Gen. 16 - Bhaibheri Rakachena muChindau

Haga naIshumaeri

¹ Zvino Sarai mukadzi waAbrama aazi kumubarira vana. Waiya nehloko, musikana waibva Egipite, zina rake ndiHaga;

² naSarai wakati kunaAbrama, “Wona, zvino Mambo Mwari wakandiita kuti ndisabara vana; potera, ndinokupota, kuhloko, musikana wangu; pamweni ndingaita vana ndiye.” NaAbrama wakapurutana izwi raSarai.

³ Ndizvo Abrama agara makore gumi munyika yeKhenani, Sarai mukadzi waAbrama wakatora Haga muEgipite hloko yake, akamupa kunaAbrama mwamuna wake kuita mukadzi.

⁴ Wakapotera munaHaga, naye akaita mimba, naapo aona kuti waane mimba, wakashoora tenzi wake.

⁵ Sarai wakati kunaAbrama, “Kushaishirwa kwangu ngakugare kwouri! Ndakakupa hloko musikana wangu paditi rako, naapo aona kuti waane mimba, wakandishoora mukuona kwake. Mambo Mwari ngaatonge pakati pako neni.”

⁶ Asi Abrama wakati kunaSarai, “Wona, hloko musikana wako uri munyara yako; ita kwaari kudai ngechiri chakanaka mukuona kwako.” Zvino Sarai wakamutambudza, naye wakatiza kubva kwaari.

⁷ Ngirosi yaMambo Mwari yakamuona ari pachinyuka chemvura mushango, pachinyuka chiri munjira inoenda Shuri.

⁸ Nayo yakati, “Haga, hloko musikana waSarai, wabva kuri? Unoenda kuri?” Wakati, “Ndinotiza kubva kuhope yatenzi wangu, Sarai.”

⁹ Ngirosi yaMambo Mwari yakati kwaari, “Hwirira kunatenzi wako, udzipfaise pashi penyara dzake.”

¹⁰ Ngirosi yaMambo Mwari yakatizve kwaari, “Ndinozowanza kakurutu mibarirwana yako, kuti isakona kuerengwa ngokuwanda.”

¹¹ Nengirosi yaMambo Mwari yakati kwaari, “Wona, waane mimba, unozobara mukororo; unozodudza zina rake kuti Ishumaeri, ngokuti Mambo Mwari wakazwa kutambudzika kwako.

¹² Unozodai ngembongoro yomushango; nyara yake inozorwisana nomunhu weshe, nenyara yomunhu weshe inozorwisana naye; naye unozogara echirwisana nehama dzake dzeshe.”

¹³ Ndizvo wakadudza zina raMambo Mwari uwo wakaereketa kwaari kuti, “Iwewe ndiwe Mwari unondiona,” ngokuti wakati, “Ngegwinyiso ndaona Mwari neni ndikasara ndechipona ndamuona here?”

¹⁴ Ndizvo chinyuka chakadudzwa kuti, “Bheeri-rahai-roi;” chiri pakati peKadheshi neBheredhi.

¹⁵ Haga wakabarira Abrama mukororo; naAbrama wakadudza zina romukororo wake, waakabarirwa ndiHaga, kuti Ishumaeri.

¹⁶ Abrama waiya aane makore makumi masere namatanhatu (86) apo Haga paakabarira Abrama Ishumaeri.