Hos. 13 - Bhaibheri Rakachena muChindau

Kutongwa Kwokugumisira padera paIsuraeri

¹ Naapo Efuremu akaereketa, vanhu vakahuta; wakakudzwa muIsuraeri; asi wakashaisha kubudikidza ndiBhaari, naye wakafa.

² Nazvino vanoangira kushaisha, vanodziitira miedzaniso yavo, miedzaniso yokudira yesirivha yakanyunguruswa, kudai ngokuzwisisa kwavo, yeshe mishando yengwazi. Vanoereketa ndiyo kuti, “Vanhu vanopira midiro ngavachingamidze makonyana ngomuromo.”

³ Ndizvo vanozodai ngemhute yemangwanani nokudai ngebeto rinokasira kuparara, kudai ngemazungu anotorwa ngechipupuri kubva pambuwa, nokudai ngechiushi chinobuda paburi.

⁴ “Asi ndaiya Mambo Mwari, Mwari wako, kubvira munyika yeEgipite; auzii Mwari asi inini; ngepabanzi pangu akuna muponesi.

⁵ Ndini ndakakuzia mushango, munyika yakaoma kakurutu.

⁶ Apo pendakavapa kudya, vakagutiswa; naapo vagutiswa, mwoyo wavo wakadzikudza, ndizvo vakandiriyarwa.

⁷ Ndizvo ndinozoita kudai ngemhondoro kwevari; kudai ngekhamba panjira ndinozovahwarira.

⁸ Ndinozowira padera pavo kudai ngebheya rakabirwa vana varo, ndinozobaura ruzarira rwomwoyo wavo; naapo ndinozovadya kudai ngemhondoro, kudai ngezvingaitwa kwevari ngechikara chomushango.

⁹ “Ndinozokuparadza, O Isuraeri, ngokuti kudetserwa kwako kuri mwendiri.

¹⁰ Uri pari zvino mambo wako uwo ungakuponesa? Ngokuri mumadhorobha ako eshe kunevatongi vako, avo vowakati ndivo, ‘Ndipei mambo nevatongi?’

¹¹ Ndakamupa mambo mukunyangadzwa kwangu, ndikamubvisa muushungu hwangu.

¹² Kushata kwaEfuremu kwakasungwa; kushaisha kwake kwakangwarirwa.

¹³ Kurwadziwa kwokubereka mwana kunouya padera pake, asi mukororo usikazi kungwara; ngokuti ngenguva kwayo aadziunzi pamuromo wendani.

¹⁴ Ndinozovatenga kubva kusimba reiba here? Ndinozovaripira kubva mukufa here? O kufa, uri pari ukaira hwako? O iba, kuri pari kuparadza kwako? Nyasha dzakafishika kubva kumadziso angu.

¹⁵ Kunyazwi anobereka vana pakati pehama dzake, dutu rokumabvazuva rinozouya, kuputika kubva kunaMambo Mwari rechimiruka kubva mushango, nechinyuka chake chinozopwa, nesaa rinozoita makandwa. Rinozobvisa upfumi hwake hwechidziyo cheshe chinomutengo mukuru.

¹⁶ Samaria rinozoororwa, ngokuti rakamukira Mwari waro; vanozowa ngeshoti; chiya dzavo dzinozoputswa kuita zvigurwa, nevakadzi vaane mimba vanozotumburwa.”