Gen. 45 - Bhaibheri Rakachena muChindau

Josefa Unodziziisa kuVakoma vake

¹ Zvino Josefa waiya asikachakoni kudzibata pamberi pavo veshe vaiema pasinde pake; wakadaidzira echiti, “Budisai munhu weshe kubva kwendiri.” Ndizvo apana naumwe wakaema naye apo Josefa paakadziziisa kuvakoma vake.

² Wakachema kakurutu; vaEgipite vakazwa, nevemhatso yaFaro vakazvizwa.

³ Josefa wakati kuvakoma vake, “Ndini Josefa; baba angu vachapona here?” Asi vakoma vake avazi kukona kumupingura, ngokuti vakatyiswa ngokuapo kwake.

⁴ Ndizvo Josefa wakati kuvakoma vake, “Ndapota, kwedzerai kwendiri.” Navo vakakwedzera. Wakati, “Ndini Josefa munun'una wenyu womwakatengesa kuEgipite.

⁵ Zvino musatambudzika nokuti kudzishoora, ngokuti mwakanditengesa uno; ngokuti Mwari wakandituma ngepamberi penyu kuti ndiponese ndaramo.

⁶ Ngokuti nzara yaapo panyika makore aya mairi, achipo makore mashanu umwo mwevasikazorimi nokuti kukukura.

⁷ Mwari wakandituma ngepamberi penyu kuti ndimungwarire muite vanosara panyika, nokuponesa vazhinji ngokusunhurwa kukuru.

⁸ Ndizvo zvino, andimwipi mwakandituma uno, asi ndiMwari; ndiye wakandiita baba kunaFaro, namambo wevemhatso yake yeshe, nomutongi wenyika yeshe yeEgipite.

⁹ Kasirai mukwire kunababa angu, mwechiti kwavari, ‘Izvi ndizvo zvinoronza mukororo wenyu Josefa, Mwari wakandiita mambo weEgipite reshe; dzakai kwendiri, musanonoka.

¹⁰ Munozogara munyika yeGosheni, iri pasinde pangu, imwimwi nevana venyu, nevana vevana venyu, nezvifuyo zvenyu nemihlambi yenyu nazvo zveshe zvomunazvo.

¹¹ Ndinozomungwarira, ngokuti achipo makore mashanu enzara; kuti imwimwi nemhuri yenyu, nazvo zveshe zvomunazvo musazogumirwa ngourombo.’

¹² Zvino madziso enyu anoona, namadziso omunun'una wangu Bhenjamini anoona, kuti muromo wangu unoereketa nemwi.

¹³ Munozovaronzera baba angu ngoukuru hwangu hweshe muEgipite, nazvo zveshe zvemwakaona. Mukasire kuvadzasa baba angu uno.”

¹⁴ Wakawira pamutsipa waBhenjamini munun'una wake, akachema; naBhenjamini wakachema ari pamutsipa wake.

¹⁵ Naapo echichema, wakachingamidzazve vakoma vake veshe ngomuromo, ngesure kweizvi vakoma vake vakaereketa naye.

¹⁶ Naapo mbiri yazvo yakazwika mungome yaFaro kuti vakoma vaJosefa vaguma, zvakanasa kudakadza Faro nevaranda vake.

¹⁷ Faro wakati kunaJosefa, “Wechironzera kuvakoma vako wechiti, ‘Itai izvi: twarisai mbongoro dzenyu, mupetuke kunyika yeKhenani;

¹⁸ mutore baba enyu nemhuri dzenyu muuye kwendiri. Ndinozomupa zvakapinda kunaka zvenyika yeEgipite, nemwi munozodya zvakanuna zvenyika.’

¹⁹ Vapangezve, ‘Itai izvi: torerai vana venyu nevakadzi venyu ngoro kubva muno munyika yeEgipite, mutore baba enyu, muuye.

²⁰ Musapinimidza ngezviro zvenyu; ngokuti kunaka kwenyika yeshe yeEgipite ngokwenyu.’ ”

²¹ Vakororo vaIsuraeri vakaita kudaro. Josefa wakavapa ngoro, kudai ngezvaakapangwa ndiFaro, naye wakavapa mbuva yomunjira.

²² Wakavapa veshe umwe ngaumwe zvipani zvokusimira; asi wakapa kunaBhenjamini zvigurwa zvesirivha mazana matatu, nezvokusimira zvipani zvishanu.

²³ Wakatumirazve kunababa ake izvi: mbongoro gumi dzakatwariswa zviro zvakanaka zveEgipite, nembongoro dzehadzi gumi dzakatwariswa zviyo nezvingwa nezvokudya kuita mbuva yababa ake munjira.

²⁴ Ndizvo wakatuma vakoma vake, naapo vechienda wakati kwavari, “Ngwarai kuti musazotukana munjira.”

²⁵ Ndizvo vakakwira kubva Egipite, vakaguma munyika yeKhenani kunababa avo Jakobe.

²⁶ Vakavaronzera vechiti, “Josefa uchapona, ndiye mutongi wenyika yeshe yeEgipite.” Mwoyo waJakobe wakapera simba, ngokuti aazi kuvagonda.

²⁷ Asi apo vavaronzera mazwi eshe aJosefa, aakaereketa kwavari, naapo aona ngoro dzaakatumira Josefa kuvatwara, mweya waJakobe baba avo wakamusirirwa.

²⁸ Isuraeri wakati, “Zvakwana; Josefa mukororo wangu uchapona; inini ndinozoenda ndimuone ndisati ndafa.”