Gen. 24 - Bhaibheri Rakachena muChindau

Mukadzi waIsaka

¹ Abrahama waiya aamusharuka, atigwedere ngouwandu hwemakore; naMambo Mwari waiya afumisa Abrahama ngezviro zveshe.

² NaAbrahama wakati kuno muranda wake, mukuru wemhatso yake, uwo waitonga padera pazvo zveshe zvaaiya nazvo, “Isa, ndinokupota, nyara yako pashi pechizva changu,

³ neni ndinozokupikisa ndiMambo Mwari, Mwari womudenga nomunyika, kuti auzotori mukadzi womukororo wangu kubva kuvakunda vevaKhenani, avo vendinogara pakati pavo,

⁴ asi unozoenda kunyika yangu nokuhama dzangu, utoreyo mukadzi womukororo wangu Isaka.”

⁵ Nomuranda wakati kwaari, “Pamweni mukadzi aazotendi kunditeera kuuya kunyika iyi; kunosisira here kuti ndihwirinze mukororo wako kunyika yowakabva kweiri?”

⁶ Abrahama wakati kwaari, “Ngwarira kuti usazohwirinzeyozve mukororo wangu.

⁷ Mambo Mwari, Mwari womudenga, uwo wakandibvisa kubva kumhatso yababa angu nokubva kunyika yechibarirwe changu, uwo wakaereketa kwendiri akapikazve kwendiri, echiti, ‘Ndinozopa iyi nyika kune mibarirwana yako’ iye unozotuma ngirosi yake kukutungamirira, newe unozotora kubveyo mukadzi womukororo wangu.

⁸ Asi kudai mukadzi asikazotendi kukuteera, naapo unozosunhurika kune mhiko yangu iyi; asi usazohwirinzeyo mukororo wangu.”

⁹ Ndizvo muranda wakaisa nyara yake pashi pechizva chaAbrahama mambo wake, akapika kwaari ngeiyi ndaa.

¹⁰ Zvino muranda wakatora makamera gumi kubva kumakamera amambo wake, akaenda; akatora zvipo zvembeu dzeshe zvakapinda kunaka kubva kunamambo wake; wakamiruka, akaenda Mesopotamia kudhorobha raNaho.

¹¹ Wakaita kuti makamera agwadame pashi pachinyuka chemvura kubanze kwedhorobha, ngomukuwo wemadeekoni, mukuwo wevanobuda vakadzi koochera mvura.

¹² Wakati, “A Mambo Mwari, Mwari wamambo wangu Abrahama, ndipei kubudirira nyamashi, ndinomukumbira, muonise nyasha kunamambo wangu Abrahama.

¹³ Ringira, ndinoema pachinyuka chemvura, nevanasikana vevanhu vedhorobha vanobuda kuchera mvura.

¹⁴ Ngakuitike kuti musikana uwo wendinozoti kwaari, ‘Dzasa nhuvi yako, ndapota, kuti ndimwe;’ naye unozoti, ‘Imwa, neni ndinozopazve makamera ako mvura yokumwa;’ uwo ngaaite wowakaemesera muranda wako Isaka. Ngeizvi ndinozozia kuti waonisa nyasha kunamambo wangu.”

¹⁵ Asati apedza kuereketa, wona, Rebheka, uwo wakabarirwa Bhethueri mukororo waMirikha, mukadzi waNaho, munun'una waAbrahama, wakagumapo ane nhuvi yake papfudzi rake.

¹⁶ Musikana uwo waiya akanaka kuringirika, ari mhandwe, akunazve mwamuna waiya amuzia; wakadzaka kuchinyuka, akazadza nhuvi yake, akakwira.

¹⁷ Zvino muranda wakarumba kooshongana naye, akati, “Ndinokupota, ndipe, ndimwe mvura shomani kubva munhuvi yako.”

¹⁸ Naye wakati, “Imwai, mambo wangu;” wakakasira, akadzasa nhuvi yake padera penyara yake, akamupa kuti amwe.

¹⁹ Naapo apedza kumupa mvura yokumwa, wakati, “Ndinozochera mvura yemakamera ako nawo, metsa apedza kumwa.”

²⁰ Ndizvo wakakasira, akadurura nhuvi yake muchidziyo chokumwira, akarumbazve kuchinyuka koochera, akacherera makamera ake eshe.

²¹ Munhu wakamuringisisa mukunyarara, kuti azie kuti Mambo Mwari waita here kuti rwendo rwake rubudirire nokuti haiwa.

²² Naapo makamera apedza kumwa, wakatora mhete yomukore ine hafu yeshekeri kurema kwayo, nemabhengere mairi omumioko yake anoita mashekeri gumi omukore kurema kwawo.

²³ Wakati, “Uri mwana waani? Ndironzere. Mune ndau here mumhatso yababa ako kuti ndiatemwo?”

²⁴ Wakati kwaari, “Ndiri mwanasikana waBhethueri mukororo waMirikha, waakabarira Naho.”

²⁵ Wakatizve kwaari, “Tinazvo zveshe mwenje nezviyo zvinokwana, nekamera rokuata.”

²⁶ Munhu wakakotama pashi soro rake, akadira Mambo Mwari,

²⁷ akati, “Unomuchena Mambo Mwari, Mwari wamambo wangu Abrahama, uwo usikazi kurekera nyasha dzake nokugondeka kwake kunamambo wangu. Asi inini Mambo Mwari wakanditungamirira munjira kuuya kumhatso yomunun'una wamambo wangu.”

²⁸ Zvino musikana wakarumba, akaronzera vemhatso yamai ake ngezviro izvi.

²⁹ Rebheka waiya nomukoma, zina rake raizwi Rabhani; naRabhani wakarumba kuenda kuno munhuwo kuchinyuka.

³⁰ Naapo aona mhete nemabhengere mumioko yomukunda wake, naapo azwa mazwi aRebheka mukunda wake echiti, “Ndizvo zvakaereketa munhu kwendiri;” wakaenda kuno munhu; akamuona akaema pane makamera pachinyuka.

³¹ Wakati, “Potera, iwewe wakafumiswa waMambo Mwari; unoema ngenyi kubanze? Ngokuti ndanasira mhatso nendau yemakamera.”

³² Ndizvo munhu wakapotera mumhatso, naRabhani wakasunhura makamera, akaapa mwenje nezviyo zvemakamera, nemvura yokushamba tsoka dzake netsoka dzevanhu avo vaiya naye.

³³ Zvino kwakagadzikwa kudya pamberi pake kuti adye, asi wakati, “Andizodyi metsa ndaronza zvendatumirwa.” Iye wakati, “Ereketa.”

³⁴ Ndizvo wakati, “Ndiri muranda waAbrahama.

³⁵ Mambo Mwari wakafumisa mambo wangu kakurutu, naye waita mukuru; wakamupa makwai, n'ombe, sirivha nomukore, varanda vamuna nevakadzi, makamera nembongoro.

³⁶ Sara mukadzi wamambo wangu wakamubarira mukororo mambo wangu, apo aiya achembera; kwaari wakamupa zveshe zvaanazvo.

³⁷ Mambo wangu wakaita kuti ndipike echiti, ‘Usazotorera mukororo wangu mukadzi kubva kuvanasikana vevaKhenani, avo vendinogara munyika yavo,

³⁸ asi unozoenda kumhatso yababa angu nokuhama dzangu, utoreyo mukadzi womukororo wangu.’

³⁹ Ndakati kunamambo wangu, ‘Pamweni mukadzi aazotendi kunditeera.’

⁴⁰ Asi wakati kwendiri, ‘Mambo Mwari, uwo wendinohamba pamberi pake, unozotuma ngirosi yake newe, kuti ubudirire munjira yako; newe unozotora mukadzi womukororo wangu kubva kune hama dzangu nokumhatso yababa angu.

⁴¹ Naapo unozosunhurika kubva kumhiko yangu, naapo waguma kuhama dzangu; kunyazwi dzisikazomupi kwomuri, unozosunhurika kubva kumhiko yangu.’

⁴² “Ndaguma nyamashi pachinyuka, ndikati, ‘Mambo Mwari, Mwari wamambo wangu Abrahama, kudai zvino mwechida kubudiririsa rwendo rwangu.

⁴³ Wonai, ndakaema pachinyuka chemvura; ngakuitike kuti mhandara inobuda kuzochera mvura, yendinozoti kweiri, “Ndipewo, ndapota, zvimvura kubva munhuvi yako ndimwe.”

⁴⁴ Nayo inozoti kwendiri, “Imwai, neni ndinozochererawo makamera enyu,” uwo ngaaite mukadzi waakaemesera Mambo Mwari kumukororo wamambo wangu.’

⁴⁵ “Ndisati ndapedza kuereketa mumwoyo mwangu, wonai, Rebheka wakabuda nenhuvi yake pafudzi rake; wakadzaka kuchinyuka, akachera. Ndakati kwaari, ‘Ndapota, ndipeiwo ndimwe.’

⁴⁶ Wakakasira, akadzasa nhuvi yake kubva pafudzi rake, akati, ‘Imwai, neni ndinozopawo makamera enyu kuti amwe,’ ndizvo ndakamwa naye wakaita kuti makamera amwewo.

⁴⁷ Ndakamubvunza ndechiti, ‘Uri mwanasikana waani?’ Naye wakati, ‘Ndiri mwanasikana waBhethueri, mukororo waNaho, uwo waakabarirwa ndiMirikha.’ Ndizvo ndaisa mhete pamiro yake nemabhengere pamioko yake.

⁴⁸ Ndakakotamisa soro rangu, ndikadira Mambo Mwari, ndikakudza Mambo Mwari, Mwari wamambo wangu Abrahama, uwo wakanditungamirira ngenjira yakanaka kuti nditore mwanasikana womunun'una wamambo wangu kuita mukadzi womukororo wake.

⁴⁹ Zvino kudai mwechida kuzoitira mambo wangu nyasha negwinyiso, ndironzerei; kudai musikaiti kudaro, ndironzerei; kuti ndikunukukire kuenda kumudyo nokuti kumuoshwe.”

⁵⁰ Zvino Rabhani naBhethueri vakapingura, vakati, “Ichi chiro chinobva kunaMambo Mwari. Isusu atikoni kuereketa kwouri zvakashata nokuti zvakanaka.

⁵¹ Ringira, Rebheka uri pamberi pako, mutore, uende, ngaaite mukadzi womukororo wamambo wako, kudai ngezvaakaereketa Mambo Mwari.”

⁵² Naapo muranda waAbrahama azwa mazwi avo, wakadzikotamisa pashi pamavhu pamberi paMambo Mwari.

⁵³ Nomuranda wakabudisa zvinemeso zvesirivha, zvomukore nezvokusimira, akazvipa kunaRebheka, wakapawo zviro zvinomutengo mukuru kuno mukoma wake nokuna mai ake.

⁵⁴ Navo vakadya nokumwa, iye nevamuna vaiya naye, vakapedzapo usiku hweshe. Naapo vamuka mangwanani, wakati, “Nditenderenyi kuti ndiende kunamambo wangu.”

⁵⁵ Mukoma wake namai ake vakati, “Musikana ngaambogara nesu mazuva mashomani, anyaita mazuva gumi; ngesure kwawo unozoenda.”

⁵⁶ Asi wakati kwavari, “Musandinonosa, ngokuti Mambo Mwari wakaita kuti rwendo rwangu rubudirire; nditenderenyi kuti ndiende kunamambo wangu.”

⁵⁷ Vakati, “Tinozodaidza musikana, timubvunze.”

⁵⁸ Vakadaidza Rebheka, vakati kwaari, “Unozoenda here nomunhu uyu?” Wakati, “Ndinozoenda.”

⁵⁹ Ndizvo vakaendesa Rebheka mukunda wavo nomureri wake, nomuranda waAbrahama nevanhu vake.

⁶⁰ Vakafumisa Rebheka, vakati kwaari, “Iwewe mukunda wedu, ita mai wemakumi emazana gumi, nemibarirwana yako ngainyise madhorobha eavo vanoinyenya!”

⁶¹ Zvino Rebheka nevasikana vake vakamiruka, vakagadha padera pemakamera, vakateera munhuwo. Nomuranda wakatora Rebheka, akaenda rwendo rwake.

⁶² Zvino Isaka wakauya ngenjira yomushango reBheeri-rahai-roi, naye waigara muNegebhi.

⁶³ NaIsaka wakabuda koopinimidza mumunda madeekoni, wakamirudza madziso ake, akaringira, wona, makamera aiuya.

⁶⁴ NaRebheka wakamirudza madziso ake, naapo aona Isaka, wakadzaka kubva pakamera,

⁶⁵ akati kumuranda, “Ndiani munhu uwo unohamba mumunda kooshongana nesu?” Nomuranda wakati, “Ndimambo wangu.” Ndizvo wakatora jira, akaita mukutukutu.

⁶⁶ Nomuranda wakaronzera Isaka zveshe zvaakaita.

⁶⁷ Isaka wakamuunza mutende ramai ake, Sara, akatora Rebheka, naye wakaita mukadzi wake; wakamuda. Ndizvo Isaka wakaembedzerwa ngesure kwokufa kwamai ake.