Hos. 14 - Bhaibheri Rakachena muChindau

Kupota kwaHosea kunaIsuraeri

¹ O Isuraeri, hwirira kunaMambo Mwari, Mwari wako, ngokuti wakawa ngokushata kwako.

² Tora mazwi, uhwirire nawo kunaMambo Mwari, wechiti kwaari, “Bvisa kushata kweshe, ashira icho chakanaka; nesu tinozopira michero yemiromo yedu.

³ Asiria aazotiponesi; atizogadhi mahachi; atichazoronzizve kuti, ‘Mwari wedu,’ kumushando wenyara dzedu. Mweuri nherera dzinoona nyasha.”

Mambo Mwari Unogondisa Isuraeri Ndaramo Itsva

⁴ “Ndinozoporesa kusikagondeka kwavo; ndinozovada pasina mutengo, ngokuti ushungu hwangu hwakunukuka kubva kwevari.

⁵ Ndinozodai ngebeto kunaIsuraeri; unozotumbuka kudai ngegofa, nokubudisa nzinde dzake kudai ngegwasha reRebhanoni.

⁶ Nhai dzake dzinozotambarara; unaku hwake hunozodai ngomuti womuorivhi, negwema rake rinozodai ngeRebhanoni.

⁷ Vanozogarazve pashi pebvuri rangu, vanozorima zviyo, nokutumbuka kudai ngomuvhini; gwema rake rinozodai ngevhini reRebhanoni.

⁸ O Efuremu, ndichineyi miedzaniso yokudira? Ndini ndinopingura nokumungwarira. Ndakadai ngomuti muishi womusaiprusi; michero yako inobva kwendiri.”

Magumo

⁹ Uwo wakangwara, unozwisisa izvi zviro; uwo wakangwara unozvizia. Ngokuti njira dzaMambo Mwari dzakarurama, nevakarurama vanohamba mukati mwadzo; asi vashaishi vanowa mukati mwadzo.