Hos. 5 - Bhaibheri Rakachena muChindau

¹ “Izwai ichi, O vapristi! Purutana, O mhatso yaIsuraeri! Purutana, O mhatso yamambo! Ngokuti kutongwa kuri kwomuri, ngokuti mwakaita murau muri Mizipha, nomumbure wakatambanudzwa padera paThabho,

² nehunza yakatsiwa kudzama muShitimu, asi ndinozoorora veshe pamwepo.

³ Ndinozia Efuremu, naIsuraeri aazi kufishika kubva kwendiri; ngokuti zvino, O Efuremu, wakahura, Isuraeri wakasvipiswa.”

Hosea Unovangwadza ngendaa yeMiedzaniso

⁴ Mishando yavo aivatenderi kuti vatenderukire kunaMwari wavo. Ngokuti mweya wokuhura uri mukati mwavo, navo avamuzii Mambo Mwari.

⁵ Kudzikudza kwaIsuraeri kunopupura muhope yake kumuitira ndaa; Efuremu unopumhunwa mukushaisha kwake; Judha naye unopumhunwa pamwepo navo.

⁶ Vanozoenda nemitanga nemakwai avo nen'ombe dzavo kootsvaka Mambo Mwari, asi avazomuoni; wabva kwevari.

⁷ Vakaita zvokuchengedzera kunaMambo Mwari; ngokuti vakabara vana vari vapara. Zvino mwedzi mutsva unovapedza pamwepo neminda yavo.

Hondo Pakati paIsuraeri naJudha

⁸ Ridzai runyanga muGibhea, negwama muRama. Ridzai mhere kuBhethiavheni, ringira sure kwako, Bhenjamini.

⁹ Efuremu unozoitwa matongo ngezuva rokuororwa; pakati pemadzinza aIsuraeri ndakaziisa ngechokwadi chinozoapo.

¹⁰ Vatongi vaJudha vaita kudai ngeavo vanobvisa mujeki womugano; ndizvo ndinozodurura ushungu hwangu padera pavo kudai ngemvura.

¹¹ Efuremu unotambudzwa, unopwanyiwa mukutongwa; ngokuti wakatenda kuteera pasina chiro.

¹² Ndizvo ndadai ngehonye kunaEfuremu nokudai ngokuora kumhatso yaJudha.

¹³ Naapo Efuremu aona nhenda yake, naJudha aona bonje rake, zvino Efuremu wakaenda Asiria, akatuma kunamambo mukuru. Asi aazi kukona kukurapa, nokuti kuporesa bonje rako.

¹⁴ Ngokuti ndinozodai ngemhondoro kunaEfuremu, nokudai ngemhondoro itsva kumhatso yaJudha. Inini ndemene, ndinozobaura nokuenda; ndinozotwara kuenda, akuna unozomuponesa.

¹⁵ Ndinozopetukazve kundau yangu, metsa vazia ndaa yavo, nokutsvaka hope yangu. Mukutambudzika kwavo vanozopota nyasha dzangu.