Gen. 42 - Bhaibheri Rakachena muChindau

Vakoma vaJosefa Vanoenda Egipite Kootenga Zvokudya

¹ Zvino Jakobe azia kuti kune zviyo muEgipite, wakati kuvakororo vake, “Munoringirana ngenyi?”

² Wakati, “Ringirai, ndakazwa kuti zviripo zviyo muEgipite; dzakaiyo, mwootitengereyo zviyo, kuti tipone, tisafa.”

³ Ndizvo vakoma vaJosefa gumi vakadzaka Egipite kootenga zviyo.

⁴ Asi Jakobe aazi kutuma Bhenjamini, munun'una waJosefa, nevakoma vake, ngokuti waitya kuti pamweni ungagumirwa ngezvakashata.

⁵ Vakororo vaIsuraeri vakauya kootenga zviyo pakati pevamweni avo vakauya, ngokuti nzara yaiya yashata munyika yeKhenani.

⁶ Josefa waiya mutongi padera penyika, ngokuti ndiye waitengisira vanhu veshe venyika. Vakoma vaJosefa vakauya, vakadzikotamisa pashi pamberi pake nehope dzavo pamavhu.

⁷ Josefa wakaona vakoma vake, akavazia, asi wakavabata kudai ngevapara nokuereketa kwavari ngoushungu. Wakati kwavari, “Munobva kuri?” Vakati, “Tabva kunyika yeKhenani, tauya kuti titenge kudya.”

⁸ Josefa wakazia vakoma vake, asi ivo avazi kumuzia.

⁹ Josefa wakakarakadza hope dzaakarota ndivo; akati kwavari, “Muri vanengeri; mwauya koona pakarembedzeka nyika.”

¹⁰ Vakati kwaari, “Haiwa, mambo wedu, asi varanda vako vauya kootenga kudya.

¹¹ Isusu teshe tiri vakororo vomunhu umwe; tiri vanhu vegwinyiso, varanda vako avari vanengeripi.”

¹² Wakati kwavari, “Haiwa, asi mwauya kuti muone kurembedzeka kwenyika.”

¹³ Vakati, “Isusu varanda vako, tiri gumi navairi, vakororo vomunhu umwe munyika yeKhenani; ringirai, wokugumisira nyamashi uri kunababa edu noumweni apachina.”

¹⁴ Josefa wakati kwavari, “Ndizvo zvendaereketa kwomuri ndechiti, ‘Muri vanengeri.’

¹⁵ Munozoedzwa ngeichi: ngokupona kwaFaro, amutongozobvi pano, kwega kuti munun'una wenyu mudoko auya pano.

¹⁶ Tumai umwe wenyu, atore munun'una wenyu, nemwi munozosungwa kuti mazwi enyu aedzwe, kuti aoneke kuti muri vegwinyiso; kuti kusikazi kudaro, ngokupona kwaFaro ngegwinyiso muri vanengeri.”

¹⁷ Wakavaisa veshe pamwepo mutirongo mazuva matatu.

¹⁸ Ngezuva rechitatu Josefa wakati kwavari, “Itai ichi, mupone; ngokuti ndinomutya Mwari.

¹⁹ Kuti muri vanhu vegwinyiso, umwe wevanun'una venyu ngaasare akasungwa mutirongo mwenyu; asi imwimwi mweshe endai, mutware zviyo ngendaa yenzara yomumhatso dzenyu,

²⁰ muunze kwendiri munun'una wenyu mudoko; ngokudaro mazwi enyu anozogwinyiswa, nemwi amuzofi.” Vakaita kudaro.

²¹ Vakati umwe kunoumweni, “Ngegwinyiso tine ndaa yomunun'una wedu, ngokuti takaona kutambudzika kwomwoyo wake, apo paakatipota, nesu atizi kupurutana; ndizvo uku kutambudzika kwatigumira.”

²² Rubheni wakavapingura echiti, “Andizi kumuronzera here kuti musashaishira murumbwana? Asi amuzi kupurutana. Ndizvo, wonai, tinotambudzwa ngendaa yengazi yake.”

²³ Avazi kuzia kuti Josefa waivazwa, ngokuti wakaereketa kwavari ngomukumuchi.

²⁴ Wakakunukuka kubva kwavari, akachema; wakahwirira kwavarizve, akaereketa navo, akatora Simeoni kubva pakati pavo, akamusunga mukuona kwavo.

Vakoma vaJosefa Vanopetuka Khenani

²⁵ Naapo Josefa wakapanga kuti masaka avo azadzwe ngezviyo, nokuhwirinza mare yomunhu weshe musaka rake, nokuvapa mbuva yomuhambo wavo. Izvi zvakaitwa kudaro kwavari.

²⁶ Vakatwikisa mbongoro zviyo zvavo, vakabvapo.

²⁷ Naapo umwe wavo paakabeura saka rake kuti ape mbongoro yake kudya pandau pevakaata, wakaona mare yake pamuromo wesaka rake;

²⁸ akati kuhama dzake, “Mare yangu yahwirinzwa, iyi iri pamuromo wesaka rangu!” Nomwoyo yavo yakademera. Vakaringirana vechihuta, vechiti umwe kunoumweni, “Chiinyi ichi chaaita Mwari kwetiri?”

²⁹ Naapo vakaguma kunaJakobe baba avo munyika yeKhenani, vakavaronzera zveshe zvakavagumira vechiti,

³⁰ “Munhu uwo, mambo wenyika, wakaereketa ngoushungu kwetiri, akatierenga kuti tiri vanengeri venyika.

³¹ Takati kwaari, ‘Tiri vanhu vegwinyiso, atiri vanengeripi.

³² Tiri gumi navairi, vakororo vababa edu; umwe apachina, nowokugumisira nyamashi uno uri kunababa edu munyika yeKhenani.’

³³ Zvino munhu, mambo wenyika, wakati kwetiri, ‘Ngeichi ndinozozia kuti muri vanhu vegwinyiso; siyai umwe wehama dzenyu neni, mutore zviyo ngendaa yenzara yomumhatso dzenyu, muende.

³⁴ Muunze munun'una wenyu wokugumisira kwendiri; naapo ndinozozia kuti amuri vanengeripi, asi kuti muri vanhu vegwinyiso. Ndizvo ndinozomupa hama yenyu, nemwi munozotenga munyika.’ ”

³⁵ Zvino vachadurura masaka avo, munhu weshe wakaona butwa remare raiya musaka rake; naapo ivo nababa avo vaona maputwa avo emare, vakatyiswa.

³⁶ Jakobe baba avo wakati kwavari, “Mwandipedzera vana vangu, Josefa apachina, Simeoni apachina, nemwi mwoda kutora Bhenjamini. Zveshe izvi zvinondikonzera!”

³⁷ Rubheni wakaereketa kunababa ake echiti, “Munozouraya vakororo vangu vairi, kuti ndisamuunza kwomuri. Muisenyi munyara dzangu, neni ndinozomuunzazve kwomuri.”

³⁸ Wakati, “Mukororo wangu aazoendiyo nemwi; ngokuti mukoma wake wakafa, ndiye ega wasara. Kudai chakashata chechimugumira munjira yomunozohamba ndiyo, naapo munozodzasa bvudzi rangu rinemvi muiba mukusvipa mwoyo.”