Hos. 4 - Bhaibheri Rakachena muChindau

Mambo Mwari Unoitira Isuraeri Ndaa

¹ Izwai izwi raMambo Mwari, O vanhu vaIsuraeri; ngokuti Mambo Mwari unehasha naavo vanogara munyika. Amuna ugondeki nokuti nyasha, nokuti kuzia Mwari munyika.

² Kupika, kunyepa, kuuraya, kuba, kuhura zvaitwa; ngazi inoteera ngazi.

³ Ndizvo nyika inozobonda, navo veshe vanogaramwo vanozopera simba, pamwepo nemhuka dzomushango neshiri dzomudenga; kunyazwi nehove dzoruandhle dzinopera.

Mambo Mwari Unoitira Ndaa Vapristi

⁴ Asi munhu asazoita hasha, usaitira umweni ndaa, ngokuti ndine hasha kweuri, O mupristi.

⁵ Unozopumhunwa masikati, muprofeti naye unozopumhunwa anewe usiku; neni ndinozoparadza mai ako.

⁶ Vanhu vangu vanoparadzwa ngendaa yokutama kuzia; ngokuti waramba kuzia, ndizvo ndinokuramba, kuti usaita mupristi kwendiri. Newe wariyarwa mipango yaMwari wako, neniwo ndinozoriyarwa vana vako.

⁷ Pevanopinda kuwanda, ndipo pevanopinda kushaisha kwendiri; ndinozotsandura uthende hwavo kuita kutsverudzwa.

⁸ Vanodya kushaisha kwevanhu vangu, vanokarisa mwoyo yavo padera pokushata kwavo.

⁹ Kunozodai ngevanhu, kudai ngomupristi; ndinozovaorora ngendaa yenjira dzavo, ndechizovapa misharo yezviito zvavo.

¹⁰ Vanozodya, vasikaguti; vanozohura, vasikawandi; ngokuti vakarekera kupurutana kunaMambo Mwari.

Mambo Mwari Unorambidza Kudirwa kweZvimwari

¹¹ Kuhura, vhini nevhini idzva zvinotora kuzwisisa.

¹² Vanhu vangu vanotsvaka kupangwa mazano ngeguri redanda, nendonga yavo inovapa kufembera. Ngokuti mweya wokuhura wakavaita kuti vapauke, navo vakaenda koohura vechisiya Mwari wavo.

¹³ Vanopira midiro padera pemitunhu, nokupisha mutombo unegwema padera pezvimitunhu, pashi pemiti yemiokhi, miphopura, nemiterebhinethi, ngokuti bvute rayo rakanaka. Ndizvo vanasikana venyu vanozohura nevazakazi venyu vanozoomba.

¹⁴ Andizoorori vanasikana venyu apo voohura, nokuti vazakazi venyu apo voomba; ngokuti vamuna pachavo vanoomba vega nemahure, vanopira midiro pamwepo nevahuri vemutemperi; ndizvo vanhu vasikazwisisi vanozowa.

¹⁵ Kunyazwi wechihura, O Isuraeri, usatendera kuti Judha ashaishe. Usapotera Girigari, nokuti usakwira Bhethiavheni, nokuti kupika kuti, “Kudai ngezvaanopona Mambo Mwari.”

¹⁶ Kudai ngetsiru risikazwi, Isuraeri aazwi; zvino Mambo Mwari ungavausha kudai ngekakwai kumafuro akapamhama here?

¹⁷ Efuraimu washonganiswa nemiedzaniso yokudira, murekerei ega.

¹⁸ Naapo kumwa kwavo kunozhazha kwapera, vanogara vechihura; vatongi vake vanodisisa zvinotsverudza kupinda uthende hwavo.

¹⁹ Dutu ramuputira mumaphaphiro aro; navo vanozotsverudzwa ngendaa yemibairo yavo.