Hos. 10 - Bhaibheri Rakachena muChindau

¹ Isuraeri wakadai ngomuvhini wakanakisisa, unodziberekera michero yawo. Kuwanda kwemichero yake kunowanza maarita aanoaka; kudai ngokunaka kwenyika yake, wakaita sika dzokudira dzakanasa kunasirwa.

² Mwoyo wavo unonyepera; zvino vanosisira kutwara kushata kwavo. Unozoputsa maarita avo, nokuparadza sika dzavo.

³ Ngokuti zvino vanozoti, “Atina mambo, ngokuti atityi Mambo Mwari; namambo ungatiitirenyi?”

⁴ Vanoereketa mazwi akawanda, vechipika kunyepa, vechiita zvitenderano; ndizvo kutonga kunomera kudai ngomuti unoukaira unouraya munhoro dzomunda.

⁵ Vagari vomuSamaria vanohuta ngendaa yemakonyana eBhethiavheni. Vanhu varo vanozobonda ngendaa yaro, nevapristi vemiedzaniso vanozochema, avo vakadakara ngendaa youthende hwaro, hwakabva kweriri.

⁶ Rinozotorwa kuenda Asiria, kuita chipo chamambo mukuru. Efuremu uchaiswa muchitsverudzo, naIsuraeri unozotsverudzwa ngomupangi wake.

⁷ Mambo weSamaria unozoparadzwa, kudai ngechipande chiri padera pemvura.

⁸ Ndau dzakakwirira dzeAvheni, kushaisha kwaIsuraeri, dzinozoparadzwa. Minzwa nemakato zvinozomera padera pemaarita avo. Vanozoronza kuti kumitunhu, “Tifukidzei;” nokuzvimitunhu kuti, “Tiwirei.”

Mambo Mwari Unodaidza Kutongwa padera paIsuraeri

⁹ Kubvira pamazuva aGibhea wakashaisha, O Isuraeri; apo vakaangira. Hondo aizovanyisi here muGibhea?

¹⁰ Muchidisiso changu ndichavaorora; nemadzinza anozounganidzwa kurwa navo apo vanosungwa ngendaa yezvishaishi zvavo zvakapetwa.

¹¹ NaEfuremu waiya akadai ngetsiru rakadzidziswa, rinoda kupura; neni ndakasiya mutsipa waro wakanaka; asi ndinozoita kuti paEfuremu atse pashi; Judha unosisira kurima, Jakobe unozoputsa maondo pachake.

¹² Dzikushirenyi kururama, chekai nyasha dzinorudo; rimai makura enyu; ngokuti waamukuwo wokutsvaka Mambo Mwari, kuti auye, anaise kururama padera penyu.

¹³ Mwakarima kushata, mwakacheka zvinonyangadza, mwadya michero yemanyepo. Ngokuti mwagonda simba renyu, nouwandu hwengwazi dzenyu,

¹⁴ ndizvo bope rehondo rinozoapo padera pevanhu venyu, nemasvingo enyu eshe anozoparadzwa, kudai ndiSharimani wakaparadza Bhethiaribheri ngezuva rehondo, apo anamai pevakaputswa kuita zvigurwa pamwepo nevana vavo.

¹⁵ Izvi ndizvo zvinozoitwa kwouri, O Bhetheri, ngendaa yokushata kwako kukuru. Mumambakwedza mambo waIsuraeri unozogurwa yaamho.