Gen. 9 - Bhaibheri Rakachena muChindau

Chitenderano chaMwari naNoa

¹ NaMwari wakafumisa Noa nevakororo vake, naye wakati kwaari, “Baranai muwande, muzadze nyika.

² Kutyiwa kwenyu nokutyisa kwenyu kunozoapo padera pemhuka yeshe yomunyika, nepadera peshiri yeshe yomumweya, nepadera peicho cheshe chinogwezva panyika, nehove dzeshe dzomuruandhle, zvakaiswa munyara dzenyu.

³ Chiro cheshe chinohamba chinopona chinozoita kudya kwomuri; kudai ngezvendakamupa miriwo yakasvipirika, ndinopa zveshe kwomuri.

⁴ Asi amuzodyi nyama inokupona kwayo, kuronza kuti, ngazi yayo.

⁵ Ngegwinyiso ndinozobvunza ngazi yokupona kwenyu, kunyara dzemhuka dzeshe ndinozoibvunza, nokunyarazve dzevanhu, eya, kunyara dzeshe dzehama yomunhu ndinozobvunza kupona kwomunhu.

⁶ “Kunyazwi ndiani unoparadza ngazi yomunhu, ngazi yake inozoparadzwa ngomunhu; ngokuti Mwari wakaita munhu ngomuedzaniso wake.

⁷ Imwimwi, baranai muwande; mubarane kakurutu munyika, muwande mukati mwayo.”

⁸ Zvino Mwari wakaereketa kunaNoa nokuna vakororo vake pamwepo echiti,

⁹ “Wonai, inini ndinogwinyisa chitenderano changu nemwi, nokumibarirwana yenyu inozoteera sure kwenyu,

¹⁰ nokuzvisikwa zveshe zvinopona zvinemwi, shiri, zvifuyo nemhuka dzeshe dzomunyika dzinemwi, zveshe zvinobuda kubva mungarava.

¹¹ Ndinogwinyisa chitenderano changu nemwi kuti nyama yeshe aichazoparadzwizve ngemvura yendambi. Zve, aichazoapo ndambi kuparadza nyika.”

¹² Mwari wakati, “Ichi ndicho chioniso chechitenderano chendinoita pakati pangu nemwi, nepakati pezvisikwa zveshe zvinopona zvinemwi, nemibarirwana inozoteera sure kwenyu.

¹³ Ndinozoisa utahwadande-mutande hwangu mugore, nahwo hunozoita chioniso chechitenderano pakati pangu nenyika.

¹⁴ Naapo pendinounza gore padera penyika utahwadande-mutande hunozooneka mugore,

¹⁵ neni ndinozokarakadza chitenderano changu chiri pakati pangu nemwi, nepakati pezvisikwa zveshe zvinopona zvenyama yeshe; nemvura aichazoitizve ndambi kuparadza nyama yeshe.

¹⁶ Naapo utahwadande-mutande hwaa mugore, ndinozohuringira, naapo ndinozokarakadza chitenderano chisina magumo chiri pakati paMwari nezvisikwa zveshe zvinopona zvenyama yeshe iri padera penyika.”

¹⁷ Mwari wakati kunaNoa, “Ichi ndicho chioniso chechitenderano chendakagwinyisa pakati pangu nepenyama yeshe iri padera penyika.”

Noa neVakororo vake

¹⁸ Vakororo vaNoa avo vakabuda kubva mungarava vaiya Shemu, Hamu naJafethi. Hamu ndiye baba waKhenani.

¹⁹ Ava vatatu ndivo vakororo vaNoa; ngaavo nyika yeshe yakazadzwa ndivo ngevanhu.

²⁰ Noa wakatanga kuita murimi wevhu, akasima munda wemivhini.

²¹ Naye wakamwa vhini, akadhakwa; wakaata mutitinini mutende rake.

²² NaHamu, baba aKhenani, wakaona utitinini hwababa ake, akaronzera vakoma vake vaiya pabanze.

²³ Zvino Shemu naJafethi vakatora chokufuka, vakachiisa pamapfudzi avo vari vairi, vakahamba ngefundamutete, vakafukidza utitinini hwababa avo; hope dzavo dzaiya dzakaringira sure, avazi kuona utitinini hwababa avo.

²⁴ Naapo Noa amuka kubva mukudhakwa ngevhini, wakazia izvo zvaiya zvaitwa kwaari ngomukororo wake mudoko.

²⁵ Wakati, “Khenani ngaatukwe; unozoita hloko yehloko kunehama dzake.”

²⁶ Naye wakatizve, “Ngaakudzwe Mambo Mwari, Mwari waShemu; naKhenani ngaaite hloko yake.

²⁷ Mwari ngaakurise Jafethi, ngaagare mumatende aShemu; naKhenani ngaaite hloko yake.”

²⁸ Noa wakapona makore mazana matatu nemakumi mashanu (350) ndambi yapera.

²⁹ Mazuva eshe akapona Noa aiya makore mazana mapfumbamwe nemakumi mashanu (950), naye wakafa.