Hos. 11 - Bhaibheri Rakachena muChindau

Rudo rwaMwari kuVanhu vake Vanomukira

¹ “Apo Isuraeri achimwana, ndakamuda, ndakadaidza mukororo wangu kubva muEgipite.

² Kuvadaidza kazhinji kwendakaita, vakapinda kuenda kuretu kubva kwendiri; vakaangira kupira mibairo kumaBhaari, vakapisha mitombo inegwema rakanaka kumiedzaniso yakatsetswa.

³ Asi ndini ndakadzidzisa Efuremu kuhamba, ndechivabata munyara dzangu; asi avazi kuzia kuti ndakavaponesa.

⁴ Ndakavakweya ngemapote enyasha dzomunhu, ngezvisungo zvorudo. Kwevari ndaiya ndakadai ngeavo vanobvisa joka patsaya dzavo. Ndakakotama pashi kwevari, ndikaisa kudya pamberi pavo.

⁵ “Vanozohwirira munyika mweEgipite, nomuAsiria unozoita mambo wavo, ngokuti vakaramba kupetuka kwendiri.

⁶ Shoti inowira padera pemadhorobha avo, inopedza sika dzemisiwo yavo, vechidya ngendaa yokuronga kwavo vemene.

⁷ Vanhu vangu vanoemesa kuhwirira sure kubva kwendiri. Kune Uri-padera-pazveshe vanodaidza, asi aavamirudzi.

⁸ “Ndingakuita marekererenyi, Efuremu? Ndingakupira ngenjiranyi, O Isuraeri? Ndingakuita maitirenyi kuti udai ndiAdhima? Ndingakuita mabatirenyi kudai ndiZebhoimu? Mwoyo wangu unotenderudzwa mukati mwangu; nyasha dzangu dzinokura mukati mwangu.

⁹ Andizoiti ushungu hwangu hunotyisa, andizohwiririzve kooparadza Efuremu; ngokuti ndiri Mwari, haiwa mukororo womunhu, Umwe Wakachena uri pakati pako, neni andizouyi muushungu.

¹⁰ “Vanozoteera Mambo Mwari, uwo unobhonga kudai ngemhondoro; apo yechibhonga, vana vake vanozouya vechihuta vechibva kumabirirazuva.

¹¹ Vanozouya vechihuta kudai ngeshiri dzechibva muEgipite, nokudai ngenjiya yechibva munyika mweAsiria; neni ndinozovahwirinza kumhatso dzavo, unoronza Mambo Mwari.”

Isuraeri naJudha Vanoitirwa Ndaa

¹² Efuremu wanditendenedza ngemanyepo, nemhatso yaIsuraeri ngokuchengedzera; asi Judha uchatonga naMwari, unogondeka kuneUmwe Wakacheneswa.