Gen. 4 - Bhaibheri Rakachena muChindau

Kheni naAbhera

¹ Zvino Adhamu wakazia Evha mukadzi wake, naye wakaita mimba, akabara Kheni, wakati, “Ndabara munhu ndechidetserwa ndiMambo Mwari.”

² Zve, wakabara munun'una wake Abhera. Zvino Abhera waiya muushi wemakwai, asi Kheni waiya murimi wemavhu.

³ Ngesure kwomukuwo Kheni wakaunza michero yemavhu kuita mudiro kunaMambo Mwari,

⁴ naAbhera wakaunzawo dzematangwe omuhlambi emakwai ake nemafuta awo. Mambo Mwari wakaremeredza Abhera nomudiro wake,

⁵ asi aazi kuremeredza Kheni nomudiro wake. NaKheni wakatseneka kakurutu, nehope yake yakaonyana.

⁶ Mambo Mwari wakati kunaKheni, “Unotseneka ngenyi, nehope yako inoonyana ngenyi?

⁷ Kudai wechiita zvakanaka, ausaizoashirika here? Kudai usikaiti zvakanaka, chishaishi chinokuhwarira pamusiwo, nokudisisa kwacho ngekwokuda kutonga padera pako, asi iwewe unosisira kuchinyisa.”

⁸ Kheni wakaronza izvi kunaAbhera munun'una wake echiti, “Ngatiende mushango.” Naapo vaiya mushango Kheni wakamukira Abhera munun'una wake, akamuuraya.

⁹ Mambo Mwari wakati kunaKheni, “Uri pari Abhera munun'una wako?” Naye wakati, “Andizii, ndini mungwariri womunun'una wangu here?”

¹⁰ NaMambo Mwari wakati, “Waitenyi? Ngazi yomunun'una wako inondichemera yechibva muvhu kudai ngeizwi rinoda kuunzidzirwa.

¹¹ Nazvino iwewe watukwa kubva kumavhu awo akashama muromo wao kuashira ngazi yomunun'una wako kubva munyara yako.

¹² Apo wechirima ivhu arichazokuberekeri ngesimba raro, unozoita usina kanyi nomupepesheki munyika.”

¹³ Kheni wakati kunaMambo Mwari, “Kuororwa kwangu kunopinda ukwo kwendingakona kutwara.

¹⁴ Penya, wandidzinga nyamashi kubva panyika; ndinozofishika kubva kuhope yako; ndinozoita usina kanyi nomupepesheki munyika; kunozoitika kuti kunyazwi ndiani unozondiona, unozondiuraya.”

¹⁵ Mambo Mwari wakati kwaari, “Haiwa, andizvopi! Uwo unozouraya Kheni, kuunzidzirwa kunozouya padera pake kwakapetwa kanomwe.” Mambo Mwari wakaisa chioniso panaKheni, kuti uwo unomuona asazomuuraya.

¹⁶ Naapo Kheni wakabuda kubva pamberi paMambo Mwari, akagara munyika yeNodhi, ngokumabvazuva kweEdheni.

Mibarirwana yaKheni

¹⁷ Kheni wakazia mukadzi wake, naye wakaita mimba, akabara Enokhi. Naye wakaaka dhorobha, akaridudza zina romukororo wake, Enokhi.

¹⁸ KunaEnokhi kwakabarwa Iradhi, naIradhi wakabara Mehujaeri, naMehujaeri wakabara Methushaeri, naMethushaeri wakabara Ramekhi.

¹⁹ NaRamekhi wakaroora vakadzi vairi, zina roumwe ndiAdha, nezina roumweni ndiZira.

²⁰ NaAdha wakabara Jabhari; iye waiya baba weavo vanogara mumatende, vane n'ombe.

²¹ Nezina romunun'una wake raiya Jubhari; ndiye waiya baba weavo veshe vanoridza dimbwi neminanzi.

²² NaZira wakabara Thubhari-kheni; ndiye waiya mupfuri weizvo zveshe zvokucheka ndizvo zvethusi nezvesimbi, nomukunda waThubhari-kheni waiya Naama.

²³ NaRamekhi wakati kuvakadzi vake, “Adha naZira, izwai izwi rangu; imwimwi vakadzi vaRamekhi, purutanai kuereketa kwangu; ngokuti ndakauraya munhu wakandibaya, uri jaha, ngendaa yokuti ndinozouraya munhu unozondiremadza, kunyazwi jaha, ngendaa yokuti randiremedza.

²⁴ Kudai Kheni echiunzidzirwa kanomwe, ngegwinyiso Ramekhi unozounzidzirwa makumi manomwe namanomwe akapetwa.”

Sethi naEnoshi

²⁵ NaAdhamu wakaziazve mukadzi wake, naye wakabara mukororo, akadudza zina rake kuti Sethi, ngokuti echiti, “Ngokuti Mwari wandipa mwana umweni pandau yaAbhera; ngokuti Kheni wakamuuraya.”

²⁶ KunaSethi kwakabarwa mukororo; naye wakadudza zina rake kuti Enoshi. Naapo vanhu vakaamba kukumbira ngezina raMambo Mwari.