Gen. 3 - Bhaibheri Rakachena muChindau

Kushaisha kwoMunhu

¹ Zvino nyoka yaiya nourimbwi kupinda zvikara zvimweni zvomushango zvaakaita Mambo Mwari. Nayo yakati kunomukadzi, “Ngegwinyiso Mwari wakaronza here kuti musazodya kumuti nokuti ngouri womumunda?”

² Nomukadzi wakati kunenyoka, “Tingadya kumichero yemiti yomumunda.

³ Asi Mwari wakati ‘Muchero womuti uwo uri pakati pomunda amuzoudyi, zve, amuzoubati, kuti musazofa.’ ”

⁴ Asi nyoka yakati kunomukadzi, “Ngegwinyiso amuzofi.

⁵ Ngokuti Mwari unozia kuti apo pomunozoudya, madziso enyu anozopembenudzwa, nemwi munozodai ndiMwari, mwechizia zvakanaka nezvakashata.”

⁶ Ndizvo apo mukadzi aona kuti muti wakanaka kudyiwa nokuti waidakadza madziso, nokuti muti waiya wechidikanwa kuti munhu angwadzwe, wakatora muchero wawo wakaudya; akapawo umweni kumwamuna wake, waiya naye, nayewo wakadya.

⁷ Naapo madziso avo veshe akapembenudzwa, vakazia kuti vaiya mititinini; vakasonera mashakani omuonde pamwepo, vakadziitira zvokusimira.

⁸ Navo vakazwa Mambo Mwari echihamba mumunda ngomukuwo wokupipirira kwezuva. Munhu nomukadzi wake vakahwara pakati pemiti yomumunda, kubva mukuapo kwaMambo Mwari.

⁹ Asi Mambo Mwari wakadaidza munhu, akati kwaari, “Uri pari?”

¹⁰ Naye wakati, “Ndazwa izwi rako ndiri mumunda, neni ndatya, ngokuti ndaiya ndiri mutitinini; neni ndahwara.”

¹¹ Naye wakati, “Ndiani wakuronzera kuti waiya uri mutitinini? Wadya here muti wendakakupanga ndiwo kuti, usazodya?”

¹² Nomunhu wakati, “Mukadzi wowakandipa kuti agare neni ndiye wandipa muchero womuti, neni ndaudya.”

¹³ Naapo Mambo Mwari wakati kunomukadzi, “Chiinyi ichi chowaita?” Mukadzi wakati, “Nyoka yandichengedzera, neni ndaudya.”

Kuorora kwaMwari

¹⁴ Mambo Mwari wakati kunenyoka, “Ngokuti waita ichi, unotukwa kupinda zvifuyo zveshe nokupinda zvikara zveshe zvomushango; unozogwezva ngendani yako, newe unozodya bukuta mazuva eshe okupona kwako.

¹⁵ Ndinozoisa ugaa pakati pako nomukadzi, nepakati pemibarirwana yako nemibarirwana yake; mibarirwana yake inozoremadza soro rako, newe unozoremadza chisisinho chake.”

¹⁶ Kumukadzi wakati, “Ndinozowanza kakurutu kurwadziwa kwako mukutora kwako mimba noukosha; mukurwadziwa kukurutu unozobara vana; nokudisisa kwako kunozoa kumwamuna wako, naye unozotonga padera pako.”

¹⁷ NokunaAdhamu wakati, “Ngokuti wapurutana izwi romukadzi wako, ukadya kumuti wendakakupanga ndechiti, ‘Usazoudya,’ ivhu ratukwa ngendaa yako; unozodya zvinobva kweriri ngokushanda mazuva eshe okupona kwako;

¹⁸ zve, rinozokumerera minzwa nemakato; newe unozodya miriwo yomushango.

¹⁹ Ngeziya rehope yako unozodya kudya, metsa uhwirire kumavhu; ngokuti wakabviswa kwaari; ngokuti uri bukuta, newe unozohwirira kuita bukuta.”

²⁰ Munhu wakadudza zina romukadzi wake kuti Evha; ngokuti iye waiya mai waavo veshe vanopona.

²¹ Mambo Mwari wakaitira Adhamu nomukadzi wake mabhachi ematoo, akavafukidza.

Adhamu naEvha Vanodzingwa kubva muMunda

²² Naapo Mambo Mwari wakati, “Wona, munhu wadai ngoumwe wedu, mukuzia zvakanaka nezvakashata; zvino kuti asazotambanudza nyara yake, atorezve michero yomuti wokupona, adye apone mhera nariini.”

²³ Ndizvo Mambo Mwari wakamubudisa kubva mumunda weEdheni, kuti arime mavhu aakabviswa mwaari.

²⁴ Ndizvo wakamudzinga munhu, akaisa ngokumabvazuva kwomunda weEdheni makerubhi, neshoti inovaima nokutenderera kumarupande eshe, kungwarira njira yomuti wokupona.