Hos. 12 - Bhaibheri Rakachena muChindau

¹ “Efuremu unoguta ngedutu, unoteera dutu rokumabvazuva zuva reshe; unowanza manyepo nokuparadza; unoita chitenderano naAsiria, nemafuta anotwara kuenda Egipite.”

² Mambo Mwari unehasha naJudha, unozoorora Jakobe kudai ngenjira dzake, nokumuunzidzira kudai ngezviito zvake.

³ Mundani wakabata chisisinho chomukoma wake; nomuutsva hwake wakadzipana naMwari.

⁴ Wakadzipana nengirosi, akanyisa; wakachema, nokupota nyasha dzake; wakashongana naye muBhetheri, naapo wakaereketa naye.

⁵ Mambo Mwari, Mwari wehondo, Mambo Mwari, ndiro zina rake.

⁶ Asi iwewe, petuka kunaMwari wako; ungwarire rudo nokutonga kwakanaka, newe uangire kugarira Mwari wako nguva dzeshe.

Mazwi Amweni oKutongwa

⁷ “Mutengesi, unezvipimo zvokuchengedzera munyara mwake, unodisa kutambudza.

⁸ Efuremu wakati, ‘A, ndaita gurudza, ndadzionera upfumi; mukuuyirwa kwangu kweshe akuna kushata kwakaoneka mwendiri kungandiitira ndaa.’

⁹ Ndini Mambo Mwari, Mwari wako, kubvira munyika yeEgipite; ndichazoita kuti ugarezve mumatende, kudai ngemazuva emadhiri akaemeswa.

¹⁰ Ndakaereketa kuvaprofeti, ndini ndakawanza zvioniso, nokubudikidza ngevaprofeti ndinozounza kuparadzwa.

¹¹ MuGireadhi kurimwo kushata, ngegwinyiso vanozoita vasina shwiro. MuGirigari vanopira midiro yemikono, ndizvo maarita avo anozodai ngemirwi yemapuwe munhoro dzomunda.”

¹² Jakobe wakatizira kunyika yeAramu, iyo Isuraeri wakashandira kupuwa mukadzi; kuti apuwe mukadzi, wakausha makwai.

¹³ Kubudikidza ngomuprofeti Mambo Mwari wakabudisa Isuraeri kubva muEgipite, kubudikidza ngomuprofeti wakangwarirwa.

¹⁴ Efuremu wakamunyangadza kakurutu, ndizvo Mambo Mwari wake unozounza ndaa dzake padera pake, unozomuhwirinzira ngendaa yezvituko zvake.