Gen. 50 - Bhaibheri Rakachena muChindau

Kuikwa kwaJakobe

¹ Zvino Josefa wakawira padera pehope yababa ake, akachema aripo padera pavo, akavachingamidza ngomuromo.

² Josefa wakapanga varanda vake, madhokodheya kuti vaomese muiri wababa ake ngemitombo kuti usaora, nemadhokodheya akaomesa muiri waIsuraeri;

³ vakapedza mazuva makumi marongomuna kwaari; ngokuti ndiwo mazuva akadaro aidiwa kuomesa muiri; nevaEgipite vakamuchema mazuva makumi manomwe.

⁴ Naapo mazuva okumuchema apera, Josefa wakaereketa kunevemhatso yaFaro echiti, “Kudai zvino ndaona nyasha mukuona kwenyu, ndapota, ereketai mukuzwa kwaFaro mwechiti,

⁵ ‘Baba angu vakandipikisa vechiti, Wona, ndaa kufa; unozondiika muiba rangu rendakadzitsira munyika yeKhenani. Ndizvo zvino, ndapota, nditenderei kuti ndiende, ndiike baba angu, neni ndinozopetukazve.’ ”

⁶ Faro wakati, “Kwira, uende, uike baba ako, kudai ngezvaakakupikisa.”

⁷ Ndizvo Josefa wakakwira kooika baba ake. Vakakwira naye varanda veshe vaFaro, vakuru vemhatso yake, nevakuru veshe venyika yeEgipite,

⁸ nemhatso yeshe yaJosefa, nevana vababa ake, nevemhatso yababa ake. Vega vadoko vavo nezvifuyo zvavo nemihlambi yavo vakazvisiya munyika yeGosheni.

⁹ Dzakakwira naye dzeshe ngoro, nevagadhi vemahachi vaiya chiunga chikurutu.

¹⁰ Naapo vakaguma kumbuwa yaAthadhi, iri ruseri rweJorodhani, vakachema ngechiriro chikurutu: naye wakaemesa mazuva manomwe okuchema baba ake.

¹¹ Apo vagari vomunyika iyo, vaKhenani, vakaona kuchema kwaiya pambuwa yaAthadhi, vakati, “Uku kuchema kunosvipisa mwoyo kuvaEgipite.” Ndizvo zina rendau iyo rakaudzwa kuti Abheri-miziraimu, riri ruseri rweJorodhani.

¹² Ndizvo vakororo vake vakaita kwaari kudai ngezvaakavapanga.

¹³ Vakororo vake vakamutwara kuenda kunyika yeKhenani, vakamuika mubako romumunda weMakhipera, riri kumabvazuva kweMamure, iro raakatenga Abrahama pamwepo nomunda kubva kunaEfroni muHiti, kuita ndau yokuika.

¹⁴ Apedza kuika baba ake, Josefa wakahwirira Egipite nevakoma vake, navo veshe vakakwira naye kooika baba ake.

Josefa Unogondisa Vakoma Vake

¹⁵ Naapo vakoma vaJosefa vaona kuti baba avo vafa, vakati, “Pamweni Josefa unozotizonda nokutiunzidzira kushata kweshe kwetakamuitira.”

¹⁶ Vakatumira izwi kunaJosefa vechiti, “Baba ako vakatipanga, vasati vafa, vechiti,

¹⁷ ‘Munozoronza kudai kunaJosefa: Rekerera zvino, ndapota, kupauka kwevakoma vako nokushaisha kwavo, ngokuti vakakuitira zvakashata.’ Zvino, tinokupota, rekerera kupauka kwevaranda vaMwari wababa ako.” Josefa wakachema apo pevakaereketa naye.

¹⁸ Vana vababa ake vakauya, vakawira pamberi pake; vakati, “Wona, tiri varanda vako.”

¹⁹ Asi Josefa wakati kwavari, “Musatya! Ndiri pandau yaMwari here?

²⁰ Imwimwi mwakandipinimidzira zvakashata, asi Mwari wakandipinimidzira kuti zvindinakire, kuitira kuti vanhu vazhinji vaponeswe, kudai ngezviripo nyamashi.

²¹ Ndizvo zvino musatya; ndinozomupa zvokudya nevadoko venyu.” Wakavaembedzera, akaereketa ngenyasha kwavari.

Kufa kwaJosefa

²² Josefa wakagara Egipite, iye nevemhatso yababa ake; Josefa wakapona makore zana negumi (110).

²³ Josefa wakaona vana vaEfuremu vomubarirwana wechitatu; zve, nevana vaMakhiri, mukororo waManase, vakatengurwa pamabvi aJosefa.

²⁴ Josefa wakati kuvana vababa ake, “Ndaakufa; asi Mwari unozomuhambira, amubudise kubva munyika muno kuenda kunyika yaakapika ndiyo, kunaAbrahama, kunaIsaka nokunaJakobe.”

²⁵ Josefa wakapikisa vana vaIsuraeri mhiko echiti, “Ngegwinyiso Mwari unozomuhambira, nemwi munozotwara magodo angu kukwira nawo kubva pano.”

²⁶ Ndizvo Josefa wakafa, aane makore zana negumi (110); vakaomesa muiri wake ngemitombo kuti usaora, naye wakaiswa mubhokisi muEgipite.