Gen. 39 - Bhaibheri Rakachena muChindau

Josefa noMukadzi waPotifa

¹ Josefa wakadzaswa Egipite; Potifa, nduna huru yaFaro, nduna yemajoni, muEgipite, wakamutenga kubva kunyara dzevaIshumaeri, avo vakadzaka nayeyo.

² Mambo Mwari waindoiya naJosefa, naye waiya munhu unomuchena; waigara mumhatso yamambo wake muEgipite.

³ Mambo wake wakaona kuti Mambo Mwari waiya naye, nokuti Mambo Mwari wakaita kuti zveshe zvaakaita zvibudirire munyara dzake.

⁴ Josefa wakaona nyasha mukuona kwake, akamushandira; wakamuita mukuru padera pemhatso yake, nepadera peizvo zveshe zvaaiya nazvo, wakazviisa munyara dzake.

⁵ Zvino kubvira ngomukuwo waakamuemesa kuita mukuru wemhatso yake, nepadera pazvo zveshe zvaaiya nazvo, Mambo Mwari wakafumisa mhatso yomuEgipite ngendaa yaJosefa; nokufumisa kwaMambo Mwari kwaiya padera pazvo zveshe zvaaiya nazvo mumhatso nomuminda.

⁶ Wakaturira zveshe zvaaiya nazvo munyara dzaJosefa; waiya asikachatambudziki ngechiro nachimwe cheizvo zvaaiya nazvo, asi kwega kudya ukwo kwaakadya. Zvino Josefa waiya akanaka, ane chiemo chinoringirika.

⁷ Zvino ngesure kweizvi mukadzi wamambo wake wakaringira Josefa; akati, “Ata neni.”

⁸ Asi iye wakaramba, akati kuno mukadzi wamambo wake, “Ringira, mambo wangu aazii zvineni mumhatso, wakaisa zveshe zvaanazvo munyara dzangu.

⁹ Akuna mumhatso muno ari mukuru kupinda inini; nokuti kusara nechiro nachimwe asi iwewe, ngokuti uri mukadzi wake. Ndizvo ndingaita maitirenyi uku kushata kukurutu, ndishaishe kunaMwari?”

¹⁰ Kunyazwi wakaereketa kunaJosefa zuva ngezuva, aazi kumupurutana, kuti aatane naye nokuti kugara naye.

¹¹ Asi zuva rimweni Josefa wakapinda mumhatso ooita mushando wake; mwaiya musina munhu naumwe mukati mwemhatso.

¹² Wakamubata ngechokusimira chake, echiti, “Atana neni.” Asi wakasiya chokusimira chake munyara mwake, akatiza, akabuda.

¹³ Naapo aona kuti wakasiya chokusimira chake munyara mwake, naye akatiza kubuda mumhatso,

¹⁴ wakadaidzira kune vamuna vemhatso yake, akaereketa kwavari echiti, “Ringirai, wakatiunzira muHebheru, kuti atiitire jee! Wakapinda kwendiri kuti aatane neni, ndakadaidzira ngeizwi guru;

¹⁵ naapo azwa kuti ndakaboorera nokuchema, wakasiya chokusimira chake, chiri pasinde pangu, akatiza kubuda mumhatso.”

¹⁶ Wakaisa chokusimira chake pasinde pake, metsa mambo wake wakauya kanyi.

¹⁷ Wakaereketa kwaari kudai ngaaya mazwi echiti, “Muranda muHebheru uwo wowakaunza kwetiri, wapotera kwendiri kundiitira jee;

¹⁸ asi apo ndaboorera ngeizwi rangu, ndechidaidzira, wasiya chokusimira chake chineni, akatiza kubuda mumhatso.”

¹⁹ Naapo mambo wake azwa mazwi omukadzi wake, aakaereketa kwaari echiti “Muranda wako wakaita zvakadai kwendiri,” ushungu hwake hwakabaka.

²⁰ Mambo waJosefa wakamutora, akamupinza mutirongo, mundau iyo yaipinzwa mabhanditi amambo, wakagaramwo mutirongo.

²¹ Asi Mambo Mwari waiya naJosefa, wakamuonisa nyasha, akamupa kudikanwa mukuona kwomungwariri wetirongo.

²² Mungwariri wetirongo wakapa munyara dzaJosefa mabhanditi eshe aiya mutirongo; kunyazwi chiinyi chaiitwamwo, ndiye waichiita.

²³ Mungwariri wetirongo aazi kutambudzika ngechiro nachimwe chaiya pashi penyara dzaJosefa ngokuti Mambo Mwari waiya naye; kunyazwi ngechiri chaakaita, Mambo Mwari wakaita kuti chibudirire.