Gen. 28 - Bhaibheri Rakachena muChindau

¹ Ndizvo Isaka wakadaidza Jakobe, akamufumisa, akamupanga, akati kwaari, “Usazoroora mukadzi kubva kuvaKhenani.

² Miruka, uende Padhana-aramu kumhatso yaBhethueri baba amai ako; urooreyo mukadzi umwe wevanasikana vaRabhani mukoma wamai ako.

³ Mwari Unesimba-reshe ngaakufumise, aite kuti mubarane, amuwanze, kuti muite dzinza guru revanhu.

⁴ Ngaape chifumiso chaAbrahama kwouri nokumibarirwana yako, kuti ugare nhaka yenyika iyo youri chigarandimo kweiri, yaakapa Mwari kunaAbrahama.”

⁵ Ndizvo Isaka wakaendisa Jakobe, iye wakaenda Padhana-aramu kunaRabhani, mukororo waBhethueri muAramu, mukoma waRebheka, mai aJakobe naIsau.

Isau Unotora Mukadzi Umweni

⁶ Zvino Isau aona kuti Isaka waiya afumisa Jakobe nokumuendisa Padhana-aramu, kuti arooreyo mukadzi; nokuti waiya amufumisa, wakamupanga echiti, “Usazoroora mukadzi kubva kuvaKhenani,”

⁷ nokuti Jakobe wakapurutana baba namai ake, nokuti wakaenda Padhana-aramu.

⁸ Naapo Isau wakaona vakadzi vevaKhenani avazi kudakadza Isaka baba ake,

⁹ Isau wakaenda kunaIshumaeri, akatora kuita mukadzi wake Maharathi, mwanasikana waIshumaeri, mukororo waAbrahama, mukunda waNebhaiothi, kututsira kuvakadzi vaaiya navo.

Kurota kwaJakobe paBhetheri

¹⁰ Jakobe wakabuda kubva Bheeri-shebha, akaenda Harani.

¹¹ Wakaguma pandau imweni, akaatapo usiku hweshe, ngokuti zuva raiya rabira. Wakatora rimwe remapuwe epandauyo, akariita mutsamiro, akaata pashi pandau iyo.

¹² Wakarota hope, echiona danhidzo rakaemeswa padera penyika, nedera kwaro kwakaguma mudenga; wona, ngirosi dzaMwari dzaikwira nokudzaka padera paro.

¹³ Wona, Mambo Mwari wakaema padera paro, akati, “Ndini Mambo Mwari, Mwari waAbrahama baba ako naMwari waIsaka; ndinozopa kwouri nokumibarirwana yako nyika younoata padera payo;

¹⁴ nemibarirwana yako inozodai ngebukuta renyika, newe unozopararira kuenda kumabirirazuva nokumabvazuva, dera nokubani; mhuri dzeshe dzomunyika dzinozofumiswa mwouri, nomumibarirwana yako.

¹⁵ Wona, ndinewe, ndinozokungwarira kundau dzeshe dzounozoenda, ndinozokuunzazve munyika ino; ngokuti andizokusii metsa ndaita icho chendakaereketa ndicho kwouri.”

¹⁶ Jakobe wakamuka muhope, akati, “Ngegwinyiso Mambo Mwari uri mundau ino; neni andizi kuzvizia.”

¹⁷ Wakatya, akati, “A kutyisanyi kwendau iyi! Iyi ngegwinyiso imhatso yaMwari neichi musiwo womudenga.”

¹⁸ Ndizvo Jakobe wakafumira kumiruka mangwanani, akatora buwe raaiya akaita mutsamiro, akaridzimika kuita sika, wakadurura mafuta padera paro.

¹⁹ Wakadudza zina reiyo ndau kuti Bhetheri; asi zina reiro dhorobha raizwi Ruzi pakutanga.

²⁰ Zvino Jakobe wakapika mhiko echiti, “Kudai Mwari echizoa neni, andingwarire munjira iyi yendinohamba, andipe chingwa chokudya nemachira okusimira,

²¹ kuti ndipetukezve kumhatso yababa angu mukunyarara, naapo Mambo Mwari unozoita Mwari wangu,

²² neiri buwe rendadzimika kuita sika, rinozoita mhatso yaMwari; kwezviri zveshe zvounozondipa, ngegwinyiso ndinozopa chimwe chegumi kwouri.”