Gen. 37 - Bhaibheri Rakachena muChindau

Josefa neVakoma vake

¹ Jakobe wakagara munyika umwo mwaiya baba ake vakaita chigarandimo, nyika yeKhenani.

² Iyi ndiyo mibarirwana yaJakobe. Josefa, aane makore gumi namanomwe, waiusha zvifuyo nevakoma vake, vakororo vaBhiriha nevakororo vaZiripha, vakadzi vababa ake, naJosefa wakauya nemashoko akashata ndivo kunababa ake.

³ Zvino Isuraeri wakada Josefa kupinda vana vake veshe, ngokuti iye waiya mukororo wousharuka hwake; wakamuitira bhachi rine miara yakawanda.

⁴ Asi apo vakoma vake vaona kuti baba vavo vakamuda kupinda ivo vakoma vake veshe, vakamuzonda, vasaikona kuereketa naye ngokunyarara.

⁵ Josefa wakarota hope, akadzironzera vakoma vake; vakapinda kumuzonda.

⁶ Wakati kwavari, “Izwai, ndinomupota, uku kurota kwendarota.

⁷ Ringirai, taiya techisunga mwanda mumunda, ndikaona, mwanda wangu wamiruka; ukaema, ndikaona, mwanda yenyu yakautendenedza, yakakotamira mwanda wangu.”

⁸ Vakoma vake vakati kwaari, “Ngegwinyiso unozotonga padera pedu here? Nokuti ngegwinyiso unozoita mambo padera pedu here?” Vakapindisisa kumuzonda ngendaa yokurota kwake, nendaa yemazwi ake.

⁹ Wakarota hope dzimweni, akadzironzera vakoma vake, akati, “Wonai, ndarota hope dzimweni; ndaona, zuva nomwedzi nenyeredzi gumi naimwe zvakandikotamira.”

¹⁰ Wakadzironzera kunababa ake nevakoma vake; baba ake vakamuganyira, vakati kwaari, “Kurotanyi uku kwowarota? Ngegwinyiso here kuti inini namai ako nevakoma vako tinozouya kudzikotamisa kwouri?”

¹¹ Vakoma vake vakaita ndurumwa ndiye; asi baba ake vakakarakadza ngeizwi iro.

Josefa Unotengeswa noKuendeswa Egipite

¹² Vakoma vake vakaenda koousha zvifuyo zvababa avo paShekhemu.

¹³ Isuraeri wakati kunaJosefa, “Vakoma vako avaushiri zvifuyo paShekhemu here? Uya, ndinozokutuma kwavari.” Iye wakati kwavari, “Ndiri pano.”

¹⁴ Ndizvo vakati kwaari, “Enda, ndapota, uone kuti vakoma vako vanogara zvakanaka here nezvifuyo, undiunzirezve izwi.” Ndizvo wakamutuma kubva mubani reHebroni, akaguma Shekhemu.

¹⁵ Nomunhu wakamuona, penya, waihamba-hamba mushango nomunhuwo wakamubvunza kuti, “Unotsvakenyi?”

¹⁶ Wakati, “Ndinotsvaka vakoma vangu; ndapota, ndironzere pevanoushira.”

¹⁷ Munhuwo wakati, “Vakabva pano, ngokuti ndakazwa vechiti, ‘Ngatiende Dhothani.’ ” Ndizvo Josefa wakateera vakoma vake naye wakavaona paDhothani.

¹⁸ Vakamuona achikuretu, asati akwedzera kwavari, vakaita dumba ndiye rokumuuraya.

¹⁹ Vakati umwe kunoumweni, “Ringirai, uyu muroti unouya.

²⁰ Ndizvo zvino uyai, ngatimuuraye, timukandire mukati mwerimwe remarindi, nesu tinozoti wakadyiwa ngechikara chakashata, nesu tinozoona ngokurota kwake.”

²¹ Rubheni wakazvizwa, akamununura kubva panyara dzavo; akati, “Tisamuuraya.”

²² Rubheni wakati kwavari, “Musaparadza ngazi; asi mukandirei murindi iri riri mushango, asi musaisa nyara padera pake.” Waida kumununura kubva munyara dzavo, amuhwirinze kunababa ake.

²³ Naapo Josefa paakauya pavakoma vake, vakamubvisa bhachi rake, bhachi iro raiya nemiara yakawanda, raaiya akapfeka.

²⁴ Vakamutora, vakamukandira murindi raiya risina chiro, mwaiya musina mvura mukati mwaro.

²⁵ Vakagara pashi kudya chingwa; vakamirudza madziso avo, vakaringira, vakaona chikwata chevaIshumaeri chaiuya chechibva Gireadhi, chine makamera acho, akatwara mutombo inonuhwira nemaka nemhura, kudzaka nazvo Egipite.

²⁶ Judha wakati kuhama dzake, “Zvingatidetserenyi kudai techiuraya munun'una wedu nokufisha ngazi yake?

²⁷ Uyai ngatimutengise kuvaIshumaeri kuti nyara dzedu dzisaa padera pake; ngokuti munun'una wedu nenyama yedu.” Hama dzake dzakamupurutana.

²⁸ Zvino vaMidhiani vatengisi vakapinda ndipo; navo vakakweya nokubudisa Josefa kubva murindi, vakatengesa Josefa kuvaIshumaeri ngezvigurwa zvesirivha makumi mairi (20), vakaunza Josefa muEgipite.

²⁹ Rubheni wakahwirira kurindi; wakaona, Josefa asirimwo murindi; naye wakabaura zvokusimira zvake.

³⁰ Wakahwirira kuvanun'una vake, akati, “Mwana amuchina, neni ndinozoenda pari?”

³¹ Vakatora bhachi raJosefa, vakauraya chiphongo, vakanyika bhachi mungazi.

³² Vakatumira bhachi iro raiya nemiara yakawanda, vakariisa kunababa avo, vakati, “Taona iri, ringirai zvino muone kuti ibhachi romukororo wenyu here.”

³³ Naye wakarizia, akati, “Ndiro bhachi romukororo wangu; chikara chakamudya; azvirambiki Josefa wakabvajurwa kuita zvigurwa.”

³⁴ Jakobe wakabaura zvokusimira zvake, akapfeka jira resaka pachiunu chake, akabonda mazuva akawanda ngendaa yomukororo wake.

³⁵ Veshe vakororo vake nevanasikana vake vakamiruka kumuembedzera; akati, “Ndinozodzaka muiba kunomukororo wangu ndechibonda.” Ngokudaro baba ake vakamuchema.

³⁶ VaMidhiani vakamutengesa muEgipite kunaPotifa, nduna huru yaFaro, yaiya nduna yemajoni.