Hag. 2 - Bhaibheri Rakachena muChindau

Kujeka kweTemperi Idzva

¹ Mumwedzi wechinomwe, ngezuva remakumi mairi narimwe romwedzi, izwi raMambo Mwari rakauya kubudikidza ndiHagai muprofeti rechiti,

² “Ereketa zvino kunaZerubhabheri mukororo waShearatieri, mutongi waJudha, nokunaJoshua mukororo waJehozadhaki, mupristi mukuru, nokwevari vakasara vevanhu wechiti.

³ “Ndiani wakasara pakati penyu weavo vakaona iyi mhatso muuthende hwayo hwokutanga? Munoiona yakaitawani zvino? Mwechiedzanisa mukuona kwemadziso enyu aizi kudai ngechisina shwiro here?

⁴ Asi zvino gwinya, O Zerubhabheri, unoronza Mambo Mwari; gwinya, O Joshua, mukororo waJehozadhaki, mupristi mukuru; mugwinye, imwimwi mweshe vanhu venyika, unoronza Mambo Mwari; mushande, ngokuti ndinemwi, unoronza Mambo Mwari wehondo,

⁵ kudai ngechigondiso chendakatenderana nemwi apo mwakabuda kubva muEgipite. Mweya wangu unogara pakati penyu; musatya.

⁶ Ngokuti izvi ndizvo zvinoronza Mambo Mwari wehondo: Kamwezve, kwemukuwo mudoko, ndinozozungunyisa matenga nenyika, ruandhle nenyika yakaoma;

⁷ ndinozozungunyisa madzinza eshe, kuitira kuti upfumi hwemadzinza eshe huzouya, neni ndinozozadza iyi mhatso ngouthende, unoronza Mambo Mwari wehondo.

⁸ Sirivha ngeyangu, nomukore ngowangu, unoronza Mambo Mwari wehondo.

⁹ Uthende hwemhatso iyi hwakateera hunozopinda kukura kuno uhwo hweyokutanga, unoronza Mambo Mwari wehondo; nomundau iyi ndinozopa kunyarara, unoronza Mambo Mwari wehondo.”

Muprofeti Unobvunza Vapristi

¹⁰ Pazuva remakumi mairi nemarongomuna romwedzi wechipfumbamwe, mugore rechipiri rokutonga kwaDhariusi, izwi raMambo Mwari rakauya kubudikidza ndiHagai muprofeti rechiti,

¹¹ “Izvi ndizvo zvinoronza Mambo Mwari wehondo: Bvunza vapristi ngendaa yechironzo wechiti,

¹² ‘Kudai aripo unotwara nyama yakacheneswa mupendero wechigwama chingwa, nokuti muriwo, nokuti vhini, nokuti mafuta, nokuti kudya kumweni, kunozocheneswa here?’ ” Vapristi vakapingura, vakati, “Haiwa.”

¹³ Zvino Hagai wakati, “Kudai aripo usikazi kusukika ngendaa yomuiri wakafa, naye echigwama chimweni cheizvi, chinozoita chisikazi kusukika here?” Vapristi vakapingura, vakati, “Eya, chinozoita chisikazi kusukika.”

¹⁴ Zvino Hagai wakapingura akati, “Vakadaro vanhu ava, rakadarozve dzinza iri pamberi pangu, unoronza Mambo Mwari; yakadarozve mishando yeshe yenyara dzavo; nezvevanopapo azvizi kusukika.

Mambo Mwari Unovagondisa Zvifumiso zvake

¹⁵ “Asi zvino, pinimidzai zvinozoitika kubvira kuzuva iri nokuenda mberi. Naapo buwe risati raiswa padera pebuwe rimweni mutemperi raMambo Mwari,

¹⁶ mwakaita maitirenyi? Apo umwe auya kumurwi wezvipimo echikarira kuona makhirogramu mazana mairi (200), asi riripo zana rimwe (100); apo umwe auya koochera zana rimwe (100) revhini kuchidziyo, asi woona maritha makumi marongomuna.

¹⁷ Ndakatumira nhenda yezvisimwa, chikhuta nematsanza kuparadza mishando yeshe yenyara dzenyu; asi amuzi kupetuka kwendiri, unoronza Mambo Mwari.

¹⁸ Pinimidzai zvino kubvira kuzuva remakumi mairi nemarongomuna romwedzi wechipfumbamwe. Kubvira pazuva raakaiswa madzeyo etemperi raMambo Mwari, pinimidzai ndicho.

¹⁹ Iripo mbeu yakasara mutsapi here? Muvhini, muonde, muphomegraniti, muorivhi, aisati yabereka chiro here? Kubvira pazuva iri kuenda mberi ndinozomufumisa.”

Chigondiso chaMambo Mwari kunaZerubhabheri

²⁰ Izwi raMambo Mwari rakauya kwechipiri kubudikidza ndiHagai ngezuva remakumi mairi nemarongomuna romwedzi rechiti,

²¹ “Ereketa kunaZerubhabheri, mutongi waJudha, wechiti, ‘Ndaakuda kuzozungunyisa matenga nenyika.

²² Ndaakuda kuzoriga pashi madendemaro oumambo, ndechizoparadza simba roumambo hwevemadzinza; ndechiparadza ngoro naavo vanokwira mukati mwadzo; nemahachi nevagadhi vawo vanozowiswa pashi, veshe umwe ngaumwe ngeshoti yehama yake.

²³ Pazuva iro, unoronza Mambo Mwari wehondo, ndinozokutora, O Zerubhabheri, muranda wangu, mukororo waShearatieri, unoronza Mambo Mwari, ndinozoita kuti udai ngechioniso chendandazi; ngokuti ndakutsanangura,’ unoronza Mambo Mwari wehondo.”