Gen. 46 - Bhaibheri Rakachena muChindau

Jakobe neMhuri yake Vanoenda Egipite

¹ Isuraeri wakahamba rwendo rwake, nazvo zveshe zvaaiya nazvo, wakaguma Bheeri-shebha, wakapira mibairo kunaMwari wababa ake Isaka.

² Mwari wakaereketa kunaIsuraeri ngezvioniso usiku, akati, “Jakobe, Jakobe.” Iye wakati, “Ndiri pano.”

³ Wakati, “Ndini Mwari, Mwari wababa ako, usatya kudzaka Egipite; ngokuti ndinozokuiteyo dzinza guru.

⁴ Ndinozodzaka newe muEgipite, ngegwinyiso ndinozokuunzazve uno; nyara yaJosefa inozokonya madziso ako.”

⁵ Jakobe wakamiruka kuenda kubva Bheeri-shebha; vakororo vaIsuraeri vakatwara Jakobe baba avo, vadoko vavo nevakadzi vavo, mungoro dzaakatumira Faro kumutwara.

⁶ Vakatora zvifuyo zvavo nezvidziyo zvavo, zvevakaona munyika yeKhenani, vakauya Egipite, Jakobe norudzi rwake rweshe,

⁷ vakororo vake nevana vevakororo vake pamwepo naye, nevanasikana vake nevanasikana vevakororo vake; norudzi rwake rweshe wakauya narwo muEgipite.

⁸ Aya ndiwo mazina evana vaIsuraeri avo vakauya Egipite, Jakobe nevakororo vake. Rubheni, dangwe raJakobe,

⁹ nevakororo vaRubheni vaiya Hanokhi, Paru, Hezironi, naKhami.

¹⁰ Vakororo vaSimeoni vaiya Jemueri, Jamini, Ohadhi, Jakhini, Zoha naShauri, mukororo womukadzi womuKhenani.

¹¹ Vakororo vaRevhi vaiya Gershoni, Kohathi naMerari.

¹² Vakororo vaJudha vaiya Eri, Onani, Shera, Pherizi naZera (asi Eri naOnani vakafa vachiri munyika yeKhenani). Vakororo vaPherizi vaiya Hezironi naHamuri.

¹³ Vakororo vaIsakha vaiya Tora, Puvha, Jashubhi naShimuroni.

¹⁴ Vakororo vaZebhuruni vaiya Seredhi, Eroni naJahireeri.

¹⁵ Ava vakororo vaRea, vaakabarira Jakobe muPadhana-aramu, nomwanasikana wake Dhaina; pamwepo vakororo nevanasikana vake veshe vaiya vanhu makumi matatu navatatu (33).

¹⁶ Vakororo vaGadhi vaiya Zifioni, Hagi, Shuni, Ezibhoni, Eri, Arodhi naAreri.

¹⁷ Vakororo vaAsha vaiya Jimina, Ishivha, Ishivhi, Bheria naSera, mukunda wavo. Vakororo vaBheria vaiya Hebha naMarikhieri.

¹⁸ Vakororo vaZiripha vaiya ava vaakapa Rabhani kunaRea mwanasikana wake; ava ndivo vaakamubarira Jakobe vana gumi navatanhatu (16).

¹⁹ Vakororo vaRacheri mukadzi waJakobe vaiya Josefa naBhenjamini.

²⁰ Josefa wakabarirwa Manase naEfuremu munyika yeEgipite ndiAsenathi mwanasikana waPotifera mupristi waOni.

²¹ Vakororo vaBhenjamini vaiya Bhera, Bhekheri, Ashibheri, Gera, Naamani, Ehi, Roshi, Muphimi, Huphimi naAdhi.

²² Ava ndivo vakororo vaRacheri, vaakabarira Jakobe. Veshe vanhu vaiya gumi navarongomuna (14).

²³ Mukororo waDhani waiya Hushimu.

²⁴ Vakororo vaNafitari vaiya Jahizeeri, Guni, Jeza naShiremu.

²⁵ Ava vakororo vaBhiriha, uwo waakapa Rabhani kunaRacheri mwanasikana wake, avo vaakabarira Jakobe vanhu veshe vaiya vanomwe.

²⁶ Vanhu veshe vaJakobe vaakauya navo muEgipite, avo vaiya mibarirwana yaJakobe vasikaerengi vakadzi vevakororo vaJakobe, veshe vaiya makumi matanhatu navatanhatu (66).

²⁷ Vakororo vaJosefa vaakabarirwa muEgipite vaiya vanhu vairi; vanhu veshe vemhatso yaJakobe avo vakauya muEgipite vaiya makumi manomwe (70).

Jakobe neMhuri yake muEgipite

²⁸ Wakatuma Judha pamberi pake kunaJosefa, kuti amutungamirire njira yokuenda Gosheni; navo vakaguma munyika yeGosheni.

²⁹ Naapo Josefa wakanasirira ngoro yake, akakwira kuenda Gosheni kooshongana naIsuraeri baba ake; akadzionisa kwaari, akamukumbatira pamutsipa wake, akachema ari pamutsipa wake mukuwo wakatikuti.

³⁰ Isuraeri wakati kunaJosefa, “Zvino, ngandichifa, ngokuti ndaiona hope yako, ndikazia kuti uchapona.”

³¹ Josefa wakati kuvana vababa ake nokune vemhatso yababa ake, “Ndinozokwira, ndironzere Faro ndechiti kwaari, ‘Vaguma kwendiri vana vababa angu nevemhatso yababa angu, avo vaigara munyika yeKhenani.

³² Vamuna ava vaushi, ngokuti vaiusha zvifuyo; navo vakaunza zvifuyo zvavo nemihlambi yavo nazvo zveshe zvevanazvo.’

³³ Naapo Faro amudaidza echiti, ‘Mushando wenyu ngowenyi?’

³⁴ Munozoti, ‘Mushando wevaranda vako ngowokuusha n'ombe kubvira paudoko hwedu metsa nazvino, isusu teshe nemadzibaba edu,’ kuitira kuti mugare munyika yeGosheni; ngokuti muushi weshe chinyangadzo kune vaEgipite.”