Gen. 31 - Bhaibheri Rakachena muChindau

Jakobe Unotiza kubva kwaRabhani

¹ Zvino Jakobe wakazwa vakororo vaRabhani vechiti, “Jakobe watora zveshe zvaiya zvababa edu; wakadzionera upfumi uhwu hweshe ngeizvo zvaiya zvababa edu.”

² NaJakobe wakaona kuti hope yaRabhani yaiya isikacharingiriki kwaari kudai ngekaretu.

³ Zvino Mambo Mwari wakati kunaJakobe, “Hwirira kunyika yemadzibaba ako nokuhama dzako, neni ndinozoa newe.”

⁴ Ndizvo Jakobe wakatuma, kudaidza Racheri naRea kuuya mushango, kwaiya nezvifuyo zvake.

⁵ Wakati kwavari, “Ndinoona hope yababa enyu kuti aicharingiriki kwendiri kudai ngekaretu. Asi Mwari wababa angu waiya neni.

⁶ Nemwi munozia kuti ndakashandira baba enyu ngesimba rangu reshe.

⁷ Baba enyu vakandichengedzera, vakatsandura misharo yangu kagumi; asi Mwari aazi kumutendera kuti andiremadze.

⁸ Kudai aizoronza kuti, ‘Dzine maara dzinozoita misharo yako,’ zvino zvifuyo zveshe zvakabara zvine maara; nokudai aizoronza kuti, ‘Dzine misweeswee dzinozoita misharo yako,’ zvino zvifuyo zveshe zvakabara zvine misweeswee.

⁹ Ndizvo Mwari wakatora zvifuyo zvababa enyu, akazvipa kwendiri.

¹⁰ “Panguva yokuita mabee kwezvifuyo, ndakamirudza madziso angu, ndikaona mukurota, ndakaona magondohwe aivevedza zvifuyo aiya nemisweeswee neemabvumbidza neane maara.

¹¹ Zvino ngirosi yaMwari yakaereketa kwendiri mukurota yechiti, ‘Jakobe.’ Ndakati, ‘Ndiri pano!’

¹² Yakati, ‘Mirudza zvino madziso ako, uone, eshe magondohwe anovevedza zvifuyo ane misweeswee neemabvumbidza, neane maara, ngokuti ndakaona zveshe zvaanoita Rabhani kwouri.

¹³ Ndini Mwari waBhethueri, apo powakadzodza sika, powakapika mhiko kwendiri. Zvino miruka, ubve munyika iyi, uhwirire kunyika yechibarirwe chako.’ ”

¹⁴ Zvino Racheri naRea vakapingura, vakati kwaari, “Chichipo here chikoaniswa nenhaka yedu mumhatso mwababa edu?

¹⁵ Avatierengi here kuti taavapara? Ngokuti vakatitengesa, vakadya chuma chedu.

¹⁶ Ngokuti upfumi hweshe hwaakatora Mwari kubva kunababa edu ngohwedu nohwevana vedu; ndizvo zvino, kunyazwi chiinyi chaakaronza Mwari kwouri, chiita.”

¹⁷ Ndizvo Jakobe wakamiruka, akakwidza vakororo vake nevakadzi vake padera pemakamera;

¹⁸ wakatora zveshe zvifuyo zvake zvaakauyirwa ndizvo, zvifuyo zvaakaunganidza muPadhana-aramu, kuti aende kunaIsaka baba ake munyika yeKhenani.

¹⁹ Zvino Rabhani waiya aenda koogunda makwai ake, Racheri wakaba miedzaniso yokudira yababa ake.

²⁰ Jakobe wakachengedzera Rabhani muAramu, ngokuti aazi kumuronzera kuti waida kutiza.

²¹ Ndizvo wakatiza anazvo zveshe zvaaiya nazvo; wakamiruka aambuka rwizi, akaringira hope yake kuenda kudunhu reGireadhi.

Rabhani Unoteera Jakobe

²² Zvino ngezuva rechitatu Rabhani wakaronzerwa kuti Jakobe watiza.

²³ Wakatora hama dzake, akamuteera muhambo wemazuva manomwe; wakamubatira kudunhu reGireadhi.

²⁴ Asi Mwari wakauya kunaRabhani muAramu usiku mukurota, akati kwaari, “Ngwara kuti usaereketa kunaJakobe zvakanaka nokuti zvakashata.”

²⁵ Rabhani wakaguma kunaJakobe. Zvino Jakobe waiya aemesa tende rake munyika yemitunhu, Rabhani nehama dzake vakaemesa matende avo mudunhu reGireadhi.

²⁶ Rabhani wakati kunaJakobe, “Wakaitenyi iwewe kundichengedzera, ukatora vana vangu kudai ngevasungwa vakachakatwa ngeshoti?

²⁷ Wakatiza ngokufishika ngenyi, ukandichengedzera, usikazi kundironzera kuti ndikuendise ngokudakara, ngenduyo, mbira nedimbwi.

²⁸ Auzi kunditendera kuti ndivhaise ngomuromo vazukuru vangu nevanasikana vangu? Zvino wakaita zviro zvoupenzi.

²⁹ Zviri musimba renyara yangu kukuremadza; asi Mwari wababa ako wakaereketa kwendiri usiku hwezuro echiti, ‘Ngwara kuti usaereketa kunaJakobe zvakanaka nokuti zvakashata.’

³⁰ Zvino watiza ngokuti unoda kuti uende ngokuti unoshuwira kakurutu vemhatso yababa ako, asi wakaba ngenyi miedzaniso yangu yokudira?”

³¹ Jakobe wakapingura, akati kunaRabhani, “Ngokuti ndaitya, ndikapinimidza kuti pamweni unganditorera vana vako ngesimba.

³² Kwaari uwo wounoona anazvo zvimiedzaniso zvake zvokudira, asazopona. Pamberi pehama dzedu, ringira iwewe zviri zvako kwendiri, uzvitore.” Ngokuti Jakobe aazi kuzia kuti Racheri waiya azviba.

³³ Rabhani wakapotera mutende raJakobe, mutende raRea nomutende revashandiri vairi; asi aazi kuzvionamwo. Oroobuda kubva kutende raRea, wakapotera mutende raRacheri.

³⁴ Zvino Racheri waiya akatora zvimiedzaniso zvake zvokudira, akazviisa muchigaro chekamera, akagara padera pazvo. Rabhani wakatsvakisisa mutende reshe, asi aazi kuzviona.

³⁵ Wakati kunababa ake, “Mambo wangu, musatseneka ngokuti andikoni kumiruka pamberi pako; ngokuti muitiro wevakadzi wandigumira.” Wakatsvakisisa asi aazi kuzviona zvimiedzaniso zvokudira.

³⁶ Jakobe wakatseneka, akaganyira Rabhani; wakati kunaRabhani, “Ndaa yangu ngeyenyi? Chishaishi changu ngechiri chaita kuti iwewe undirumbirire kakurutu?

³⁷ Zvino zvemwabata-bata zvidziyo zvangu zveshe, mwaonenyi pazviro zveshe zvemhatso yenyu? Zviise pano pamberi pehama dzangu nehama dzako, kuti vagure ndaa pakati pedu isusu vairi.

³⁸ Ndakagara newe aya makore makumi mairi; makwai ako nembudzi dzako adzizi kusvodza, andizi kudya magondohwe ezvifuyo zvako.

³⁹ Andizi kuunza kwouri idzo dzakarumwa ngezvikara; ndini ndakadziripira pachangu; ukadzibvunza kubva munyara dzangu, kunyazwi zvakabiwa masikati nokuti usiku.

⁴⁰ Ndizvo zvendaigara ndakaita: masikati ndaipishwa ngezuva, nousiku ndaitonhorwa ngechando, nehope dzaipera usiku.

⁴¹ Ndaigara mumhatso mwako aya makore makumi mairi; ndakakushandira makore gumi namarongomuna kuti undipe vanasikana vako vairi, nemakore matanhatu kuti ndipuwe zvifuyo zvako; newe wakatsandura musharo wangu mikuwo kagumi.

⁴² Kudai asaiya neni Mwari wababa angu, Mwari waAbrahama, nouwo waakatyiwa ndiIsaka, ngegwinyiso mwaizodai mwandiendisa ndisina chiro. Mwari wakaona kutambudzika kwangu nomushando wenyara dzangu, akakuganyira usiku hwezuro.”

Jakobe naRabhani Vanoita Chitenderano

⁴³ Rabhani wakapingura, akati kunaJakobe, “Ava vanasikana vanasikana vangu, naava vana vana vangu, neizvi zvifuyo zvifuyo zvangu, nazvo zveshe zvounazvo ngezvangu. Ndingaitenyi nyamashi kune ava vanasikana vangu, nokuti kuvana vavo vevakabara?

⁴⁴ Zvino uya, ngatiite chitenderano, iwewe neni; ngachiite chapupu pakati pako neni.”

⁴⁵ Jakobe wakatora buwe, akaridzimika kuita mujeki.

⁴⁶ Jakobe wakati kuhama dzake, “Unganidzai mapuwe;” navo vakatora mapuwe, vakaita murwi; vakadyirapo pasinde pomurwi.

⁴⁷ Rabhani wakaududza kuti Jegari-sahadhutha, asi Jakobe wakaududza kuti Gareedhi.

⁴⁸ Rabhani wakati, “Uyu murwi chapupu pakati pako neni nyamashi.” Ndizvo zina rawo rakadudzwa kuti Gareedhi

⁴⁹ nomujeki kuti Mizipha, ngokuti wakati, “Mambo Mwari ngaarinde pakati pako neni apo takaparadzana umwe kunoumweni.

⁵⁰ Kudai wechizotambudza vanasikana vangu, nokuti wechizotora vakadzi vamweni ngokubanze kwevana vangu, kunyazwi akuna munhu uri pano nesu, wona, Mwari ndiye chapupu pakati pako neni.”

⁵¹ Rabhani wakati kunaJakobe, “Wona murwi uyu nomujeki uyu wendaemesa pakati pako neni.

⁵² Murwi uyu chapupu nomujeki uyu chapupu, kuti inini andizoudariki kuuya kwouri, nokuti iwewe auzoudariki kuuya kwendiri, kuti tishaishirane.

⁵³ Mwari waAbrahama naMwari waNaho, Mwari wababa avo, ngaatonge pakati pedu.” Jakobe wakapika ngouwo waityiwa ndibaba ake Isaka.

⁵⁴ Jakobe wakapa mudiro pamutunhuwo, akadaidza hama dzake kudya chingwa, vakadya chingwa, vakaatapo usiku hweshe.

⁵⁵ Rabhani wakafumira mangwanani kumiruka, akachingamidza ngomuromo vazukuru vake nevanasikana vake, akavafumisa. Rabhani wakabvapo, akahwirira kanyi kwake.