mambo Mwari waereketa: “Ndakakudza nokurera vana, asi vandimukira.

³ Kabi inozia mune wayo, nembongoro chidziyo chatenzi wayo; asi Isuraeri aazii, vanhu vangu avazwisisi.”

⁴ A, dzinza rokushaisha, vanhu vanoremerwa ngokushata, mubarirwana unoita zvakashata, vana vanoita zvakaora, avo vakasiya Mambo Mwari, avo vakashoora Umwe Wakachena waIsuraeri, vakadziita vapara, vakahwirira sure.

⁵ Ngenyi mwechitsvaka kuchayiwazve? Ngenyi mwechiangira kumukira? Soro reshe rinorwara, nomwoyo weshe unodemera.

⁶ Kubvira pashi petsoka kuguma kusoro, apana chakagwinya mukati mwawo; asi makwengwa, maronda nezvironda zvinobuda ngazi; azvizi kusvinwa, nokuti kusungwa, nokuti kupfaiswa ngemafuta.

⁷ Nyika yenyu yaita matongo, madhorobha enyu apishwa ngomuriro; pamberi penyu vapara vanodya nyika yenyu; yaita matongo, yabvukwa ngavapara.

⁸ Nomukunda weZioni wasara kudai ngomuchacha mumunda wemivhini, kudai ngedumba riri mumunda wemakaka, kudai ngedhorobha ratendenedzwa ngehondo.

⁹ Dai Mambo Mwari wehondo asikazi kutisiira vashomani vakapona, taizodai ngeSodhoma neGomora.

¹⁰ Izwai izwi raMambo Mwari, imwimwi vatongi veSodhoma! Mupurutane kuchironzo chaMwari wedu, imwimwi vanhu veGomora!

¹¹ “Mibairo yenyu mizhinji inodetserenyi kwendiri?” Mambo Mwari unoronza. “Ndaremba ngeminikero yemagondohwe anopishwa, nemafuta emhuka dzakakodzwa; andidakari ngengazi yemikono, nokuti yezvikwai neyemagotokoto.

¹² Apo munouya kuoneka pamberi pangu, ndiani wakakumbira ichi kubva kunyara yenyu? Musachatsikatsika maruwanze angu;

¹³ musachaunza minikero isina shwiro; mutombo unegwema unopishwa unondinyangadza. Andidi kutawa kwomwedzi, maSabatha, kudaidza mishongano, nemishongano yokudira yakashata.

¹⁴ Kutawa kwomwedzi kwenyu nemadhiri enyu akaemeswa mweya wangu unozvinyenya; zvaita mutwaro kwendiri, ndaremba ndizvo.

¹⁵ “Naapo pomunotambanudza nyara dzenyu, ndinozofisha madziso angu kubva kwomuri; kunyazwi mukaita mikumbiro yakawanda, andizopurutani; nyara dzenyu dzakazara ngengazi.

¹⁶ Dzishambidzenyi, mudzichenese pachenyu; rashai kushata kwezviito zvenyu kubva pamberi pemadziso angu; rekai kuita zvakashata.

¹⁷ Dzidzai kuita zvakanaka; tsvakai kutonga kwakanaka, detserai avo vanotambudzwa, rwirayi ndaa dzevasina baba, potai ngendaa yeshirikadzi.

¹⁸ “Uyai zvino, ngatipangane,” unoronza Mambo Mwari. “Kunyazwi zvishaishi zvenyu zvakanyatsvuka, zvinozochena kudai ngechando; kunyazwi zvakanyatsvuka kudai ngejira rakatsvuka, zvinozodai ngemamviri egwai.

¹⁹ Kudai mwechida nokupurutana, munozodya zvakanaka zvenyika;

²⁰ asi kudai mwechiramba nokuita mbengo, munozodyiwa ngeshoti.” Ngokuti muromo waMambo Mwari wakazviereketa.

Dhorobha roKushata

²¹ A, dhorobha raigondeka rakaita hure ngenyi! Iro raizara ngokutonga kwakanaka, kururama kwakagara mukati mwaro, asi zvino vaurayi.

²² Sirivha yenyu yaita marara, vhini renyu rakumanidzwa nemvura.

²³ Vatongi venyu vanoita mbengo nokuita vangani vemambavha. Veshe vanoda bata muromo, vanoteera kuthuswa. Avatongi zvakanaka ndaa dzenherera, nendaa dzeshirikadzi adziuyi pamberi pavo.

²⁴ Ndizvo Mambo Mwari, Mambo Mwari wehondo, uwo Unesimba waIsuraeri, unoti, “A, ndinozodurura ushungu hwangu padera pemagaa angu nokudziunzidzira pamapandu angu.

²⁵ Ndichapetudza nyara yangu kurwa nemwi; ndinozonyungurusa marara enyu, ndichabvisa kweshe kusikasukika kwenyu.

²⁶ Ndichaunzazve vatongi venyu kudai ngokutanga, nemakota enyu kudai ngokuamba. Ngesure munozodaidzwa kuti, ‘Dhorobha rokururama, dhorobha rinongondeka.’ ”

²⁷ Zioni rinozoripirwa ngokutonga kwakanaka, naavo vari mukati mwaro avo vanotenderuka ngokururama.

²⁸ Asi vamukiri nevashaishi vanozoparadzwa pamwepo, naavo vanosiya Mambo Mwari vanozopera.

²⁹ Ngokuti munozotsveruka ngemiokhi yemwakadakara ndiyo, nemwi munozokangaidzwa ngeminda yemwakatsanangura.

³⁰ Ngokuti munozodai ngomuokhi uwo shakani rawo rinofota, nokudai ngomunda usina mvura.

³¹ Wakagwinya unozodai ngemwenje wakaoma, nomushando wake unozodai ngetsatsi; iye nemishando yake zvinozobaka pamwepo, akuna unozozvidzima.