Gen. 27 - Bhaibheri Rakachena muChindau

Isaka Unofumisa Jakobe

¹ Naapo Isaka aamusharuka, nemadziso ake apofomadzwa asikachakoni kuona, wakadaidza Isau mukororo wake mukuru, akati kwaari, “Mukororo wangu;” naye wakati, “Ndiri pano.”

² Wakati, “Wona, zvino ndaa musharuka; andirizii zuva rokufa kwangu.

³ Ndizvo zvino, ndapota, tora zvokuvhima ndizvo nechikomwe chako nouta hwako, uende mushango, undiuraire mhuka.

⁴ Undibikire nyama inonasa kunaka, yendinoda, uiunze kwendiri kuti ndidye; kuti ndikufumise ndisati ndafa.”

⁵ Zvino Rebheka wakazwa apo Isaka echiereketa kunaIsau mukororo wake. Ndizvo apo Isau aenda mushango koovhima mhuka nokuiunza,

⁶ Rebheka wakaereketa kunaJakobe mukororo wake echiti, “Wona, ndazwa baba ako vechiereketa kunaIsau mukoma wako vechiti,

⁷ ‘Ndiunzire mhuka yomushango, undibikire nyama inonasa kunaka, kuti ndiidye, ndikufumise pamberi paMambo Mwari ndisati ndafa.’

⁸ Ndizvo zvino, mukororo wangu, purutana izwi rangu kudai ngezvendinokupanga.

⁹ Enda zvino kuzvifuyo, undiunzire zvimbudzana zviiri zvakanaka; neni ndinozobikira baba ako ndizvo nyama inonasa kunaka iyo yevanoda;

¹⁰ newe unozoenda nayo kunababa ako, kuti vadye, vakufumise vasati vafa.”

¹¹ Asi Jakobe wakati kunaRebheka mai ake, “Wonai, Isau mukoma wangu munhu une mamviri, neni ndiri munhu wakangwizira.

¹² Pamweni baba angu vanozondiambamira, neni ndinozooneka kwaari ndiri muchengedzeri; ndinozounza kutukwa padera pangu, haiwa kufumiswa.”

¹³ Mai ake vakati kwaari, “Kutukwa kwako ngakuuye padera pangu, mukororo wangu; kwega purutana izwi rangu, enda uzviunze kwendiri.”

¹⁴ Ndizvo wakaenda, akazvitora, akazviunza kunamai ake; namai ake vakabika nyama inonasa kunaka kudai ngezvevaida baba ake.

¹⁵ Zvino Rebheka wakatora zvokusimira zvakanaka zvomukororo wake mukuru Isau, zvaaiya nazvo mumhatso, wakazvipfekesa Jakobe mukororo wake mudoko.

¹⁶ Akapfekesa matoo embudzana mumioko yake nomumutsipa mwake mwakangwizira.

¹⁷ Wakapa munyara yomukororo wake Jakobe nyama inonasa kunaka nechingwa, zvaaiya abika.

¹⁸ Ndizvo wakaenda kunababa ake, akati, “Baba angu;” navo vakati, “Ndiri pano; ndiwe anani, mukororo wangu?”

¹⁹ Jakobe wakati kunababa ake, “Ndini Isau dangwe rako; ndaita kudai ngezvowandironzera; miruka, ndapota, mugare kudya nyama yemhuka yomushango, kuti mweya wako undifumise.”

²⁰ Asi Isaka wakati kunomukororo wake, “Wakasira ngenyi kuiona kudai, mukororo wangu?” Naye wakati, “Ngokuti Mambo Mwari, Mwari wako wandipa kubudirira.”

²¹ Isaka wakati kunaJakobe, “Kwedzera pasinde, ndinokupota, kuti ndikuambamire, mukororo wangu, kuti ndiwe mukororo wangu emene Isau here nokuti haiwa.”

²² Jakobe wakakwedzera pasinde kunaIsaka baba ake; naye wakamuambamira, akati, “Izwi, izwi raJakobe, asi nyara inyara dzaIsau.”

²³ Aazi kumuzia ngokuti nyara dzake dzaiya nemviri kudai ngenyara dzomukoma wake Isau, ndizvo wakafumisa.

²⁴ Wakati, “Uri mukororo wangu emene Isau here?” Iye wakati, “Ndini.”

²⁵ Wakati, “Iunze pasinde pangu, neni ndinozodya nyama yomukororo wangu yomushango ndikufumise.” Iye wakaiunza pasinde pake, naye wakadya, akamuunzira vhini, akarimwa.

²⁶ Zvino baba ake Isaka vakati kwaari, “Kwedzera zvino undichingamidze ngomuromo, mukororo wangu.”

²⁷ Ndizvo wakakwedzera pasinde, akamuchingamidza ngomuromo; wakazwa gwema rezvokusimira zvake, akamufumisa, akati, “Wona, gwema romukororo wangu rakadai ngegwema romushango rakafumiswa ndiMambo Mwari.

²⁸ Mwari ngaakupe beto romudenga, nyika yakavhundira, zviyo zvakawanda nevhini.

²⁹ Vanhu ngavakushandire, nemadzinza akugwadamire. Ita mambo padera pevanun'una vako, nevakororo vamai ako ngavakugwadamire. Ngavatukwe veshe vanokutuka, ngavafumiswe veshe vanokufumisa!”

Isau Unopota kuti Afumiswe ndiIsaka

³⁰ Naapo Isaka apedza kufumisa Jakobe, naapo Jakobe echitobuda kubva pamberi paIsaka baba ake, Isau mukoma wake wakapotera echibva koovhima kwake.

³¹ Wakabikawo nyama inonasa kunaka, akaiunza kunababa ake. Akati kunababa ake, “Baba angu ngavamiruke, vadye nyama yomukororo wavo yomushango, kuti mwoyo wavo undifumise.”

³² Isaka baba ake vakati kwaari, “Ndiwe anani?” Wakati, “Ndini mukororo wako, dangwe rako Isau.”

³³ Zvino Isaka wakahuta kakurutu, akati, “Ndiani zvino uwo wakavhima mhuka yomushango, akaiunza kwendiri, neni ndaidya yeshe usati waguma iwewe, neni ndamufumisa? Eya, naye unozofumiswa.”

³⁴ Naapo Isau azwa mazwi ababa ake, wakachema kakurutu kunorwadza mwoyo, akati kunababa ake, “Ndifumisei neniwo, baba angu!”

³⁵ Wakati, “Munun'una wako wauya ngourimbwi, watora chidakadziso chako.”

³⁶ Isau wakati, “Iye aazi kunasa kududzwa here kudai ngezvinosisira kuti Jakobe? Ngokuti wandipambira mikuwo miiri iyi. Wakatora nhaka youdangwe hwangu; wonai, zvino wanditorera chifumiso changu.” Zvino wakati, “Auzi kusara nechifumiso changu here?”

³⁷ Isaka wakapingura, akati kunaIsau, “Ringira, ndamuita mambo wako, nehama dzake dzeshe ndapa kwaari kuti vaite varanda; ngezviyo nevhini ndamugwinyisa, zvino chiinyi chendingaita kwouri, mukororo wangu?”

³⁸ Isau wakati kunababa ake, “Mune chifumiso chimwe here, baba angu? Ndifumiseiwo neni, A baba angu!” Isau wakachema kakurutu.

³⁹ Zvino Isaka baba ake vakapingura, vakati kwaari, “Ringira, kugara kwako kunozoita kuretu nemafuta enyika nebeto rinobva mudenga.

⁴⁰ Newe unozopona ngebanga remakara rako, unozoshandira munun'una wako; asi apo pounozodzisunhura iwewe, unozopwanya joka rake kubva mumutsipa wako.”

⁴¹ Zvino Isau wakanyenya Jakobe ngendaa yechifumiso chaakafumiswa ndicho ndibaba ake; naIsau wakati mumwoyo mwake, “Mazuva okuchema baba angu aapasinde; naapo ndinozouraya munun'una wangu Jakobe.”

⁴² Asi mazwi aIsau mukororo wake mukuru akaronzerwa kunaRebheka; ndizvo wakatuma akadaidza Jakobe mukororo wake mudoko, akati kwaari, “Ringira, mukoma wako Isau unodziembedzera ngokuronga kukuuraya.

⁴³ Ndizvo zvino, mukororo wangu, purutana izwi rangu; miruka, utizire Harani kunaRabhani mukoma wangu;

⁴⁴ ugare naye mazuva mashomani metsa ushungu hwomukoma wako hwapera.

⁴⁵ Naapo ushungu hwomukoma wako hwapera kubva kwouri, ariyarwa zvewakaita kwaari, ndinozotumira kuti ndikutore kubveyo. Ndingatorerwa ngenyi mweshe ngezuva rimwe?”

Isaka Unotumira Jakobe kwaRabhani

⁴⁶ Zvino Rebheka wakati kunaIsaka, “Ndaremba ngokupona kwangu ngendaa yevakadzi vevaHiti; kudai Jakobe echizoroora umwe wevakadzi vevaHiti wakadai ngaava vakadzi venyika, kupona kwangu kunozondidetserenyi?”