Gen. 18 - Bhaibheri Rakachena muChindau

Abrahama Unogondiswa Mukororo

¹ Mambo Mwari wakaoneka kunaAbrahama pamiti yemiokhi yeMamure, apo paaiya akagara pamusiwo wetende ngomukuwo wokupisha kwezuva.

² Wakamirudza madziso ake akaringira, akaona, vamuna vatatu vakaema vakaringirana naye, naapo avaona, wakarumba kooshongana navo echibva pamusiwo wetende, akadzikotamisa pashi,

³ akati, “Mambo wangu ndapota, kudai zvino ndaona nyasha mukuona kwenyu, musapinda kuenda mberi kubva kuno muranda wenyu.

⁴ Mvura shomani ngaiunzwe, mushambe tsoka dzenyu, muzorore pashi pomuti,

⁵ apo ndechiunza chigurwa chechingwa, mugwinyise mwoyo yenyu; mwapedza munozopinda kuenda mberi, ngokuti mwauya pane muranda wenyu.” Navo vakati, “Ita kudai ngezvewaronza.”

⁶ Abrahama wakakasira kupotera mutende, mwaiya naSara, akati, “Kasira kunasira zvipimo zvitatu zvoufu hwakamoseka, uhukanye, uite zvingwa.”

⁷ Abrahama wakarumba kuenda kudanga, akaunza konyana rakapfaa, rakanuna, akaripa kumuranda; uwo wakakasira kurinasira.

⁸ Wakatora mukaka wakakora nomukaka mumbishi, nekonyana raaiya anasirira, akazvigadzika pamberi pavo; naye wakaema pasinde pavo pashi pomuti, navo vakadya.

⁹ Vakati kwaari, “Sara mukadzi wako uri pari?” Wakati, “Uri mutende.”

¹⁰ Wakati, “Ngegwinyiso ndinozopetuka kwouri ngomukuwo uyu waguma, naSara mukadzi wako unozoa nomukororo.” NaSara waipurutana ari pamusiwo wetende, uwo waiya sure kwake.

¹¹ Zvino Abrahama naSara vaiya vaavasharuka, vatigwedere ngouwandu hwemakore; nomuitiro wevakadzi waiya usikachaitiki kunaSara.

¹² Ndizvo Sara wakasheka mumwoyo mwake echiti, “Ndaachembere kudai, ndingadakara here, nemwamuna wangu aaharahwa naye?”

¹³ Mambo Mwari wakati kunaAbrahama, “Ngenyi Sara asheka nokuronza kuti, ‘Ngegwinyiso inini ndinozobara mwana here, ndaachembere kudai?’

¹⁴ Chiripo here chinonyanya kukonza kunaMambo Mwari? Ngomukuwo wakaemeswa ndinozopetuka kwouri, apo nguva yaguma, Sara unozobara mukororo.”

¹⁵ Asi Sara wakaramba echiti, “Andizi kusheka;” ngokuti waitya. Wakati, “Haiwa, asi washeka.”

Abrahama Unovapota ngendaa yeSodhoma

¹⁶ Zvino vanhu avo vakamiruka kubvapo, vakaringira Sodhoma, naAbrahama wakahamba navo kuvaperekedza parwendo rwavo.

¹⁷ Mambo Mwari wakati, “Ndinozofishira Abrahama zvendinoda kuita here,

¹⁸ zvechioneka kuti ngegwinyiso Abrahama unozoita dzinza guru rine simba, nemadzinza eshe enyika anozofumiswa mwaari?

¹⁹ Haiwa, ngokuti ndakamutsanangura kuti apange vana vake nevemhatso yake vanozouya sure kwake, kuti vangwarire njira yaMambo Mwari, kuti vaite zvakarurama nokutonga kwakanaka; kuti Mambo Mwari aunze padera paAbrahama izvo zvaakamugondisa.”

²⁰ Zvino Mambo Mwari wakati, “Ngokuti kuchemerwa kweSodhoma nokweGomora kukurutu nokushaisha kwavo kwakashata yaamho,

²¹ ndinozodzaka ndione kuti vakaita here kudai ngokuchema ukwo kwakaguma kwendiri; kuti zvisikazi kudaro ndinozozia.”

²² Ndizvo vamuna vakakunukuka kubvapo, vakaenda Sodhoma, asi Abrahama wakaramba akaema pamberi paMambo Mwari.

²³ Zvino Abrahama wakakwedzera pasinde, akati, “Unozovaparadza here vakarurama pamwepo nevakashata?

²⁴ Pamweni varipo vakarurama makumi mashanu mudhorobhamwo; unozovaparadza usikakunguriri ndau iyo here ngendaa yevakarurama vari makumi mashanu varimwo?

²⁵ Ngazviite kuretu kubva kwouri zviro zvakadaro, kuuraya vakarurama pamwepo nevakashata, ngokudaro vakarurama vangazodai ngevakashata! Ngazviite kuretu kubva kwouri! Mutongi wenyika yeshe aazoiti zvakarurama here?”

²⁶ NaMambo Mwari wakati, “Kudai ndikaona muSodhoma vakarurama makumi mashanu mudhorobhamwo, naapo ndinozokungurira ndau yeshe ngendaa yavo.”

²⁷ Abrahama wakapingura, akati, “Ringira zvino, ndakatsunga kuereketa kunaMambo, inini ndiri chiinyi asi bukuta nemarota.

²⁸ Pamweni vanozotamika vashanu kuita makumi mashanu evakarurama, unozoparadza dhorobha reshe here ngokutamika kwevashanu?” Naye wakati, “Kudai ndechizoonamwo makumi marongomuna navashanu, andizoriparadzi.”

²⁹ Wakaereketazve kwaari, akati, “Pamweni vanozoonekamwo makumi marongomuna.” Naye wakati, “Andizoriparadzi ngendaa yevari makumi marongomuna.”

³⁰ Wakati, “A Mambo asatseneka, neni ndinozoereketa. Pamweni panozoonekamwo makumi matatu.” Naye wakati, “Andizochiiti kudai ndikaonamwo makumi matatu.”

³¹ Naye wakati, “Ringira, ndatsunga kuereketa kunaMambo. Pamweni vanozoonekamwo makumi mairi.” Naye wakati, “Andizoriparadzi ngendaa yevari makumi mairi.”

³² Naapo wakati, “A Mambo asatseneka, neni ndinozoereketa kamwe kano kega. Pamweni vanozoonekamwo gumi.” Naye wakati, “Andizoriparadzi ngendaa yevari gumi.”

³³ Mambo Mwari wakaenda, apo aiya arekera kuereketa naAbrahama, naAbrahama wakapetuka kundau yake.