Gen. 32 - Bhaibheri Rakachena muChindau

Jakobe Unonasirira Kushongana naIsau

¹ Jakobe wakaenda rwendo rwake, nengirosi dzaMwari dzakashongana naye;

² naapo Jakobe adziona wakati, “Iyi ihondo yaMwari!” Wakadudza zina reiyo ndau kuti Mahanaimu.

³ Jakobe wakatuma nhumwa pamberi pake kunaIsau mukoma wake munyika yeSeira, nyika yeEdhomu,

⁴ echivapanga, echiti, “Ndizvo zvomunozoereketa kunamambo wangu Isau: Muranda wako Jakobe unoronza kudai, ‘Ndakaita chigarandimo kunaRabhani metsa zvino.

⁵ Ndine n'ombe nembongoro nezvifuyo nevaranda, vamuna nevakadzi; ndatuma kuronzera mambo wangu, kuti ndione nyasha mukuona kwako.’ ”

⁶ Nenhumwa dzakapetukazve kunaJakobe dzechiti, “Takaguma kunomukoma wako Isau, unouyawo kushongana newe, ane vamuna mazana marongomuna naye.”

⁷ Naapo Jakobe wakatya kakurutu nokutambudzika, wakaparadzanisa kuita zvikwata zviiri vanhu vaiya naye nezvifuyo, n'ombe nemakamera,

⁸ echiti, “Kudai Isau echizoguma kuchikwata chimwe nokuchiuraya, naapo chikwata chimweni chasara chinozotiza.”

⁹ Jakobe wakati, “A Mwari wababa angu Abrahama, Mwari wababa angu Isaka, Mambo Mwari, uwo wakati kwendiri, ‘Hwirira kunyika yako nokuhama dzako, neni ndinozokuitira zvakanaka,’

¹⁰ andisisirwi nepadoko ngenyasha dzako dzeshe negwinyiso reshe rowakaonisa kumuranda wako; ngokuti ndakaambuka urwo rwizi Jorodhani ndine ndonga yangu; zvinopano ndaita zvikwata zviiri.

¹¹ Ndinunurei, ndapota, kubva kunyara yomukoma wangu, nyara yaIsau, ngokuti ndinomutya, kuti pamweni ungauya, akatiuraya isusu teshe, vanamai pamwepo nevana.

¹² Asi iwewe wakati, ‘Ngegwinyiso ndinozokuitira zvakanaka, ndiite kuti mibarirwana yako iwande kudai ngejecha roruandhle, risikaerengeki ngouwandu.’ ”

¹³ Wakaatapo usikuhwo, akatora kubva paneizvo zvaaiya nazvo kuita chipo chaIsau mukoma wake:

¹⁴ Mazana mairi (200) embudzi dzehadzi, magotokoto makumi mairi (20), mazana mairi (200) emakwai makadzi, magondohwe makumi mairi (20),

¹⁵ makamera makumi matatu (30) anosengwa nevana vawo, n'ombe makumi marongomuna (40) nemikono gumi (10), nemadhuna embongoro gumi (10), mbongoro dzehadzi makumi mairi (20) nemadhuna embongoro gumi (10).

¹⁶ Wakazvipa munyara yevaranda vake, zvechitinhwa zvakati izvi zvega izvi zvega; wakati kuvaranda vake, “Ambukai muende mberi kwangu, muise nharauko pakati pechikwata nechikwata.”

¹⁷ Wakapanga uwo wepamberi pemene echiti, “Apo Isau mukoma wangu paanoshongana newe, echikubvunza, echiti, ‘Uriwaani? Unoenda kuri? Ngezvani izvi zviri pamberi pako?’

¹⁸ Zvino unozoti, ‘Ngezvomuranda wako Jakobe; zviri chipo chakatumwirwa kunamambo wangu Isau; zvakanyadaro naye uri sure kwedu.’ ”

¹⁹ Wakapanga kudarozve uwo wechipiri nowechitatu naavo veshe vaiteera zvikwata echiti, “Ngenjira imweyo munozoereketa kunaIsau apo pomunomuona.

²⁰ Munozoronzazve kuti, ‘Ringira, muranda wako Jakobe uri sure kwedu.’ ” Ngokuti wakapinimidza echiti, “Ndinozomupfaisa ngechipo chinotungamidzwa pamberi, ngesureni ndinozoona hope yake; pamweni unozondiashira.”

²¹ Ndizvo chipo chakatungamidzwa pamberi pake; iye emene wakaata ngouhwo usiku mukati mwechikwata.

Kudzipana kwaJakobe paPhenieri

²² Wakamiruka ngouhwo usiku, akatora vakadzi vake vairi, nevarandakadzi vake vairi, nevana vake gumi naumwe, akaambuka zambuko romukova unozwi Jabhoki.

²³ Wakavatora, akavaambusa ruseri rwomukova, akaendisa zveshe zvaaiya nazvo.

²⁴ Jakobe wakasara ari ega; nomunhu wakaita matsimba naye metsa kuedza kwokubanze.

²⁵ Apo aona kuti aazi kumunyisa, wakagwama mudzira wenhunji yake; nenhunji yaJakobe yakanika echiita matsimba naye.

²⁶ Wakati, “Ndirekere, ndiende, ngokuti kubanze kwoedza.” Naye wakati, “Andizokurekeri kuti uende, metsa wandifumisa.”

²⁷ Wakati kwaari, “Zina rako ndiani?” Iye wakati, “Jakobe.”

²⁸ Zvino wakati, “Zina rako arichazodaidzwi kuti Jakobe, asi kuti Isuraeri, ngokuti wakadzipana naMwari nevanhu, ukanyisa.”

²⁹ Jakobe wakamubvunza, akati, “Ndironzere, ndapota, zina rako.” Asi wakati, “Ngenyi wechibvunza zina rangu?” Wakamufumisapo.

³⁰ Jakobe wakadudza zina rendau iyo kuti Phenieri, zvinoronza kuti, “Ngokuti ndaonana naMwari hope ngehope, asi kupona kwangu kwakangwaririka.”

³¹ Zuva rakabuda echiambuka Phenieri, waikumhina ngendaa yenhunji yake.

³² Ndizvo vana vaIsuraeri avadyi murunda uri pagodo romuchiunu metsa nanyamashi, ngokuti wakagwama nhunji yaJakobe pamurunda wenhunji.