Gen. 13 - Bhaibheri Rakachena muChindau

Abrama naRoti Vanoparadzana

¹ Ndizvo Abrama wakakwira kubva muEgipite, iye nomukadzi wake, nazvo zveshe zvaaiya nazvo, naRoti naye, vakaenda muNegebhi.

² Zvino Abrama waiya gurudza kakurutu muzvifuyo, sirivha nomukore.

³ Naye wakahamba murwendo rwake kubva Negebhi metsa kuguma Bhetheri, kundau iyo yaiya netende rake pakutanga, pakati peBhetheri neAi,

⁴ pandau apo paaiya akaita arita pakutanga; naapo Abrama wakakumbira ngezina raMambo Mwari.

⁵ Zvino Roti uwo wakahamba naAbrama, waiyawo nen'ombe, makwai nematende.

⁶ Ndizvo nyika aizi kuvakwana, kuti vagare pamwepo, ngokuti pfuma yavo yaiya yakawanda, ndizvo vaiya vasikakoni kuchagara pamwepo.

⁷ Pakamuka hasha pakati pevaushi vezvifuyo zvaAbrama nevaushi vezvifuyo zvaRoti. Panguva iyo vaKhenani nevaPherizi vaigara munyikamwo.

⁸ Zvino Abrama wakati kunaRoti, “Ndinokupota, kusaapo hasha pakati pangu newe, nepakati pevaushi vangu nevaushi vako; ngokuti tiri hama.

⁹ Nyika yeshe airipopi here pamberi pako? Paradzana neni. Kudai iwewe wechienda kumuoshwe, inini ndinozoenda kumudyo; nokuti kudai wechienda kumudyo, inini ndinozoenda kumuoshwe.”

¹⁰ Roti wakamirudza madziso ake, akaona bani reshe reJorodhani, kuti raiya nemvura yakawanda kundau dzeshe, kudai ngomunda waMambo Mwari, wakadai ngenyika yeEgipite munjira inoenda Zoa; izvi zvakaitika ngepamberi Mambo Mwari asati aparadza Sodhoma neGomora.

¹¹ Ndizvo Roti wakadzitsanangurira pachake bani reshe reJorodhani; naRoti wakahamba kuenda kumabvazuva; vakaparadzana umwe kubva kunoumweni.

¹² Abrama wakagara munyika yeKhenani, naRoti wakagara mumadhorobha omubani, echindothuthisa tende rake metsa kuguma Sodhoma.

¹³ Zvino vanhu veSodhoma vaiya vakashata, vashaishi vakurutu pamberi paMambo Mwari.

Abrama Unoenda Hebroni

¹⁴ Mambo Mwari wakati kunaAbrama, ngesure apo Roti aparadzana naye, “Zvino mirudza madziso ako uringire kubvira pandau youri, dera kubani, kumabvazuva nokumabirirazuva.

¹⁵ Ngokuti nyika yeshe younoona, ndinozoipa kwouri nokune mibarirwana yako mhera nariini.

¹⁶ Ndinozoita kuti mibarirwana yako idai ngebukuta renyika, kuti kudai aripo munhu angaerenga bukuta renyika, ngokudaro mibarirwana yako ingaerengwa.

¹⁷ Miruka, uhambe padera penyika mukureba kwayo nokupamhama kwayo; ngokuti ndinozoipa kwouri.”

¹⁸ Ndizvo Abrama wakathuthisa tende rake, akauya, akagara mumiokhi yeMamure, iri muHebroni, wakaakirapo Mambo Mwari arita.