Hos. 7 - Bhaibheri Rakachena muChindau

¹ “apo ndaida kuponesa Isuraeri, kushata kwaEfuremu kwakaoneka, nokushata kweSamaria; ngokuti vanoita manyepo, mbavha inopotera, nechikwata chembavha chinochakata ngokubanze.

² Asi avapinimidzi mumwoyo mwavo kuti ndinokarakadza kweshe kushata kwavo. Zvino zviito zvavo zvinovatendenedza, zviripo pamberi pehope yangu.

Kumukira Kunobuda muNgome

³ “Ngokushata kwavo vanoita kuti mambo adakare, nevatongi ngemanyepo avo.

⁴ Veshe vaombi; vakadai ngechoto chinobaswa ngomubiki, uwo unorekera kukhundidzira, apo apedza kukanya hlama, imetse ifeme.

⁵ Ngezuva ramambo wedu vatongi vakarwara ngokupupira kwevhini; wakatambanudza nyara yake nevashoori.

⁶ Kudai ngechoto mwoyo yavo inobaka ngokuchengedzera; ushungu hwavo hunobaka usiku hweshe; mangwanani hunobaka kudai ngomuriro unemirazvu.

⁷ “Veshe vanopisha kudai ngechoto, vanopedza vatongi vavo. Eshe madzimambo avo awa; akuna naumwe pakati pavo unodaidza kwendiri.

VaIsuraeri neveMadzinza

⁸ “Efuremu unodzikumanidza nevanhu; Efuremu chingwa chisikazi kutsanduridzwa.

⁹ Vapara vanodya simba rake, asi aazvizii; bvudzi raanemvi riripo kwaari apo naapo, asi aazvizii.

¹⁰ Kudzikudza kwaIsuraeri kunopupura kumuitira ndaa; asi avahwiriri kunaMambo Mwari, Mwari wavo, nokuti kumutsvaka, ngendaa yeizvi zveshe.

¹¹ Efuremu waita kudai ngenjiya, benzi, risina mwoyo; vanodaidza Egipite, vanoenda kuAsiria.

¹² Apo vanoenda, ndinozokandira mumbure wangu padera pavo; ndinozovadzasa pashi kudai ngeshiri dzomudenga; ndinozovaorora, kudai ngokushaisha kwavo.

¹³ “Ihehe kwevari, ngokuti vakatiza kubva kwendiri! Kuparadzwa ngakua kwevari, ngokuti vakamukira kurwa neni! Ndaizovanunura, asi vanoereketa manyepo ndini.

¹⁴ Avachemi kwendiri kubva mumwoyo yavo, asi vanoboorera vari pamibhedhi yavo; vanodziunganidzira koroni nevhini, vanondimukira.

¹⁵ Ndini ndakadzidzisa nokugwinyisa mioko yavo, asi vanoronga zvakashata ndini.

¹⁶ Vanohwirira asi haiwa kuno UwoUripadera-pazveshe; vakadai ngouta hwakashata; vatongi vavo vanozowa ngeshoti ngendaa youshungu hworurumi rwavo. Ichi chinozoita kushoorwa kwavo munyika mweEgipite.”