Hos. 2 - Bhaibheri Rakachena muChindau

¹ Ronzai kuvakoma venyu kuti, “Ami,” nokuvakunda venyu kuti, “Ruhama.”

Usikagondeki Goma, Usikagondeki Isuraeri

² Potai mai enyu, potai; ngokuti aari mukadzi wangupi, neni andiri mwamuna wakepi. Ndizvo ngaarashe uhure hwake kubva pamberi pehope yake, nokuomba kwake kubva pakati pemazamo ake,

³ nokuti ndinozomukhumura kuti aite mutitinini, ndimuemese kudai ngezvaakaita ngezuva rokuberekwa kwake, ndimuite kudai ngeshango, ndimuemese kudai ngenyika yakaoma, ndimuuraye ngenyota.

⁴ Neni andizoitiri nyasha vana vake, ngokuti vana vokuhurwa.

⁵ Ngokuti mai avo vakaita uhure; iye wakavabereka wakaita zvinotsverudza. Ngokuti wakati, “Ndinozoteera zvigango zvangu, zvinondipa chingwa changu nemvura yangu, nemamviri angu emakwai, rukangaza rwangu, mafuta angu, nokumwa kwangu.”

⁶ Ndizvo, ringira, ndinozoshosha njira yako ngeminzwa, ndinozoaka rushosha kwaari, kuti asazoona njira dzake.

⁷ Unozoteera zvigango zvake, asi aazozvibati; naye unozozvitsvaka, asi aazozvioni. Zvino unozoti, “Ndinozoenda, ndihwirire kumwamuna wangu wokutanga, ngokuti zvaiya zvakapinda kunaka kwendiri kune zvino.”

⁸ Ngokuti aazi kuzia kuti ndini ndakamupa koroni nevhini nemafuta, nokuwanza kwaari sirivha nomukore, zvevakanasirira Bhaari.

⁹ Ndizvo ndinozohwirira nokutora koroni yangu ngomukuwo wayo, nevhini rangu ngenguva yaro, ndinozomutorera mamviri angu emakwai norukangaza rwangu, zvaakapuwa kufukidza utitinini hwake.

¹⁰ Zvino ndinozoonisa kutsveruka kwake mukuona kwezvigango zvake, akuna unozomununura kubva kunyara yangu.

¹¹ Ndinozoita kuti kweshe kudakara kwake kupere, mishongano yake yemadhiri, neyepakutawa kwomwedzi, nemaSabatha ake, nemishongano yake yeshe yakaemeswa yemadhiri.

¹² Ndinozohwanda mivhini yake nemionde yake, yaakaereketa ndiyo kuti, “Iyi mithuso yangu yendakapuwa ngezvigango zvangu.” Ndinozoiita gwasha, nemhuka dzomushango dzinozoidya.

¹³ Ndinozomuorora ngendaa yemazuva emadhiri aBhaari, apo akapisha mitombo kwaari, naye akadzinemesa ngendandazi dzake dzomunzee nezvinemeso zvake, akateera zvigango zvake, akandiriyarwa inini, Mambo Mwari unoronza.

Rudo rwaMwari kuVanhu Vake

¹⁴ Ndizvo, ringira, ndinozomunyengerera, ndimuunze mushango, ndechiereketa kumwoyo wake.

¹⁵ Kubvira apo ndinozomupa minda yake yemivhini, nokuita Bani reAkho musiwo wokugonda. Naapo unozopingura, kudai ngemazuva outsva hwake, nokudai ngezuva raakabuda kubva munyika yeEgipite.

¹⁶ Pazuva iro, unoronza Mambo Mwari, unozondidaidza kuti, “Mwamuna wangu;” auchazondidaidzi kuti, “Bhaari wangu.”

¹⁷ Ngokuti ndinozodusa mazina aBhaari kubva kumuromo wake, nakamwe aachazombodaidzwi ngemazina awo.

¹⁸ Ndinozokuitira chitenderano ngeiro zuva nemhuka dzomushango, shiri dzomudenga, nezvinotamanda pamavhu; ndinozogura uta, shoti nehondo kubva munyika, ndechizoita kuti vaate pashi ngokungwaririka.

¹⁹ Ndinozokutora kuti uite mukadzi wangu mhera nariini, mukururama, nomukutonga kwakanaka, ngorudo runenyasha.

²⁰ Ndinozokutora kuti uite mukadzi wangu mukugondeka; newe unozozia Mambo Mwari.

²¹ Pazuva iro ndinozopingura, Mambo Mwari unoronza, ndinozopingura matenga, nawo anozopingura nyika;

²² nenyika inozopingura koroni, vhini, nemafuta; neizvo zvinozopingura Jezireeri.

²³ Neni ndinozomukusha ndemene mumavhu. Ndinozomuitira nyasha uwo usikazi kuitirwa nyasha; ndinozoti kwevari vasiri vangu, “Muri vanhu vangu;” navo vanozoti, “Ndiwe Mwari wangu.”