Gen. 43 - Bhaibheri Rakachena muChindau

Vakoma vaJosefa Vanoenda Egipite naBhenjamini

¹ Nzara yaiya yashata munyika.

² Naapo vadya zviyo zvevaiya vaunza kubva Egipite, baba avo vakati kwavari, “Endaizve, mutitengere kudya kushomani.”

³ Judha wakaereketa navo echiti, “Munhuwo wakagwinyisisa kutironzera echiti, ‘Amutongozooni hope yangu, kwega kuti munun'una wenyu anemwi.’

⁴ Kudai mwechizotuma munun'una wedu nesu, tinozodzaka, timutengere kudya;

⁵ asi kudai musikazomutumi, atizodzakiyo, ngokuti munhuwo wakati kwetiri, ‘Amutongozooni hope yangu, kwega kuti munun'una wenyu anemwi.’ ”

⁶ Isuraeri wakati, “Mwakandiitira zvakashata kudaro ngenyi kuronzera munhuwo kuti muno munun'una umweni?”

⁷ Vakati, “Munhuwo wakatibvunzisisa ngokugara kwedu nendaa yehama dzedu echiti, ‘Baba enyu vachapona here? Muno munun'una umweni here?’ Nesu takamuronzera kudai ngaaya mazwi mukupingura mibvunzo iyi. Taizoita maziirenyi kuti unozoti, ‘Dzakai nomunun'una wenyu?’ ”

⁸ Judha wakati kunaIsuraeri baba ake, “Tuma murumbwana neni, nesu tinozomiruka tiende; kuti tipone, tisafa, teshe isusu nemwi nevadoko vedu.

⁹ Inini ndinozoita chibatiso chake; munozobvunza munyara dzangu kudai ndisikamuunzi kwomuri, ndimuise pamberi penyu, ngandiane ndaa yemhera nariini.

¹⁰ Ngokuti, dai tisikazi kunonoka, ngegwinyiso zvino taizodai tauya kwechipiri.”

¹¹ Baba avo Isuraeri vakati kwavari, “Kuti zvakadaro, zvino itai izvi; torai michero yakapinda kunaka yomunyika muzvidziyo zvenyu, mudzake mwakatwara kuita chipo kumunhuwo, makha mashomani nezviuchi zvishomani zvinonuhwira nemhura nemichero yomupistakhio nemaarimondi.

¹² Mutore munyara dzenyu mare yakahwirinzirwa kairi; nemare iyo yakapetudzwa mumiromo yemasaka enyu, hwirirai nayo iri munyara dzenyu; pamweni kwaiya kukangaidzwa.

¹³ Mutorezve munun'una wenyu, mumiruke, muendezve kunomunhuwo.

¹⁴ Mwari Unesimba-reshe ngaamuitire nyasha pamberi pomunhuwo, kuti amusunungurire hama yenyu umweni naBhenjamini. Kudai ndanyapedzerwa vana vangu, ndatopedzerwa.”

¹⁵ Vamuna avo vakatora icho chipo, vakatora mare yakahwirinzirwa kairi munyara mwavo, naBhenjamini; vakamiruka, vakadzaka Egipite, vakaema pamberi paJosefa.

¹⁶ Naapo Josefa aona Bhenjamini anavo, wakati kune mungwariri wemhatso yake, “Unza ava vamuna mumhatso, uuraye mhuka, unasirire; ngokuti ava vamuna vanozodya neni masikati.”

¹⁷ Nomunhuwo wakaita kudai ngezvaakaronza Josefa; munhuwo akapotedza avo vamuna mumhatso mwaJosefa.

¹⁸ Vamuna vakatya ngokuti vakapotedzwa mumhatso mwaJosefa navo vakati, “Tapotedzwa muno ngendaa yemare yakahwirinzwa mumasaka edu ngomukuwo wokutanga; kuti atsvake chokutiitira ndaa ndicho, atipambe, atitore kuita hloko nembongoro dzedu.”

¹⁹ Vakakwedzera kune mungwariri wemhatso yaJosefa, vakaereketa naye vari pamusiwo wemhatso,

²⁰ vakati, “A mambo wedu, ngegwinyiso takadzaka ngomukuwo wokutanga kootenga kudya;

²¹ naapo taguma kundau petakaata, takabeura masaka edu, takaona kuti mare yomunhu weshe yaiya mumuromo wesaka rake, mare yedu ngouremu hwayo hweshe. Nesu taiunzazve munyara dzedu.

²² Nesu tadzaka nemare imweni munyara dzedu yokutenga ndiyo zvokudya. Atizii kuti ndiani wakaisa mare yedu mumasaka edu.”

²³ Wakati, “Kunyarara ngakugare kwomuri, musatya; Mwari wenyu, Mwari wababa enyu, ndiye wakamupa upfumi mumasaka enyu; ndini ndakaashira mare yenyu.” Naapo wakabudisa Simeoni kwavari.

²⁴ Naapo munhuwo aunza vamuna avo mumhatso yaJosefa, wakavapa mvura, vakashamba tsoka dzavo; akapa mbongoro dzavo zvokudya.

²⁵ Vakanasirira chipo kuti vachipe Josefa apo ouya masikati, ngokuti vakazwa kuti vanozodyapo chingwa.

²⁶ Naapo Josefa auya mumhatso, vakamuunzira chipo chaiya munyara dzavo, vakapinda mumhatso, vakadzikotamisa pashi pamberi pake.

²⁷ Wakabvunza ngokutamba kwavo, akati, “Baba enyu vanotamba here, harahwa yomwakaereketa ndiyo? Ichapona here?”

²⁸ Vakapingura vechiti, “Muranda wako, baba edu vanotamba, vachapona.” Vakagwadama, vakakotamisa masoro avo pamberi pake.

²⁹ Wakamirudza madziso ake, akaona munun'una wake Bhenjamini, mukororo wamai ake, wakati, “Uyu ndiye here munun'una wenyu womwakaereketa ndiye kwendiri?” Wakati, “Mwari ngaakuitire nyasha, mukororo wangu!”

³⁰ Josefa wakakasira, ngokuti mweya wake waishuwira munun'una wake, wakatsvaka pokuchemera; wakapotera mukamera rake, akachemeremwo.

³¹ Wakashamba hope yake, akabudazve; akadzinyaradza, akati, “Burai kudya.”

³² Vakaisa kwake ari ega, nokwavo vari vega, nokwavaEgipite vakadya naye vari vega; ngokuti vaEgipite avangadyi kudya nevaHebheru, ngokuti icho chinyangadzo kuvaEgipite.

³³ Vakagariswa pamberi pake, dangwe kudai ngoutangwe hwaro, nechigumisirwa kudai ngouchigumisirwa hwacho nevamuna vakaringira umwe noumweni mukushamiswa.

³⁴ Wakavakoanisira tsima kubva pamberi pake, asi tsima yaBhenjamini yakahwirinzirwa kashanu kune dzavo veshe. Vakamwa, vakadakara naye.