Gen. 48 - Bhaibheri Rakachena muChindau

Jakobe Unofumisa Efuremu naManase

¹ Ngesure kweizvi Josefa wakaronzerwa kuti, “Ringira, baba ako vanorwara;” wakatora vakororo vake vairi kuenda navo, Manase naEfuremu.

² Naapo Jakobe aronzerwa kuti, “Mukororo wako Josefa wauya kwouri,” zvino Isuraeri wakadzigwinyisa, akagara pamubhedhi.

³ Jakobe wakati kunaJosefa, “Mwari Unesimba-reshe wakaoneka kwendiri paRuzi munyika yeKhenani, akandifumisa,

⁴ akati kwendiri, ‘Ringira, ndinozokuita kuti ubare, ndikuwanze; ndinozokuita chiunga chevanhu, ndinozopa nyika iyi kumibarirwana yako inouya sure kwako kuita yavo mhera nariini.

⁵ Zvino vakororo vako vairi vewakabarirwa munyika yeEgipite ndisati ndauya kwouri muEgipite, ngevangu; Efuremu naManase vanozoita vangu kudai ndiRubheni naSimeoni ngevangu.

⁶ Nevana vounozobara ngesure kwavo, vanozoita vako; vanozodaidzwa ngezina revakoma vavo mukati mwenhaka yavo.

⁷ Ngokuti inini, apo pendakauya kubva Padhana, Racheri wakafa mukutambudzika kwangu munyika yeKhenani, tiri murwendo, apo uchipo muhambo wokuguma Efrathi neni ndakamuikapo munjira yokuenda Efrathi,’ ” (ndiro Bhetherehema.)

⁸ Naapo Isuraeri paakaona vakororo vaJosefa, wakati, “Ndiani ava?”

⁹ Josefa wakati kunababa ake, “Ndivo vakororo vangu, vaakandipa Mwari uno.” Wakati, “Ndapota, vaunze kwendiri, kuti ndivafumise.”

¹⁰ Zvino madziso aIsuraeri aiya aita mazweezwee ngousharuka, asikachakoni kuona. Ndizvo Josefa wakavakwedzedza kwaari; akavachingamidza ngomuromo nokuvafungatira.

¹¹ Isuraeri wakati kunaJosefa, “Andizi kupinimidza kuti ndichazoona hope yako. Wona, Mwari wakanditendera kuti ndionewo rudzi rwako.”

¹² Josefa wakavabvisa kubva pakati pemabvi aJakobe; wakakotamisa hope yake pashi pamavhu.

¹³ Josefa wakavatora veshe, Efuremu ari munyara yake yokumudyo kumuisa kunyara yokumuoshwe yaIsuraeri, naManase ari munyara yake yokumuoshwe kumuisa kunyara yokumudyo yaIsuraeri, akavakwedzedza kwaari.

¹⁴ Isuraeri wakatambanudza nyara yake yokumudyo, akaiisa padera pesoro raEfuremu uwo waiya mudoko, nenyara yake yokumuoshwe padera pesoro raManase, echichinjikisa nyara dzake echizia; ngokuti Manase ndiye waiya dangwe.

¹⁵ Naye wakafumisa Josefa, akati, “Mwari uwo madzibaba angu akahamba pamberi pake madzibaba angu Abrahama naIsaka. Mwari uwo waiya Muushi wangu mukupona kwangu kweshe metsa nyamashi,

¹⁶ ngirosi iyo yakandinunurira kubva mukushata kweshe, ngaifumise varumbwana ava; nezina rangu ngaritumidzwe padera pavo, nemazina emadzibaba angu Abrahama naIsaka; ngavakure vawande kakurutu panyika.”

¹⁷ Naapo Josefa aona kuti baba ake vakaisa nyara yavo yokumudyo padera pesoro raEfuremu, azvizi kumudakadza; naye wakabvisa nyara yababa ake kubva pasoro raEfuremu kuiisa pasoro raManase.

¹⁸ Josefa wakati kunababa ake, “Haiwa kudaro, baba angu; nokuti uyu ndiye dangwe; isa nyara yenyu yokumudyo padera pesoro rake.”

¹⁹ Baba ake vakaramba, vakati, “Ndinozia, mukororo wangu, ndinozia; iye naye unozoita dzinza, iye nayewo unozoita mukuru; munun'una wake unozoita mukuru kupinda iye, norudzi rwake runozoita madzinza akawandisa.”

²⁰ Wakavafumisa ngeiro zuva echiti, “Kubudikidza ndiwe vaIsuraeri vachafumisa vechiti, ‘Mwari ngaakuite kudai ndiEfuremu naManase;’ ” naye wakaisa Efuremu ngepamberi paManase.

²¹ Naapo Isuraeri wakati kunaJosefa, “Wona, inini ndaa kuda kufa, asi Mwari unozoa nemwi nokumuhwirinzazve kunyika yamadzibaba enyu.

²² Nepadera peizvi ndapa kwouri chikoaniswa chimwe kupinda vana vababa ako, bandaanda romutunhu rendakatora kubva kunyara yevaAmori ngeshoti yangu nouta hwangu.”