Gen. 21 - Bhaibheri Rakachena muChindau

Kubarwa kwaIsaka

¹ Mambo Mwari wakahambira Sara kudai ngezvaakaronza, naMambo Mwari wakaita kunaSara kudai ngezvaakagondisa.

² NaSara wakaita mimba, wakabarira Abrahama mukororo aamusharuka kakurutu, ngomukuwo uwo wakaemeswa waakaereketa ndiwo Mwari kwaari.

³ Abrahama wakadudza zina romukororo wake, uwo wakabarirwa kwaari, waakamubarira Sara, kuti Isaka.

⁴ Abrahama wakacheka mukororo wake Isaka apo aane mazuva masere, kudai ngezvaakamupanga Mwari.

⁵ Abrahama waiya nemakore zana apo Isaka mukororo wake paakabarwa kwaari.

⁶ Sara wakati, “Mwari wakaita kuti ndisheke; ndizvo veshe vanozozwa vanozosheka pamwepo neni.”

⁷ Wakati, “Ndiani waizoronza kunaAbrahama kuti Sara unozoamwisa vana? Ngokuti ndamubarira mukororo aamusharuka kakurutu.”

⁸ Nomwana wakakura, akarumurwa; naAbrahama wakanasirira dhiri guru ngeiro zuva rakarumurwa Isaka.

Kudzingwa kwaHaga naIshumaeri

⁹ Asi Sara wakaona mukororo waHaga muEgipite waakabarira Abrahama, echiita jee naIsaka, mukororo wake.

¹⁰ Ndizvo wakati kunaAbrahama, “Dzinga uyu mukadzi hloko nomukororo wake, ngokuti mukororo womukadzi uyu hloko aazogari nhaka pamwepo nomukororo wangu, Isaka.”

¹¹ Ichi chiro chakarwadza kakurutu kunaAbrahama, ngendaa yomukororo wake.

¹² Asi Mwari wakati kunaAbrahama, “Usarwadziwa ngendaa yomurumbwana, nendaa yomukadzi wako uri hloko. Kunyazwi ngechiri chaanoronza Sara kwouri, chiite kudai ngezvaanoronza; ngokuti kubudikidza ndiIsaka rudzi rwako runozodaidzwa ngezina raIsaka.

¹³ Ndinozoitazve dzinza ngomukororo womukadzi hloko, ngokuti iye rudzi rwako.”

¹⁴ Ndizvo Abrahama wakamiruka mangwanani, akatora chingwa nenyede yemvura, akazvipa Haga, echiriisa papfudzi pake, nomwana, akamuendesa. Naye wakabvapo, akapepesheka mushango reBheeri-shebha.

¹⁵ Naapo mvura yaiya munyede yapera, wakaisa mwana pashi perimwe remapfiba.

¹⁶ Iye wakaenda akagara pashi pakaringirana naye kamuhambo kokuposhera musee kuendayo; ngokuti wakati, “Ndisazoona kufa kwomwana.” Naye wakagara akaringirana naye, akaboorera ngeizwi rake, echichema.

¹⁷ Mwari wakazwa izwi romurumbwana; nengirosi yaMwari yakadaidzira kunaHaga iri mudenga, yakati kwaari, “Chiinyi chinokutambudza, Haga? Usatya; ngokuti Mwari wazwa izwi romurumbwana apo paari.

¹⁸ Miruka, umirudze murumbwana, umutengure munyara dzako; ngokuti ndinozomuita dzinza guru.”

¹⁹ Zvino Mwari wakapembenudza madziso ake, akaona chinyuka chemvura; wakaenda akazadza nyede ngemvura, akaipa murumbwana kuti amwe.

²⁰ Mwari waiya nomurumbwana, wakakura; akagara mushango akaita muvhimi ngouta.

²¹ Naye wakagara mushango rePharani; namai ake vakamutorera mukadzi kubva kunyika yeEgipite.

Abrahama naAbhimerekhi Vanoita Chitenderano

²² Panguva iyo Abhimerekhi naFikori nduna yehondo yake vakati kunaAbrahama, “Mwari unewe kuneizvo zveshe zvounoita.

²³ Ndizvo zvino pika kwendiri panapa ndiMwari kuti auzondibati ngokuchengedzera inini nokuti mubarirwana wangu nokuti mubarirwana womukororo wangu, asi kudai ngenyasha dzandakaita kwouri, unozondiitira inini nokunyika youri chigarandimo kweiri.”

²⁴ NaAbrahama wakati, “Ndinozopika.”

²⁵ Abrahama wakagunun'unira Abhimerekhi ngendaa yechinyuka chemvura, icho chaiya chabvukwa ngesimba ngevaranda vaAbhimerekhi.

²⁶ Abhimerekhi wakati, “Andimuzii kuti ndiani wakaita ichi chiro; auzi kundironzera, neni andizi kumbozvizwa metsa nyamashi.”

²⁷ Ndizvo Abrahama wakatora makwai nen'ombe akazvipa Abhimerekhi, nevanhu vairi ava vakaita chitenderano.

²⁸ Abrahama wakapaura makwai makadzi manomwe akaaisa ega.

²⁹ NaAbhimerekhi wakati kunaAbrahama, “Chiinyi biningidzo remakwai makadzi manomwe ewaisa ega?”

³⁰ Iye wakati, “Makwai makadzi manomwe aya unozoatora kubva munyara yangu kuti aite chapupu kwendiri, kuti ndini ndakatsa ichi chinyuka.”

³¹ Ndizvo ndau iyo yakadudzwa zina kuti Bheeri-shebha; ngokuti apapo veshe vairi vakapikirana mhiko.

³² Ndizvo vakaita chitenderano paBheeri-shebha; Abhimerekhi naFikori nduna yehondo yake vakamiruka, vakahwirira kunyika yevaFiristia.

³³ Abrahama wakasima muti wemuthamarisiki muBheeri-shebha, akakumbirapo ngezina raMambo Mwari, Mwari wemhera nariini.

³⁴ Abrahama wakagara ari munhu mupara munyika yevaFiristia mazuva akawanda.