Hos. 6 - Bhaibheri Rakachena muChindau

Kutenderuka kwoKunyepera kweVanhu

¹ “Uyai, ngatihwirire kunaMambo Mwari; ngokuti ndiye wakabaura, ndiyezve unozotirapa; wakachaya, ndiye unozotisunga.

² Ngesure kwemazuva mairi unozotimusirira; ngezuva rechitatu unozotimirudza, kuti tipone mukuona kwake.

³ Ngatizie, ngatiangire kukwedzera kuti timuzie Mambo Mwari; kubuda kwake kwakagwinya kudai ngokuedza; unozouya kwetiri kudai ngemvura yokutanga inonaya, kudai ngemvura inodiridzira panyika.

⁴ “O Efuremu, ndinozoitenyi kwouri? O Judha, ndinozoitenyi kwouri? Rudo rwako rwakadai ngegore remangwanani, nokudai ngebeto rinokasira kuparara.

⁵ Ndizvo ndavatema ngevaprofeti; ndavauraya ngemazwi omuromo wangu, nokutonga kwangu kwakadai ngokubuda kwokujeka.

⁶ Ngokuti ndinodisisa rudo runenyasha, haiwa mubairo, nokuzia Mwari kupinda midiro inopishwa.

⁷ Asi avo kudai ndiAdhamu vakagura chitenderano; apo vakaita zvokuchengedzera kwendiri.

⁸ Gireadhi idhorobha raavo vanoshanda zvakashata, rinematotomba engazi.

⁹ Kudai ngezvikwata zvembavha zvinohwarira munhu, ngokudaro chikwata chevapristi chinouraya munjira yeShekhemu, vanoita zvinonyangadza zvakakura.

¹⁰ Mumhatso yaIsuraeri ndaona chiro chakashata yaamho; kuripo kuhura kunaEfuremu, Isuraeri wasvipiswa.

¹¹ Newewo, O Judha, kukukura kwaemeserwa kwouri. “Apo ndakahwirinza ubatwa hwavanhu vangu.