Gen. 15 - Bhaibheri Rakachena muChindau

Chitenderano chaMwari naAbrama

¹ Ngesure kweizvi zviro izwi raMambo Mwari rakauya kunaAbrama muchioniso rechiti, “Usatya, Abrama, inini ndiri chihlangu chako; nomuthuso wako unozoita mukuru yaamho.”

² Asi Abrama wakati, “A Mambo Mwari, unozondipenyi, kwechioneka kuti andina mwana, nouwo unogara nhaka yemhatso yangu ndiErieza weDhamasekusi?”

³ NaAbrama wakati, “Wona, auzi kundipa mubarirwana, ndizvo hloko yakabarwa mumhatso yangu ndiyo inozogara nhaka yangu.”

⁴ Asi izwi raMambo Mwari rakauya kwaari rechiti, “Uyu munhu aazogari nhaka yako; asi uwo unozobva mumuiri wako ndiye unozogara nhaka yako.”

⁵ Wakamubudisa kubanze, akati, “Ringira mudenga, uerenge nyeredzi, kudai wechikona kudzierenga.” Zvino wakati kwaari, “Ndizvo zvichaita mibarirwana yako.”

⁶ Naye wakagonda Mambo Mwari, nakwo kwakaerengerwa kwaari kuti kururama.

⁷ Zvino wakati kwaari, “Ndini Mambo Mwari uwo wakakubudisa kubva kuUri revaKharadhea, kuti ndikupe iyi nyika kuita nhaka yako.”

⁸ Asi wakati, “A Mambo Mwari, ndinozoita maziirenyi kuti ndinozoigara nhaka?”

⁹ Wakati kwaari, “Ndiunzire tsiru rine makore matatu, thokazi rembudzi rine makore matatu, gondohwe rine makore matatu, gora nenjia itsva.”

¹⁰ Wakamuunzira izvi zveshe, akazviadza ngepakati, wakaisa rupande rumwe panorumweni; asi aazi kuadza shiri.

¹¹ Naapo makodzi akamata padera pemiiri yakaurawa, Abrama wakaadzinga.

¹² Naapo zuva roobira, hope huru dzakabata Abrama; wona, chidima chikurutu chinotyisa chakawira padera pake.

¹³ Zvino Mambo Mwari wakati kunaAbrama, “Zia ngegwinyiso kuti mibarirwana yako inozoita vapfumba munyika isiri yavo, vanozoitamwo hloko; vanozotambudzwa makore mazana marongomuna (400).

¹⁴ Asi ndinozoritonga iro dzinza revanozoshandira; ngesure vanozobudamwo vane pfuma yakawanda.

¹⁵ Asi iwewe pachako unozoenda kune madzibaba ako mukunyarara; unozotsirwa waa musharuka yaamho.

¹⁶ Ngomubarirwana wechirongomuna vanozopetuka panozve, ngokuti kushata kwavaAmori akusati kwaperera.”

¹⁷ Naapo zuva rapota, kwasvipa, wona, hari inopwititika chiushi nesasi rinobaka zvakapinda pakati pezvigurwa.

¹⁸ Ngeiro zuva Mambo Mwari wakaita chitenderano naAbrama echiti, “Ndapa iyi nyika kune mibarirwana yako, kubvira kurwizi rweEgipite, kuguma kurwizi rukuru, rwizi Yufratesi,

¹⁹ nyika yevaKheni, vaKhenizi, vaKadhimoni,

²⁰ vaHiti, vaPherizi, vaRefaimu,

²¹ vaAmori, vaKhenani, vaGirigashi nevaJebhusi.”