Gen. 8 - Bhaibheri Rakachena muChindau

Kupera kweNdambi

¹ Asi Mwari wakakarakadza Noa nemhuka dzeshe dzomushango nezvifuyo zveshe zvaiya naye mungarava. NaMwari wakaita kuti dutu rivhuvhute padera penyika, nemvura yakapwa;

² zvinyuka zvepashi penyika zvakadzama nemafasitera omudenga zvakakonywa, nemvura yainaya kubva mudenga yakaemeswa,

³ nemvura yakaangira kupwa kubva padera penyika. Ngesure kwemazuva zana nemakumi mashanu (150) mvura yakadzerera.

⁴ Ngomwedzi wechinomwe ngezuva regumi namanomwe romwedziwo ngarava yakagara padera pemitunhu yaArarati.

⁵ Mvura yakaangira kudzerera metsa mwedzi wechigumi; ngomwedzi wechigumi, ngezuva rokutanga romwedziwo, misoro yemitunhu yakaoneka.

⁶ Ngesure kwemazuva makumi marongomuna (40) Noa wakabeura fasitera rengarava yaakaita,

⁷ naye wakatuma gunguwo, naro rakahamba apo naapo metsa mvura yapwa panyika.

⁸ Wakatumazve gora kubva kwaari, koona kuti mvura yaiya yapwa here padera pemavhu;

⁹ asi gora arizi kuona pokuzororera rutsoka rwaro, naro rakahwirira kwaari mungarava, ngokuti mvura yaiya ichi padera penyika yeshe. Ndizvo wakatambanudza nyara yake, akaritora, akaripotedza kwaari mungarava.

¹⁰ Wakagara mazuva amweni manomwe, wakatumazve gora kubva mungarava;

¹¹ negora rakapotera mukati kwaari madeekoni; wona, mumuromo waro mwaiya neshakani romuorivhi rakaphazurwa. Ndizvo Noa wakazia kuti mvura yapwa panyika.

¹² Wakagarazve mazuva amweni manomwe; akatumazve gora; naro arizi kuchazopetuka kwaari.

¹³ Ngegore remazana matanhatu narimwe (601), ngomwedzi wokutanga, ngezuva rokutanga romwedziwo, mvura yakapwa panyika; naNoa wakadusa icho chaidumaidza ngarava, akaringira, wona, padera pemavhu paiya paoma.

¹⁴ Mumwedzi wechipiri, ngezuva remakumi mairi namanomwe romwedziwo, nyika yaiya yaoma.

¹⁵ Zvino Mwari wakaereketa kunaNoa echiti,

¹⁶ “Buda mungarava, iwewe nomukadzi wako nevakororo vako nevakadzi vevakororo vako.

¹⁷ Budisa zveshe zvinopona zvinewe zvenyama yeshe, shiri zvifuyo nezvinohamba, izvo zvinogwezva padera penyika; kuti zvibare kakurutu munyika, zvibarane zviwande padera penyika.”

¹⁸ Ndizvo Noa wakabuda nevakororo vake nomukadzi wake nevakadzi vevakororo vake pamwepo naye.

¹⁹ Nemhuka dzeshe nezveshe zvinogwezva neshiri dzeshe, kunyazwi chiinyi chinohamba padera penyika, kudai ngokuteererana kwembeu dzazvo, zvakabuda kubva mungarava.

Noa Unoita Mudiro

²⁰ Zvino Noa wakaakira Mambo Mwari arita; wakatora imwe kubva kumbeu imwe ngaimwe yemhuka yeshe yakasukika, nokune mbeu yeshiri yeshe yakasukika, akaita midiro inopishwa padera pearita.

²¹ Naapo Mambo Mwari wakafemba gwema rakanaka; naMambo Mwari wakati mumwoyo mwake, “Andichazotukizve mavhu ngendaa yomunhu, ngokuti kupinimidza kwomwoyo womunhu kwakandoshata kubvira muudoko hwake; zve, andichazoparadzizve zveshe zvinopona kudai ngezvendaita.

²² Apo nyika ichindoripo mukuwo wokukusha nokukukura, kutonhora nokupisha, chirimo nechando, masikati nousiku azvizokoreri.”