Gen. 26 - Bhaibheri Rakachena muChindau

Isaka Echigara paGera

¹ Zvino kwakaita nzara munyika, isikazi kudai ngenzara yaiyapo pamazuva aAbrahama. Isaka wakaenda muGera kunaAbhimerekhi mambo wevaFiristia.

² Mambo Mwari wakaoneka kwaari, akati, “Usadzaka Egipite; gara munyika iyo yendinozokuronzera.

³ Ita chigarandimo munyika iyi, neni ndinozoapo newe, ndinozokufumisa; ngokuti ndinozopa idzi nyika dzeshe kwouri nokumibarirwana yako, ndinozogwinyisa mhiko yendakapika kunaAbrahama baba ako.

⁴ Ndinozowanza mibarirwana yako kudai ngenyeredzi dzomudenga, ndinozopa kumibarirwana yako nyika idzi dzeshe; kubudikidza ngemibarirwana yako madzinza eshe enyika anozofumiswa,

⁵ ngokuti Abrahama wakapurutana izwi rangu, akangwarira kupanga kwangu, mirau yangu, zviemeso zvangu nezvironzo zvangu.”

⁶ Ndizvo Isaka wakagara muGera.

⁷ Naapo vanhu vendau iyo vamubvunza ngendaa yomukadzi wake, wakati, “Mukunda wangu,” ngokuti wakatya kuronza kuti, “Mukadzi wangu;” echiti, “Pamweni vanhu vendau iyi vanozondiuraya ngendaa yaRebheka, ngokuti waiya akanaka pakuringirika.”

⁸ Naapo aiya agarapo mukuwo wakareba, Abhimerekhi mambo wevaFiristia wakaringira ngepafasitera, akaona, Isaka waitamba naRebheka mukadzi wake.

⁹ Abhimerekhi wakadaidza Isaka, akati, “Ringira, mukadzi wako! Wakaronza ngenyi kuti ‘Mukunda wangu?’ ” Isaka wakati kwaari, “Ngokuti ndakapinimidza kuti pamweni ndingazofa ngendaa yake.”

¹⁰ Abhimerekhi wakati, “Chiinyi ichi chowaita kwetiri? Kwaizoitika, kuti umwe wevanhu waidai akaatana nomukadzi wako, newe waizounza ndaa padera pedu.”

¹¹ Abhimerekhi wakapanga vanhu vake veshe echiti, “Uwo unozogwama uyu munhu nokuti mukadzi wake, ngegwinyiso unozourawa.”

¹² NaIsaka wakakusha mbeu munyikayo, akakukura ngeiro gore zana rakapetwa kune zvakakushwa. Mambo Mwari wakamufumisa.

¹³ Munhu wakaita gurudza, wakaangirira kuuyirwa nokuuyirwa metsa waita gurudza gurutu.

¹⁴ Waiya nepfuma yemakwai, n'ombe nehloko zhinji, nevaFiristia vakaita ndurumwa ndiye.

¹⁵ Zvino vaFiristia vaiya vafushira zvinyuka zveshe zvakatsiwa ngehloko dzababa ake ngemazuva aAbrahama baba ake, vakazvizarisa ngemavhu.

¹⁶ NaAbhimerekhi wakati kunaIsaka, “Ibva kwetiri, ngokuti waita mukuru kakurutu kupinda isusu.”

¹⁷ Ndizvo Isaka wakabvapo, akaemesa tende rake mubani reGera, akagarapo.

¹⁸ Isaka wakatsazve zvinyuka zvemvura, izvo zvaiya zvakatsiwa ngemazuva aAbrahama baba ake; ngokuti vaFiristia vakazvifushira ngesure kwokufa kwaAbrahama, wakazvidudza mazina awo ezvakadudzwa ndibaba ake.

¹⁹ Asi hloko dzaIsaka dzakatsa mubani, dzakaonapo chinyuka chemvura chinoveruka mvura,

²⁰ vaushi veGera vakaambana nevaushi vaIsaka vechiti, “Mvura ngeyedu.” Ndizvo wakadudza zina rechinyuka kuti Eseki, ngokuti vakaita hasha naye.

²¹ Ndizvo vakatsa chinyuka chimweni, vakaambanazve ndicho; naye wakadudza zina racho kuti Sitina.

²² Naye wakabvapo, akatsa chinyuka chimweni; navo avazi kuambana ngendaa yacho; wakadudza zina racho kuti Rehobhoti; wakati, “Ngokuti zvino Mambo Mwari wakatiitira ndau, nesu tinozowanda munyika.”

²³ Wakabvapo akakwira kuenda Bheeri-shebha.

²⁴ Mambo Mwari wakaoneka kwaari ngouhwo usiku, akati, “Ndiri Mwari waAbrahama baba ako; usatya, ngokuti ndinewe, ndinozokufumisa, ndiwanze mibarirwana yako ngendaa yomuranda wangu Abrahama.”

²⁵ Ndizvo wakaakapo arita, akakumbira ngezina raMambo Mwari, wakaemesapo tende rake. Nehloko dzaIsaka dzakatsapo chinyuka.

Chitenderano chaIsaka naAbhimerekhi

²⁶ Zvino Abhimerekhi wakaenda kwaari kubva Gera, naAhuzathi mhangamazano yake, naFikori nduna yehondo yake.

²⁷ Isaka wakati kwaari, “Mwauyirenyi kwendiri, kwechioneka kuti munondinyenya, mwakandidzinga kuti ndibve kwomuri?”

²⁸ Vakati, “Taona pamhene kuti Mambo Mwari unewe, ndizvo tinoti, ‘Zvino ngakuapo mhiko pakati pako nesu, ngatiite chitenderano newe,

²⁹ kuti usazotishaishira, kudai tisu tisikazi kukugwama, kudai ngezvetisikazi kukuitira chiro asi zvakanaka, tikakuendisa mukunyarara. Zvino iwewe ndiwe wakafumiswa waMambo Mwari.’ ”

³⁰ Wakavanasirira dhiri, vakadya nokumwa.

³¹ Vakafumira kumiruka mangwanani, vakapika mhiko umwe kunoumweni; naIsaka wakavaendisa, vakaenda kubva kwaari mukunyarara.

³² Ngezuva ririro hloko dzaIsaka dzakauya, dzikamuronzera ngendaa yechinyuka chedzakatsa, dzikati kwaari, “Taiona mvura.”

³³ Wakachidudza kuti Shibha; ndizvo zina redhorobha rinodaidzwa kuti Bheeri-shebha metsa nanyamashi.

Isau Unoroora Vakadzi Vapara

³⁴ Naapo Isau aane makore makumi marongomuna (40), wakaroora mukadzi Judhithi mwanasikana waBheeri muHiti, naBhasemathi mwanasikana waEroni muHiti,

³⁵ navo vakaita dambudziko mukupona kwaIsaka nekwaRebheka.