Gen. 44 - Bhaibheri Rakachena muChindau

Kungarangaka kweTsani

¹ Wakapanga mungwariri wemhatso yake echiti, “Zadza masaka evamuna ava ngezvokudya, kudai ngokwavanokona kutwara, uise mare yomunhu weshe mumuromo wesaka rake.

² Uise tsani yangu, tsani yesirivha, mumuromo wesaka romudoko, nemare yomutengo wezviyo zvake.” Iye wakaita kudai ngeizwi raakaereketa Josefa.

³ Ngokukasira kwaedza vamuna vakatenderwa kuenda, ivo nembongoro dzavo.

⁴ Naapo vaiya vabuda kubva mudhorobha, vasati vaakuretu, Josefa wakati kune mungwariri wemhatso yake, “Miruka, uteere vamuna avo; naapo wavabata, wechiti kwavari, ‘Mwaunzidzira ngenyi zvakanaka ngezvakashata?

⁵ Ichi andichopi here chaanomwa ndicho mambo wangu nokufembera ndicho? Ngegwinyiso mwaita zvakashata ngokuita kudaro.’ ”

⁶ Avabata, wakaereketa kwavari aya mazwi.

⁷ Vakati kwaari, “Mambo wedu unoereketa ngenyi mazwi akadai? Mwari asatenda kuti varanda vako vaite chiro chakadaro!

⁸ Ringira, mare yetakaona iri mumiromo yemasaka edu, takaiunzazve kwouri kubva kunyika yeKhenani; ndizvo tingaita mabirenyi sirivha nokuti mukore mumhatso yamambo wako?

⁹ Kunyazwi ndiani wevaranda vako weinozooneka anayo, ngaafe, nesuzve tinozoita hloko dzamambo wedu.”

¹⁰ Wakati, “Ngakuitikezve kudai ngemazwi enyu; uwo weinozooneka anayo, unozoita hloko yangu; imwimwi mweshe munozoita vasina ndaa.”

¹¹ Naapo munhu weshe wakakasira kutura saka rake pamavhu, munhu weshe wakabeura saka rake.

¹² Wakatsvakisisa, wakatanga ngokumukuru, akapedzisira ngokumudoko, tsani yakaoneka musaka raBhenjamini.

¹³ Naapo vakabaura zvokusimira zvavo, munhu weshe akatwarisa mbongoro yake, vakahwirira kudhorobha.

¹⁴ Naapo Judha nehama dzake vakauya kumhatso yaJosefa; ngokuti waiya achipo; navo vakawa pashi pamberi pake.

¹⁵ Josefa wakati kwavari, “Chiinyi ichi chemwaita? Amuzii here kuti munhu wakadai ndini unokona ngegwinyiso kufembera?”

¹⁶ Judha wakati, “Tingachatinyi kunamambo wangu? Tingachaereketenyi? Tingachadzipembedza ngokuitawani? Mwari waonisa kushata kwevaranda vako; wona, taa hloko dzamambo wedu, teshe isusu nouwo weyaoneka kwaari tsani.”

¹⁷ Wakati, “Mwari asatenda kuti ndiite kudaro! Munhu uwo weyaoneka kwaari tsani, iye unozoita hloko yangu; asi imwimwi kwirai muende mukunyarara kunababa enyu.”

Judha Unopota Josefa ngendaa yaBhenjamini

¹⁸ Naapo Judha wakakwedzera kwaari, akati, “A mambo wangu, ndapota, tendera muranda wako kuti aerekete izwi mukuzwa kwamambo wangu, husazobaka ushungu hwako kuno muranda wako, ngokuti iwewe wakandodai ndiFaro emene.

¹⁹ Mambo wangu wakabvunza varanda vake echiti, ‘Muna baba here nokuti munun'una?’

²⁰ Nesu takati kunamambo wangu, ‘Tina baba, harahwa, nomwana wousharuka hwake, mudoko; nomukoma wake wakafa, ndiye ega wasara mwana wamai ake, nababa ake vanomuda.’

²¹ Newe wakaronzera varanda vako wechiti, ‘Mudzasenyi kwendiri, kuti ndimuone ngemadziso angu.’

²² Isusu takati kunamambo wangu, ‘Murumbwana aangasii baba ake, ngokuti kudai echizosiya baba ake, baba ake vangafa.’

²³ Newe wakati kuvaranda vako, ‘Kudai asikadzaki nemwi munun'una wenyu mudoko, amutongozooni hope yangu.’

²⁴ “Naapo takakwira kuno muranda wako baba angu, takavaronzera mazwi amambo wangu.

²⁵ Baba edu vakati, ‘Endaizve, mutitengere kudya kushomani.’

²⁶ Isusu takati, ‘Atikoni kudzakeyo, kwega kuti munun'una wedu mudoko aende nesu, naapo tinozodzaka; ngokuti atizokoni kuona hope yomunhuwo, kwega kuti munun'una wedu mudoko anesu.’

²⁷ Naapo muranda wako baba edu vakati kwetiri, ‘Munozia kuti mukadzi wangu wakandibarira vakororo vairi;

²⁸ umwe wavo wakabuda kubva kwendiri, neni ndakati, ngegwinyiso wakabvajurwa kuita zvigurwa; andizi kuchazomuonazve.

²⁹ Kudai mwechitora uyuzve kubva kwendiri, nechakashata chechizomugumira, munozodzasa bvudzi rangu rinemvi kuiba ngokusvipa mwoyo.’

³⁰ “Ndizvo zvino, apo pendinozoguma kunomuranda wako baba edu, nomurumbwana asipo nesu, ngokuti kupona kwavo kwakasungwa pamwepo nokupona kwomurumbwana,

³¹ naapo paanoona kuti murumbwana aasiripo akadi nesu, vanozofa; nevaranda vako vanozodzasa bvudzi rinemvi romuranda wako baba edu muiba ngokusvipa mwoyo.

³² Ngokuti muranda wako wakaita chibatiso chomurumbwana kunababa edu ndechiti, ‘Kudai ndisikazomupetudzi kwouri, naapo ndinozoane ndaa kunababa edu mhera nariini.’

³³ Ndizvo zvino, ndapota, tendera kuti muranda wako asare pandau yomurumbwana kuita hloko kunamambo wangu; murumbwana akwire kuenda nevakoma vake.

³⁴ Ngokuti ndingazoita makwirirenyi kunababa angu, murumbwana asiripo neni? Ndinotya kuzoona kushata kunozowira padera pababa angu.”