Gen. 35 - Bhaibheri Rakachena muChindau

Mwari Unofumisa Jakobe paBhetheri

¹ Mwari wakati kunaJakobe, “Miruka, ukwire Bhetheri, ugareyo; umuakire apo Mwari arita, uwo wakaoneka kwouri apo waitiza kubva kuhope yaIsau mukoma wako.”

² Ndizvo Jakobe wakati kunevemhatso yake, nokwavari veshe vaiya naye, “Rashai zvimwari zviri pakati penyu, mudzichenese ngokwenyu, musimire zvokusimira zvimweni.

³ Ngatimiruke, tikwire Bhetheri; ndinozomuakirapo Mwari arita, uwo wakandipingura ngezuva rokutambudzika kwangu, waiya neni munjira yendakahamba.”

⁴ Ndizvo vakapa Jakobe zveshe zvimwari zvipara zvaiya munyara dzavo, nemativhera aiya munzee dzavo; Jakobe wakazvifushira pashi pomuokhi uwo waiya pasinde peShekemu.

⁵ Vakahamba rwendorwo, nokutyisa kwaMwari kwaiya padera pemadhorobha aivatendenedza, avazi kurumbirira vakororo vaJakobe.

⁶ Ndizvo Jakobe wakauya Ruzi, rinozwi Bhetheri, riri munyika mweKhenani, iye nevanhu veshe vaiya naye.

⁷ Naapo wakaakapo arita, akadudza zina rendau iyo kuti Eri-bhetheri, ngokuti Mwari wakaonekapo kwaari, apo aitiza kubva kuhope yomukoma wake.

⁸ Dhebhora mureri waRebheka wakafa, akatsirwa ngokubani kweBhetheri pashi pomuokhi, nezina rawo rakadudzwa kuti Aroni-Bhakuthi.

⁹ Mwari wakaonekazve kunaJakobe, apo paakauya kubva Padhana-aramu, akamufumisa.

¹⁰ Mwari wakati kwaari, “Zina rako ndiJakobe; zina rako arichazodaidzwizve kuti Jakobe, asi rinozozwi Isuraeri.” Wakadudza zina rake kuti Isuraeri.

¹¹ Mwari wakati kwaari, “Ndiri Mwari Unesimba-reshe; baranai muwande; kunozobva kwouri dzinza nechiunga chemadzinza, nemadzimambo anozobarwa kubva muchiunu chako.

¹² Nyika yendakapa kunaAbrahama naIsaka ndinozoipa kwouri, nokumibarirwana yako inozoteera sure kwako ndinozoipa iyi nyika.”

¹³ Zvino Mwari wakakwira kubva kwaari, kubva pandau yaakaereketa naye.

¹⁴ Jakobe wakadzimika mujeki pandaupo paakaereketa naye, chaiya chioniso chebuwe, akadurura mudiro wokumwa padera pawo, akadurura mafuta padera pawo.

¹⁵ Jakobe wakadudza zina rendau iyo paakaereketa naye Mwari kuti Bhetheri.

Kufa kwaRacheri

¹⁶ Zvino vakahamba kubva Bhetheri; naapo vachiri kamuhambo kadoko kuguma Efrathi, Racheri wakapotwa ngokuda kubara, akarwadziwa kakurutu.

¹⁷ Naapo achiri pakurwadziwa kakurutu, muashiri wakati kwaari, “Usatya; ngokuti zvino unozobara mukororo umweni.”

¹⁸ Naapo mweya wake uchabuda kubva mwaari (ngokuti wakafa), wakadudza zina rake kuti Bhenoni, asi baba ake vakamududza kuti Bhenjamini.

¹⁹ Racheri wakafa, akatsirwa munjira yokuenda Efrathi, iro ndiro Bhetherehema.

²⁰ Jakobe wakadzimika mujeki paiba rake, uwo unozwi mujeki weiba raRacheri metsa nanyamashi.

²¹ Isuraeri wakahamba, akaemesa tende rake ngepamberi porusvingo rweEdheri.

Vana vaJakobe

²² Zvino Isuraeri echigara munyika iyo, Rubheni wakaenda akaatana naBhiriha bunha rababa ake, naIsuraeri wakazwa ndizvo. Zvino vakororo vaJakobe vaiya gumi navairi.

²³ Vakororo vaRea vaiya Rubheni, dangwe raJakobe, Simeoni, Revhi, Judha, Isakha, naZebhuruni.

²⁴ Vakororo vaRacheri vaiya Josefa naBhenjamini.

²⁵ Vakororo vaBhiriha murandakadzi waRacheri vaiya Dhani naNafitari.

²⁶ Vakororo vaZiripha murandakadzi waRea vaiya Gadhi naAsha, ava ndivo vakororo vaJakobe vaakabarirwa muPadhana-aramu.

Kufa kwaIsaka

²⁷ Jakobe wakauya kunababa ake Isaka kuMamure, nokuti Kiriathi-Abha, (ndiro Hebroni), apo pevakambogara Abrahama naIsaka.

²⁸ Mazuva aIsaka aiya makore zana nemakumi masere (180).

²⁹ Isaka mweya wake wakabuda; akafa, akaunganidzwa kune vanhu vake, aamusharuka yaamho ane makore mazhinji; Isau naJakobe vakororo vake vakamutsira.