Gen. 41 - Bhaibheri Rakachena muChindau

Josefa Unodudzira Hope dzaMambo

¹ Ngesure kwemakore mairi akazara apera, Faro wakarota hope: akaema parwizi,

² wakaona kwechibuda kubva murwizi n'ombe nomwe dzakanaka dzakakora, dzikafura mutsanga.

³ Wakaonazve, n'ombe dzimweni nomwe dzakavhiririka, dzakaonda dzakabuda murwizi ngesure kwadzo, dzikaema pasinde pen'ombe dzimweni nomwe pahumbikumbi yorwizi.

⁴ N'ombe dzakavhiririka dzakaonda dzakadya n'ombe nomwe dzakanaka dzakakora. Naapo Faro wakamuka.

⁵ Wakaata, akarota ngokwechipiri: akaona, mitsonzoti minomwe yekoroni yakatumbuka paguri rimwe, yakakura yakanaka.

⁶ Wakaona, mitsonzoti minomwe yakatetepa, yakafota ngedutu rokumabvazuva yakabuda ngesure kwayo.

⁷ Mitsonzoti yakatetepa yakadya mitsonzoti minomwe yakakura, yakazara. Faro wakamuka, akaona kuti kwaiya kurota.

⁸ Zvino mumangwanani mweya wake wakatambudzika; wakatuma vanhu koodaidza n'anga dzeshe dzeEgipite nevanhu veshe vakangwara. Faro wakavaronzera kurota kwake, asi paiya pasina waikona kudzidudzira kunaFaro.

⁹ Naapo mukuru wevabati vezvidziyo wakaereketa kunaFaro echiti, “Ndinokarakadza nyamashi kushaisha kwangu.

¹⁰ Naapo Faro paakatsenekera varanda vake, wakandipinza mutirongo mumhatso yenduna huru yevangwariri, inini nomukuru wevabiki.

¹¹ Takarota hope ngousiku humwehwo, inini naye; takarota umwe ngaumwe kudai ngokududzirwa kwokurota kwake.

¹² Waiyapo nesu mujaha, muHebheru, muranda wenduna huru yevangwariri; naapo tamuronzera, wakadudzira kwetiri kurota kwedu; wakadudzira kunomunhu umwe ngaumwe kudai ngokurota kwake.

¹³ Zvakaitika kudai ngokududzira kwake kwetiri, wakandihwirinza pamushando wangu, wakamuturika uwo mukuru wevabiki.”

¹⁴ Naapo Faro wakatuma munhu, akadaidza Josefa, vakakasira kumuunza kubva mutirongo, naapo akapara ndebvu dzake wadusa zvokusimira zvake, akadzisimidza zvimweni, wakapotera kunaFaro.

¹⁵ Faro wakati kunaJosefa, “Ndakarota hope, akuna naumwe unokona kudzidudzira; ndakazwa vechiti ndiwe, unoti apo wazwa hope, unokona kudzidudzira.”

¹⁶ Josefa wakapingura Faro echiti, “Andinipi; Mwari ndiye unozopa mupinguro wokunyarara kunaFaro.”

¹⁷ Faro wakati kunaJosefa, “Mukurota kwangu, ndakaona, ndakaema pahumbikumbi yomufuya Naeri.

¹⁸ Ndakaona, dzechibuda kubva murwizi n'ombe nomwe dzakakora dzakanaka; dzakafura mutsanga;

¹⁹ ndikaona, n'ombe dzimweni nomwe dzakabuda ngesure kwadzo, dzakashata dzakavhiririka, dzakaonda; andizi kumboona dzakadaro munyika yeshe yeEgipite.

²⁰ Nen'ombe dzakaonda, dzakavhiririka dzakadya n'ombe nomwe dzokutanga dzakakora.

²¹ Naapo dzadzidya, akuna naumwe waizozia kuti dzadzidya, ngokuti dzaiya dzichakavhiririka, kudai ngokutanga. Ndizvo ndakamuka.

²² Ndakaonazve mukurota kwangu, mitsonzoti minomwe yakatumbuka paguri rimwe, yakazara yakanaka;

²³ ndikaona, mitsonzoti minomwe yakafota, yakatetepa, yakapishwa ngedutu rokumabvazuva, yakabuda ngesure kwayo;

²⁴ nemitsonzoti yakatetepa yakadya mitsonzoti minomwe yakanaka. Neni ndakadzironzera n'anga; asi akuna waikona kudzidudzira kwendiri.”

²⁵ Zvino Josefa wakati kunaFaro, “Kurota kwaFaro ndikumwe; Mwari wakaonisa kunaFaro izvo zvaanoda kuita.

²⁶ N'ombe nomwe dzakanaka makore manomwe; nemitsonzoti minomwe yakanaka makore manomwe; kurota ndikumwe.

²⁷ Nen'ombe nomwe dzakaonda dzakavhiririka dzakabuda ngesure kwadzo makore manomwe, zve, nemitsonzoti minomwe isina chiro, yakapishwa ngedutu rokumabvazuva, inozoita makore manomwe enzara.

²⁸ Izvi ndizvo zvendaereketa kunaFaro; Mwari wakaonisa zvaanoda kuita kunaFaro.

²⁹ Kuchauya makore manomwe okuibva kukurutu munyika yeshe yeEgipite.

³⁰ Ngesure kwaawo kunozouya makore manomwe enzara, nokuibva kweshe kunozoriyarikanwa munyika yeEgipite; nenzara inozopedza nyika,

³¹ nokuibvisa akuzoziikanwi munyika ngendaa yenzara inozoteera, ngokuti inozoshata kakurutu.

³² Ngokuti kurota ukwo kwakahwirinzirwazve kunaFaro kairi ngokuti izvo zviro zvakaemeswa ndiMwari, naMwari unozokasira kuti zviitike.

³³ Ndizvo zvino Faro ngaatsvake munhu unozia nowakangwara, amuemese padera penyika yeEgipite.

³⁴ Faro ngaaite izvi, ngaaemesezve nduna padera penyika, atore rupande rwechishanu rwezviyo zvenyika yeEgipite pamakore manomwe okuibvisa.

³⁵ Ngavaunganidze kudya kweshe kwemakore aya akanaka anouya, vaunganidze koroni mumadhorobha pashi pesimba raFaro, kuita kudya kwemumadhorobha, vakungwarire.

³⁶ Nokudya ukwo kunozongwaririrwa makore manomwe enzara inozouya munyika yeEgipite, kuti nyika isazopera ngenzara.”

Josefa Unoizwa Mutongi Mukuru weEgipite

³⁷ Izvi zvaiya zvakanaka mukuona kwaFaro nomukuona kwavaranda vake veshe.

³⁸ Faro wakati kuvaranda vake, “Tingaona here munhu wakadai ngouyu, uwo uno Mweya waMwari mukati mwake?”

³⁹ Faro wakati kunaJosefa, “Ngokuti Mwari wakaonisa kwouri izvi zveshe, akuna unoruziyo noungwaru kudai ndiwe.

⁴⁰ Iwewe unozoita mukuru padera pemhatso yangu, vanhu vangu veshe vanozopurutana kupanga kwako. Kwega padendemaro inini ndinozoita mukuru kunewe.”

⁴¹ Faro wakati kunaJosefa, “Wona, ndakuemesa padera penyika yeshe yeEgipite.”

⁴² Faro wakadusa ndandazi yake kubva munyara yake, akaiisa munyara yaJosefa, akamupfekesa ngezvokusimira zvakanaka zvorukangaza, akaisa ketani yomukore muhuro mwake.

⁴³ Wakaita kuti agadhe mungoro yechipiri yaaiya nayo; vakadaidzira vari pamberi pake kuti, “Gwadamai!” Wakamuemesa kuita mutongi padera penyika yeshe yeEgipite.

⁴⁴ Faro wakati kunaJosefa, “Ndini Faro, ngokubanze kwokutenderwa ndiwe akuna munhu unozomirudza nyara yake nokuti rutsoka rwake munyika yeshe yeEgipite.”

⁴⁵ Faro wakadudza zina raJosefa kuti Zafenathi-panea; akamupa kuita mukadzi Asenathi mwanasikana waPotifera mupristi waOni. Josefa wakabuda, akahamba munyika yeshe yeEgipite.

⁴⁶ Josefa waiya nemakore makumi matatu apo paakapinda mushando waFaro mambo weEgipite. Josefa wakabuda kubva pamberi paFaro, akahamba munyika yeshe yeEgipite.

⁴⁷ Mumakore manomwe okuibvisa, nyika yakabudisa zvakawanda.

⁴⁸ Wakaunganidza kudya kweshe kwemakore manomwe apo kuchakawanda munyika yeEgipite, wakaunganidza kudya mumadhorobha; wakaunganidza mudhorobha reshe kudya kwaibva muminda yaitendenedza dhorobha rimwe ngarimwe.

⁴⁹ Josefa wakaunganidza koroni yakawanda kakurutu kudai ngejecha roruandhle, metsa wakarekera kuipima; ngokuti yaiya isikachapimiki.

⁵⁰ Gore renzara risati rasvika, Josefa wakabarirwa vakororo vairi ndiAsenathi mwanasikana waPotifera mupristi weOni.

⁵¹ Josefa wakadudza zina redangwe kuti Manase, ngokuti wakati, “Mwari wakaita kuti ndiriyarwe kweshe kutambudzika kwangu nemhatso yeshe yababa angu.”

⁵² Zina rowechipiri wakaridudza kuti Efuremu, ngokuti wakati, “Mwari wakaita kuti ndibare munyika yokutambudzika kwangu.”

⁵³ Makore manomwe okuibvisa aiya munyika yeEgipite akapera;

⁵⁴ nemakore manomwe enzara akatanga kuuya, kudai ngezvaakaronza Josefa; yakauya nzara munyika dzeshe; asi munyika yeshe yeEgipite chaiyapo chingwa.

⁵⁵ Naapo nyika yeshe yeEgipite yaiya yaa nenzara, vanhu vakachemera Faro, kuti vapuwe chingwa; naFaro wakati kuvaEgipite veshe, “Endai kunaJosefa; chaanoronza kwomuri, chiitei.”

⁵⁶ Naapo nzara yaiya yapararira padera penyika yeshe, Josefa wakabeura matura eshe, akatengisira vaEgipite, ngokuti nzara yaiya yashata munyika yeEgipite.

⁵⁷ Nyika dzeshe dzakauya muEgipite kunaJosefa kootenga zviyo, ngokuti nzara yaiya yashata munyika dzeshe.