Gen. 6 - Bhaibheri Rakachena muChindau

Kushaisha kweVanhu

¹ Naapo vanhu pevakatanga kuwanda padera penyika, nevasikana vakabarwa kwavari,

² vakororo vaMwari vakaona kuti vanasikana vevanhu vakanaka; navo vakadzitorera kuita vakadzi avo vavakada kudai ngokutsanangura kwavo.

³ Naapo Mambo Mwari wakati, “Mweya wangu auzogari wechitongana nevanhu mhera nariini, ngokuti uri nyama, asi nomunhu mazuva ake anozoita makore zana nemakumi mairi.” (120)

⁴ Ngemazuva awo aiyapo magakanyara munyika, zve, ngesure kweizvi, apo vakororo vaMwari vakapotera kuvasikana vevanhu, navo vakavabarira vana, avo vaiya vanhu vane simba vekare, vanhu vane mbiri.

⁵ Mambo Mwari wakaona kuti kushata kwevanhu kwaiya kwakura munyika, nokuti kukarakadza kweshe kwemipinimidzo yomwoyo yavo kwaiya kwakashata nguva dzeshe.

⁶ NaMambo Mwari wakadzishoora kuti waiya akasika munhu panyika, nazvo zvakarwadza mwoyo wake.

⁷ Ndizvo Mambo Mwari wakati, “Ndinozoparadza vanhu vendakasika padera penyika, zveshe, vanhu, zvikara, zvinogwezva neshiri dzomumweya; ngokuti zvinondirwadza mwoyo kuti ndakazviita.”

⁸ Asi Noa wakaona nyasha mukuona kwaMambo Mwari.

Noa

⁹ Iyi ndiyo mibarirwana yaNoa. Noa waiya munhu wakarurama, ari wakaperera pakati pevanhu venguvayo. Noa wakahamba naMwari.

¹⁰ NaNoa wakabara vakororo vatatu, Shemu, Hamu naJafethi.

¹¹ Nenyika yaiya yashata pamberi paMwari, nyika yaiya yazara ngokugebenga.

¹² Mwari wakaona nyika, ringira, yaiya yashata; ngokuti vanhu veshe vaiya vashaishira njira yavo padera penyika.

¹³ NaMwari wakati kunaNoa, “Kupera kwenyama yeshe kwaguma pamberi pangu, ngokuti nyika yazara ngokugebenga kubudikidza ndivo; wona, ndinozovauraya pamwepo nenyika.

¹⁴ Ita ngarava ngomuti unozwi gofa; unozonasira makamera mungarava, unozoinama mukati nokubanze ngenamo.

¹⁵ Iyi ndiyo njira younozoinasira; kureba kwengarava kunozoita mamitha zana nemakumi matatu namatatu (133), kupamhama kwayo kunozoita mamitha makumi mairi namairi (22) noudzamu hwayo hunozoita mamitha gumi namatatu (13).

¹⁶ Unozoita fasitera rengarava, naro rinozoita masendimitha makumi marongomuna namarongomuna (44) kureba; newe unozoita musiwo ngeparutii rwayo; unozoinasira inemakamera epashi, noomuturika wechipiri, noomuturika wechitatu.

¹⁷ Ngokuti, wona, inini ndinozounza ndambi yemvura padera penyika, kuti iuraye nyama yeshe, iyo mukati mwayo ino mweya unorarama kubva pashi pomudenga; zveshe zviri munyika zvinozofa.

¹⁸ Asi ndinozogwinyisa chitenderano changu newe; newe unozopotera mungarava, iwewe nevakororo vako nomukadzi wako nevakadzi vevakororo vako pamwepo newe.

¹⁹ Newe unozounza mungarava zviiri ngezviiri zvembeu dzeshe dzezviro zvinopona zvenyama yeshe, kuti uzvingwarire zvipone newe; zvinozoita mwamuna nomukadzi.

²⁰ Kushiri kudai ngokuteererana kwembeu yadzo, nokun'ombe kudai ngokuteererana kwembeu yadzo, nokuzviro zveshe zvinogwezva zvenyika kudai ngokuteererana kwembeu yazvo, zviiri ngezviiri zvembeu dzeshe zvinozouya kwouri, kuti uzvingwarire zvipone.

²¹ Utorewo mbeu dzeshe dzokudya kunodyiwa, ukuunganidze kwouri, nakwo kunozoita kudya kwako nekwazvo.”

²² Noa wakaita kudaro, wakaita kudai ngeizvo zveshe zvaakapangirwa ndiMwari.