Hos. 8 - Bhaibheri Rakachena muChindau

Mambo Mwari Unorambidza vaIsuraeri Kudira Miedzaniso

¹ “Isa gwama pamuromo wako! Umwe wakadai ngegodzi uri padera pemhatso yaMambo Mwari, ngokuti vagura chitenderano changu nokupauka kubva kumupango wangu.

² Isuraeri unochemera kwendiri echiti, ‘Mwari wangu, isusu vaIsuraeri tinokuzia.’

³ Isuraeri wakarasha zvakanaka; gaa rinozomurumbirira.

⁴ “Vakaemesa madzimambo, asi haiwa ngokubudikidza ndini; vakaemesa vatongi, asi andizi kuzia ndizvo. Ngesirivha yavo nomukore wavo vakadziitira miedzaniso yokudira, yokuparadzwa kwavo.

⁵ Konyana rako rinorambwa, O Samaria.Ushungu hwangu hunobaka kurwa navo. Unozoita mukuwo wakadini vasati vaita vasina ndaa?

⁶ Ngokuti unobva muIsuraeri, mushandi wakariumba; andi Mwari akadi. Konyana reSamaria rinozoputswa kuita zvigurwa.

⁷ Ngokuti vanokusha dutu, vanozokukura chipupuri. Zviyo zvakaema azvina mitsonzoti, aizobari zviyo; yanyabara, vapara vanozozvidya.

⁸ Isuraeri wamedzwa; zvino vari pakati pemadzinza vanozodai ngechidziyo chisikadetseri.

⁹ Ngokuti vakwira Asiria, kudai ngembizi inohamba yega; Efuremu wadzitengesa kuzvigango.

¹⁰ Kunyazwi vadzitengesa pakati pemadzinza, zvino ndinozovaunganidza. Vanozotambudzika zvino pashi pomutwaro wamambo nevatongi.

¹¹ “Naapo Efuremu paakawanza maarita okushaisha, maarita akaita kuti ashaishe.

¹² Kunyazwi ndikamunyorera zviro zvikuru zvezvironzo zvangu, asi zvakaerengwa kuita chiro chipara.

¹³ Kunyazwi vanopira midiro yangu yakapinda kunaka, kunyazwi vanodya nyama, Mambo Mwari aavaashiri akadi. Zvino unozokarakadza kushata kwavo, nokuunzidzira kushaisha kwavo; vanozohwirira Egipite.

¹⁴ Isuraeri wariyarwa Muiti wake, akaaka ngome; naJudha wawanza madhorobha akashosherwa; asi ndinozotumira muriro padera pemadhorobha ake, nawo unozopedza ngome dzake.”