Hos. 9 - Bhaibheri Rakachena muChindau

Hosea Unodaidzira Kuororwa kwaIsuraeri

¹ Usadakara, O Isuraeri! Usadakara kudai ngemadzinza amweni, ngokuti wakaenda koohura kubva kunaMwari wako. Wada muthuso wokuhora pambuwa dzeshe.

² Mbuwa nopokukamura vhini azvizovapi kudya, nevhini idzva rinozovakoreresa.

³ Avazogari vari munyika yaMambo Mwari; asi Efuremu unozohwirira Egipite, vanozodya kudya kusikazi kusukika muAsiria.

⁴ Avazodururi midiro yokumwa vhini kunaMambo Mwari, midiro yavo yevanopira aiyizodakadzi kwaari. Mibairo yakadaro inozodai ngechingwa chevabondi; veshe vanochidya vanozosvipiswa; ngokuti chingwa chavo chokupona kwavo kwega; achizouyi mumhatso mwaMambo Mwari.

⁵ Munozoitenyi ngezuva redhiri rakaemeswa, nezuva redhiri raMambo Mwari?

⁶ Ngokuti, kunyazwi kudai vatiza ngendaa yokuparadzwa, Egipite rinozovaunganidza, Mempfisi rinozovaika. Rukato ruchavatorera zviro zvavo zvinomutengo mukurutu zvesirivha; minzwa inozoapo mumatende avo.

⁷ Mazuva okuororwa aguma, mazuva okuunzidzirwa aguma; Isuraeri unochema, “Muprofeti raabenzi, munhu womweya wapenga!” Ngendaa youwandu hwokushata kwako, kunyenya kwako kwakura.

⁸ Muprofeti murindi waMwari wangu padera paEfuremu, asi murau womuteyi weshiri uri munjira dzake dzeshe, nokunyenya mumhatso yaMwari wake.

⁹ Vakadzisvipisa kakurutu pachavo, kudai ngemazuva eGibhea; unozokarakadza kushata kwavo, unozoorora kushaisha kwavo.

Chishaishi chaIsuraeri noMusharo wacho

¹⁰ Ndakaona Isuraeri akadai ngemavhini mushango. Kudai ngemitanguro yomuonde yenguva yawo yokutanga ndakaona madzibaba enyu. Asi vakaenda kuBhaaripeori, vakadzipira kunechiro chinotsverudza, nokuita zvinonyangadza kudai ngechiro chevaida.

¹¹ Uthende hwaEfuremu hunozombururuka kuenda kure kudai ngeshiri: akuna kubara, akuna unemimba, akuna unoita mimba.

¹² Kunyazwi vanozorera vana vavo, asi ndinozoita kuti vafirwe, kuti pasazosara naumwe. Ihehe kwevari yaamho apo pendinobva kwavari!

¹³ Efuremu wakasimwa pandau inodakarisa, kudai ngezvendakaona Thire, asi Efuremu unozobudisira vana vake kumuurayi.

¹⁴ Vape, O Mambo Mwari, unozopenyi? Vape mimba inopfupfudzika, nemazamo akaoma.

Kutonga kwaMambo Mwari padera paIsuraeri

¹⁵ Kweshe kushata kwavo kwakatangira muGirigari; ndipo pendakavanyenya. Ngendaa yokushata kwezviito zvavo ndinozovadzinga kubva kumhatso yangu. Andichazovadi; veshe vatongi vavo vamukiri.

¹⁶ Efuremu wachayiwa, runzinde rwavo rwaoma, avazobari michero. Kunyazwi vanobereka, ndinozouraya nemichero inodikanwa inobarwa yendani yavo.

Muprofeti Unoereketa ngendaa yaIsuraeri

¹⁷ Ngokuti avazi kupurutana kwaari, Mwari wangu unozovaramba; vanozoita vapepesheki pakati pemadzinza.