Gen. 19 - Bhaibheri Rakachena muChindau

Kushaisha kweSodhoma

¹ Ngirosi mbiri dzakaguma Sodhoma madeekoni; naRoti waiya akagara pamusiwo weSodhoma. Naapo Roti adziona, wakamiruka kooshongana nadzo, wakadzikotamisa pashi ngehope yake.

² Naye wakati, “Madzimambo angu, paukai ndinomupota, mupotere mumhatso yomuranda wenyu, mugare usiku hweshe, mushambe tsoka dzenyu; nemwi munozofumira kumiruka mwechienda rwendo rwenyu.” Dzakati, “Haiwa; asi tinozogara mupato usiku hweshe.”

³ Asi wakadzinyengerera kakurutu; nadzo dzakapauka kwaari dzikapinda mumhatso yake; akadzinasirira kudya, akabika zvingwa zvisina mumera, nadzo dzakadya.

⁴ Asi vasati vaata, vamuna vomudhorobha, vamuna veSodhoma, veshe majaha nevakuru, vamuna veshe metsa pamwamuna wokugumisira vakatendenedza mhatso.

⁵ Vakadaidzira kunaRoti, vakati kwaari, “Vari pari vamuna avo vapotera kwouri usiku huno? Vabudise kubanze kwetiri, kuti tivazie.”

⁶ Roti wakabuda pamusiwo kuenda kuvanhu, akakonya musiwo sure kwake,

⁷ naye wakati kwavari, “Ndinomupota, hama dzangu, musaita zvakashata kudaro.

⁸ Ringirai, ndine vasikana vairi vasikazi kumbozia mwamuna; ngandivabudise kwomuri, muite kwavari kudai ngezvinonakira mukuona kwenyu; asi kune ava vamuna musaita chiro, ngokuti vauya pashi pedenga rangu.”

⁹ Asi vakati, “Ema ngesure!” Navo vakati, “Uyu wakauya kuzogara muno ari munhu mupara, naye unoda kuita mutongi; zvino tinozoita zvakapinda kushata kwouri kune avo.” Navo vakamutsikirira kakurutu munhu uwo Roti, vakakwedzera kuti vapwanye musiwo.

¹⁰ Asi vamuna vakabudisa nyara dzavo, vakakweera Roti mukati mwemhatso kwavari, vakakonya musiwo.

¹¹ Vakapofomadza vamuna vaiya pamusiwo, veshe vadoko nevakuru; ngokudaro vakatambudzika ngokutsvaka musiwo.

Kubva kwaRoti muSodhoma

¹² Zvino vamuna vakati kunaRoti, “Une vamweni muno here ngepabanze peava? Vakwambo, vakororo vako, nevanasikana vako, kunyazwi ndiani wounaye mudhorobha muno, vabudise kubva mundau iyi;

¹³ ngokuti tinozoparadza ndau iyi, ngokuti kuchemerwa ngendaa yevanhu varo kwaita kwakakura pamberi paMambo Mwari; naMambo Mwari wakatituma kuti tiiparadze.”

¹⁴ Ndizvo Roti wakabuda kubanze, akaereketa kuvakwambo vake, avo vakaroora vana vake, akati, “Mirukai, mubude kubva mundau iyi, ngokuti Mambo Mwari unozoparadza dhorobha iri.” Asi vakwambo vake vakapinimidza kuti unoita jee.

¹⁵ Naapo kwooita mambakwedza, ngirosi dzakakasirisa Roti dzechiti, “Miruka, utore mukadzi wako nevanasikana vako vairi, vari pano, kuti usazoparadzwa mukushata kwedhorobha.”

¹⁶ Asi wakazungaira; vamuna avo vakabata nyara yake, nenyara yomukadzi wake, nenyara dzevanasikana vake vairi, Mambo Mwari echimuitira nyasha; vakamubudisa kubanze, vakamuisa ngokubanze kwedhorobha.

¹⁷ Naapo vaiya vavabudisa kubanze, vakati, “Tiza kuti upone; usaringira sure kwako, usagarazve mubani kunyazwi ngepari; tiza uende kumitunhu, kuti usazourawa.”

¹⁸ Roti wakati kwavari, “Haiwa, madzimambo angu

¹⁹ Wona zvino, muranda wako waona nyasha mukuona kwako, newe wakurisa nyasha dzako, dzewaonisa kwendiri ngokuponesa ndaramo yangu; asi andingatiziri kumitunhu, kuti kushata kusazondigumira, neni ndife.

²⁰ Ringira zvino, iri dhorobha riri pasinde kuti nditizire kweriri, naro idoko. A, nditendere nditiziremwo (asi arisidokopi here?) Nomweya wangu unozopona.”

²¹ Naye wakati kwaari, “Wona, ndakutenderawo; andizoparadzi dhorobha iro rowaereketa ndiro.

²² Kasira, tiziramwo; ngokuti andikoni kuita chiro usati wagumayo.” Ndizvo zina redhorobha iro rakadudzwa kuti Zoa.

²³ Zuva raiya rabuda padera penyika apo Roti paakapotera muZoa.

Kuparadzwa kweSodhoma neGomora

²⁴ Zvino Mambo Mwari wakanayisa padera peSodhoma neGomora surufa nomuriro zvinobva kunaMambo Mwari mudenga.

²⁵ Wakaparadza madhorobha awo nebani reshe, navo veshe vagari vemadhorobha awo, nezvaimera pamavhu.

²⁶ Asi mukadzi waRoti, ari sure kwake, wakaringira sure akaita chituka chomunyu.

²⁷ Abrahama wakafumira mangwanani kuenda kundau iyo yaaiya akaema pamberi paMambo Mwari;

²⁸ naye wakaringira Sodhoma neGomora, nokunyika yeshe yomubani, akaona chiushi chenyika chechipwititika kudai ngechiushi chechoto.

²⁹ Ndizvo zvakaitika, apo Mwari paakaparadza madhorobha omubani, Mwari wakakarakadza Abrahama, akabudisa Roti kubva pakati pezvakaparadzwa, apo paakaparadza madhorobha awo mwaigara Roti.

Maambo evaMoabhi nevaAmoni

³⁰ Zvino Roti wakakwira kubva Zoa, akagara mumitunhu, nevanasikana vake vairi, ngokuti waitya kugara muZoa. Wakagara mubako, iye nevanasikana vake vairi.

³¹ Zvino dangwe rakati kunomudoko, “Baba edu yaaharahwa, akuna mwamuna munyika ungazopotera kwetiri kudai ngomushuma wenyika yeshe.

³² Uya, ngatiite kuti baba edu vamwe vhini, nesu tinozoatana navo, kuti tingwarire rudzi rwababa edu.”

³³ Vakaita kuti baba avo vamwe vhini usiku uhwo, wedangwe wakapotera akaatana nababa ake; navo avazi kuzia apo paakaata pashi nokuti paakamuka.

³⁴ Mangwani mangwanani wedangwe wakati kuno mudoko, “Wona, ndakaatana usiku hwezuro nababa angu; ngatiite kuti vamwe vhini usiku hunozve; upotere iwewe uatane navo, kuti tingwarire rudzi rwababa edu.”

³⁵ Vakaita kuti baba avo vamwe vhini ngouhwo usikuzve, nomudoko wakamiruka, akaatana navo; navo avazi kuzia apo paakaata pashi nokuti paakamuka.

³⁶ Ngokudaro vanasikana veshe vaRoti vakaita mimba ndibaba avo.

³⁷ Wedangwe wakabereka mukororo, akadudza zina rake kuti Moabhi; ndiye wakaita baba wevaMoabhi metsa nanyamashi.

³⁸ Nomudoko wakaberekawo mukororo, akadudza zina rake kuti, Bhenami; ndiye wakaita baba wevana vaAmoni metsa nanyamashi.