Gen. 17 - Bhaibheri Rakachena muChindau

Kuchekwa Chioniso cheChitenderano

¹ Naapo Abrama aane makore makumi mapfumbamwe nemapfumbamwe (99), Mambo Mwari wakaoneka kunaAbrama, wakati kwaari, “Inini ndini Mwari Unesimbareshe; hamba pamberi pangu, uite wakaperera.

² Neni ndinozoita chitenderano changu pakati pangu newe, ndinozokuwanza kakurutu.”

³ Abrama wakawa pashi ngehope yake; naMwari wakati kwaari,

⁴ “Wona, chitenderano changu chinewe, newe unozoita baba wemadzinza akawanda.

⁵ Zina rako arichazodaidzwi kuti Abrama, asi zina rako rinozozwi Abrahama; ngokuti ndakuita baba wemadzinza akawanda.

⁶ Neni ndinozokuita kuti ubare kakurutu; ndinozoita madzinza ndiwe, nemadzimambo anozobuda mwouri.

⁷ Ndinozogwinyisa chitenderano changu pakati pangu newe, nemibarirwana yako inouya sure kwako, nemibarirwana yavo kuti chiite chitenderano chemhera nariini, ndiite Mwari kwouri nokumibarirwana yako inouya sure kwako.

⁸ Ndinozopa kwouri nokumibarirwana yako inouya sure kwako nyika iyo youri mupara kweiri, nyika yeshe yeKhenani, kuita nhaka yenyu metsa nariini; neni ndinozoita Mwari wavo.”

⁹ Mwari wakati kunaAbrahama, “Asi iwewe, unozongwarira chitenderano changu, iwewe nemibarirwana yako inouya sure kwako nokumibarirwana yavo yeshe.

¹⁰ Ichi ndicho chitenderano changu chomunozongwarira, chiri pakati pangu nemwi, nemibarirwana yako inouya sure kwako; mwamuna weshe uri pakati penyu unozochekwa.

¹¹ Munozochekwa panyama, ganda repamberi pomuiri wenyu; chinozoita chioniso chechitenderano pakati pangu nemwi.

¹² Uwo waane mazuva masere pakati penyu unozochekwa; mwamuna weshe pakati pemibarirwana yenyu, kunyazwi wakabarwa mumhatso yako, nokuti wakatengwa ngemare kubva kuvapara, usiri wedzinza rako.

¹³ Weshe wakabarwa mumhatso yako, nowakatengwa ngemare yako, vanosisira kuti vachekwe. Ndizvo chitenderano changu chinozoa munyama yenyu kuita chitenderano chemhera nariini.

¹⁴ Mwamuna weshe usikazi kuchekwa, uwo usikazi kuchekwa nyama yeganda repamberi pomuiri wake unozogurwa kubva kuvanhu vake; iye wagura chitenderano changu.”

¹⁵ NaMwari wakati kunaAbrahama, “Ngendaa yaSarai mukadzi wako, auchazodaidzi zina rake kuti Sarai, asi zina rake rinozozwi Sara.

¹⁶ Neni ndinozomufumisa, ndinozokupa mukororo ndiye; ndinozomufumisa, naye unozoita mai wemadzinza; madzimambo evanhu anozobuda mwaari.”

¹⁷ Naapo Abrahama wakawa pashi ngehope yake naye wakasheka, akati mumwoyo mwake, “Mwana unozobarwa here kumunhu kwaari waane makore zana (100)? Sara uwo une makore makumi mapfumbamwe (90) unozobara mwana here?”

¹⁸ Abrahama wakati kunaMwari, “A kudai Ishumaeri angapona pamberi pako!”

¹⁹ Mwari wakati, “Haiwa, asi Sara mukadzi wako unozokubarira mukororo; newe unozodudza zina rake kuti Isaka. Ndinozogwinyisa chitenderano changu naye kuita chitenderano chemhera nariini kune mibarirwana yake inouya sure kwake.

²⁰ Asi ngendaa yaIshumaeri, ndakuzwa; wona, ndinozomufumisa, ndinozoita kuti abare kakurutu, ndinozomuwanzisa kakurutu; unozoita baba wevazvare gumi navairi, ndinozomuita dzinza guru.

²¹ Asi ndinozogwinyisa chitenderano changu naIsaka, uwo waanozokubarira Sara ngomukuwo uyu wakaemeswa gore rinouya.”

²² Naapo apedza kuereketa naye, Mwari wakakwira kubva pana Abrahama.

²³ Naapo Abrahama wakatora Ishumaeri mukororo wake, nehloko dzeshe dzakabarwa mumhatso yake, naavo veshe vakatengwa ngemare yake, mwamuna weshe waiya pakati pevanhu vemhatso yaAbrahama, wakavacheka nyama yeganda repamberi pomuiri wavo, ngezuva rimwero raakaereketa Mwari kwaari.

²⁴ Abrahama waiya aane makore makumi mapfumbamwe nemapfumbamwe (99) apo paakachekwa nyama yeganda repamberi pomuiri wake.

²⁵ Ishumaeri mukororo wake waiya aane makore gumi namatatu apo pakachekwa nyama yeganda repamberi pomuiri wake.

²⁶ Ngezuva rimwero Abrahama naIshumaeri mukororo wake vakachekwa.

²⁷ Nevamuna veshe vemhatso yake, avo vakabarwa mumhatso, naavo vakatengwa ngemare kubva kuvapara vakachekwa pamwepo naye.