Gen. 33 - Bhaibheri Rakachena muChindau

Jakobe Unoshongana naIsau

¹ Jakobe wakamirudza madziso ake, akaringira, akaona Isau echiuya, ane vanhu mazana marongomuna (400). Wakapaura vana pakati paRea naRacheri nevarandakadzi vairi.

² Wakaisa varandakadzi vairi nevana vavo pamberi, Rea nevana vake ngepasure, Racheri naJosefa ngepamagumisiro.

³ Iye emene wakaambuka ngepamberi pavo, akadzikotamisa kanomwe pamavhu, metsa wakakwedzera kunomukoma wake.

⁴ Isau wakarumba kooshongana naye, akamukumbatira, akawira pamutsipa wake, akamuchingamidza ngomuromo, vakachema.

⁵ Wakamirudza madziso ake, akaona vakadzi nevana, akati, “Ndiani avo vounavo?” Iye wakati, “Vana vaakapa Mwari ngenyasha kunomuranda wako.”

⁶ Naapo varandakadzi vakakwedzera pasinde nevana vavo, vakadzikotamisa;

⁷ Rea nevana vake vakakwedzerawo pasinde, vakadzikotamisa; ngesure wakakwedzera pasinde Josefa naRacheri, vakadzikotamisa.

⁸ Wakati, “Unoronzenyi ngeizvo zvikwata zveshe zvendashongana nazvo?” Iye wakati, “Ngezvokuitira kuti ndione nyasha mukuona kwamambo wangu.”

⁹ Isau wakati, “Ndine zvakakwana, munun'una wangu. Izvo zvounazvo ngazviite zvako.”

¹⁰ Jakobe wakati, “Haiwa, ndapota, kudai zvino ndaona nyasha mukuona kwako, ashira chipo changu kubva munyara yangu, ngokuti ndaona hope yako kudai ngomunhu waona hope yaMwari, newe wadakara ndini.

¹¹ Ashira, ndinokupota, chipo changu icho chaunzwa kwouri, ngokuti Mwari wakaita nyasha kwendiri, ngokuti ndinazvo zvakakwana.” Wakamunyengerera, akazviashira.

¹² Wakati, “Ngatihambe rwendo rwedu, ngatiende, neni ndinozotungamira pamberi pako.”

¹³ Asi wakati kwaari, “Mambo wangu unozia kuti vana vachi vatete, makwai nen'ombe zvineni zvinoamwisa, kudai vechizonyanya kuzvitinha zuva rimwe, nezvifuyo zveshe zvinozofa.

¹⁴ Ndinomupota, mambo wangu ngaatungamire pamberi pomuranda wake, neni ndinozohamba padoko padoko, kudai ngezvingagwinyirwa ngezvifuyo zvinohamba pamberi pangu, nokudai ngezvinogwinyirwa ngevana, metsa ndigume kunamambo wangu kuSeira.”

¹⁵ Isau wakati, “Ngandisiye kwouri zvino vamweni vevanhu vaneni.” Iye wakati, “Muchaitirenyi kudaro? Ngandione nyasha mukuona kwamambo wangu.”

¹⁶ Ndizvo Isau wakahwirira ngeiro zuva ngenjira yake yokuenda Seira.

¹⁷ Jakobe wakahamba kuenda Sukothi, akadziakira mhatso, wakaaka zvibaya zvezvifuyo zvake, ndizvo zina rendau iyo rakadudzwa kuti Sukothi.

¹⁸ Jakobe wakaguma zvakanaka kudhorobha reShekhemu, riri munyika yeKhenani, apo abva Padhana-aramu; wakaemesa matende ake akaringirana nedhorobha.

¹⁹ Wakatenga chigurwa chenyika kubva kunevana vaHamori, baba aShekhemu, ngezvigurwa zvesirivha zana (100), apo paaiya aemesa matende ake.

²⁰ Wakaakapo arita, akaridudza kuti Eri-erohe-Isuraeri.