Gen. 25 - Bhaibheri Rakachena muChindau

Mibarirwana yaAbrahama Imweni

¹ Abrahama wakaroora mukadzi umweni, zina rake raizwi Ketura.

² Wakamubarira Zimrani, Jokishani, Medhani, Midhiani, Ishibhaki naShua.

³ Jokishani wakabara Shebha naDhedhani. Vakororo vaDhedhani vaiya Ashurimu, Retushimu naReumimu.

⁴ Vakororo vaMidhiani ndiEfa, Efe, Hanokhi, Abhidha naEridhaa. Veshe ava vaiya vana vaKetura.

⁵ Abrahama wakapa zveshe zvaaiya nazvo kunaIsaka.

⁶ Asi kuvakororo vemabunha aaiya nawo, Abrahama wakavapa zvipo; akavaita kuti vabve kunaIsaka mukororo wake, achapona, kuenda kumabvazuva kunyika yokumabvazuva.

Kufa noKuikwa kwaAbrahama

⁷ Aya ndiwo mazuva nemakore okurarama kwaAbrahama, makore zana nemakumi manomwe namashanu (175).

⁸ Abrahama wakafema kwokugumisira, akafa aamusharuka kakurutu, nemakore mazhinjitu; wakaunganidzwa kune vanhu vake.

⁹ Isaka naIshumaeri vakororo vake vakamuika mubako reMakhipera, mumunda waEfroni mukororo waZoha muHiti, pakaringirana neMamure.

¹⁰ Munda uwo waakatenga Abrahama kubva kuvaHiti, ndimwo mwaakaikwa Abrahama naSara mukadzi wake.

¹¹ Ngesure kwokufa kwaAbrahama Mwari wakafumisa Isaka mukororo wake; naIsaka wakagara paBheeri-rahai-roi.

Mibarirwana yaIshumaeri

¹² Iyi ndiyo mibarirwana yaIshumaeri mukororo waAbrahama waakabarirwa Abrahama ndiHaga muEgipite hloko yaSara.

¹³ Aya ndiwo mazina evakororo vaIshumaeri, anodudzwa ngokuteererana kudai ngokubarwa kwavo, dangwe raIshumaeri ndiNebhaiothi, Khedha, Adhibheeri, Mibhisamu,

¹⁴ Mishima, Dhuma, Masa,

¹⁵ Hadhadhi, Thema, Jeturi, Nafishi naKedhema.

¹⁶ Ava ndivo vakororo vaIshumaeri, naaya ndiwo mazina avo, ngokuteererana kwemaguta avo nepamatende avo; vaiya vazvare gumi navairi ngokuteererana kwemadzinza avo.

¹⁷ Aya ndiwo makore okurarama kwaIshumaeri, makore zana nemakumi matatu namanomwe (137); iye wakafema kwokugumisira akafa; wakaunganidzwa kune vanhu vake.

¹⁸ Navo vakagara kubvira Havhira kuguma Shuri iyo yakaringirana neEgipite, ngenjira inoenda Asiria; wakagara akaringisana nehama dzake dzeshe.

Kubarwa kwaIsau naJakobe

¹⁹ Iyi ndiyo mibarirwana yaIsaka, mukororo waAbrahama; Abrahama ndiye baba vaIsaka.

²⁰ Isaka waiya aane makore makumi marongomuna (40) apo paakaroora Rebheka, mwana waBhethueri muAramu wePadhana-aramu, mukunda waRabhani muAramu.

²¹ NaIsaka wakakumbirira mukadzi wake kunaMambo Mwari, ngokuti waiya ngomwa, naMambo Mwari wakaashira mukumbiro wake, naRebheka mukadzi wake wakaita mimba.

²² Vana vakaphinyaukirana mukati mwake; wakati, “Kuti zvakadaro, ndinoponerenyi?” Wakaenda koobvunza Mambo Mwari.

²³ Mambo Mwari wakati kwaari, “Madzinza mairi ari mundani yako, nevanhu vairi vanobarwa ndiwe vanozoparadzana; umwe unozogwinya kupinda umweni, nomukuru unozoshandira mudoko.”

²⁴ Naapo mazuva ake okubara akwana, wonai, manyambiri aiya mundani yake.

²⁵ Dangwe rakabuda riri shava, muiri waro weshe wakadai ngechokufuka chine mviri; vakadudza zina rake kuti Isau.

²⁶ Ngesure kwake munun'una wake wakabuda, nenyara yake yaiya yakabata chisisinho chaIsau; nezina rake rakadudzwa kuti Jakobe. Isaka waiya aane makore makumi matanhatu (60) apo paakavabara.

Isau Unotengesa Udangwe Hwake

²⁷ Naapo varumbwana vakura, Isau waiya muvhimi mukuru, munhu womushango; naJakobe waiya munhu wakanyararisa, waigara mumatende.

²⁸ Isaka wakada Isau, ngokuti waidya nyama dzake dzaaivhima, asi Rebheka wakada Jakobe.

²⁹ Kamwe apo Jakobe paakabika muriwo, Isau wakauya echibva mushango, waiya ademera.

³⁰ Isau wakati kunaJakobe, “Ndipe, ndidye, ndapota, uwo muriwo wakatsvuka; ngokuti ndademera!” Ndizvo zina rake rakadudzwa kuti Edhomu.

³¹ Jakobe wakati kwaari, “Kutanga nditengesere udangwe hwako.”

³² Isau wakati, “Wona, inini ndiri pasinde pokufa; udangwe hunozondidetserenyi?”

³³ Jakobe wakati, “Pika kwendiri kutanga.” Ndizvo wakapika kwaari, akatengesa udangwe hwake kunaJakobe.

³⁴ Zvino Jakobe wakapa Isau chingwa nomuriwo worupiza, naye wakadya, akamwa, akamiruka, akaenda ngenjira yake. Ngokudaro Isau wakashoora udangwe hwake.