Gen. 1 - Bhaibheri Rakachena muChindau

Kusikwa kweZviro Zveshe

¹ Pakutanga Mwari wakasika denga nenyika.

² Nyika yaiya isina muemo, isina chiro, nechidima chaiya padera pemvura yakadzama; noMweya waMwari wakavhamira padera pemvura.

³ Mwari wakati, “Ngakuapo kujeka,” nokujeka kwakaapo.

⁴ NaMwari wakaona kuti kujeka kwaiya kwakanaka; naMwari wakaparadzanisa kujeka kubva muchidima.

⁵ Mwari wakadudza kujeka kuti, “Masikati,” naye wakadudza chidima kuti, “Usiku.” Kwakaapo madeekoni nemangwanani, zuva rokutanga.

⁶ Mwari wakati, “Ngakuapo mukana pakati pemvura, ngauparadzanise mvura nemvura.”

⁷ NaMwari wakaita mukana, akaparadzanisa mvura yaiya pashi pomukana kubva kune mvura iyo yaiya padera pomukana. Zvakaitika kudaro.

⁸ NaMwari wakadudza mukana kuti, “Denga.” Kwakaapo madeekoni nemangwanani, zuva rechipiri.

⁹ Mwari wakati, “Mvura iri pashi pedenga ngaiunganidzwe pandau imwe, mavhu akaoma ngaaoneke.” Zvakaitika kudaro.

¹⁰ Mwari wakadudza mavhu akaoma kuti, “Nyika,” nemvura yakaunganidzwa pamwepo wakaidudza kuti, “Ruandhle,” naMwari wakaona kuti zvaiya zvakanaka.

¹¹ Mwari wakati, “Nyika ngaimere mwenje nemiriwo inobereka mbeu, miti inobereka michero, kudai ngokuteererana kwembeu dzayo, idzo tsangu dzayo dziri mukati mwayo, padera penyika.” Zvakaitika kudaro.

¹² Nyika yakamera zvisimwa, zvinobereka mbeu ngokuteererana kwembeu dzayo idzo, nemiti inobereka michero, tsangu dzayo dziri mukati mwayo, umwe ngaumwe kudai ngokuteererana kwembeu dzayo, naMwari wakaona kuti zvaiya zvakanaka.

¹³ Kwakaapo madeekoni nemangwanani, zuva rechitatu.

¹⁴ Mwari wakati, “Ngakuapo zvinojeka mumukana wedenga, kuti zviparadzanise masikati nousiku; ngazviite zvioniso zvenguva, zvemazuva nezvemakore.

¹⁵ Zve, ngazviite zvinojekisa mumukana wedenga kuti zvijekise padera penyika.” Zvakaitika kudaro.

¹⁶ NaMwari wakaita zvinojeka zviiri zvakakura; chokujeka chikuru chinotonga masikati, nechokujeka chidoko chinotonga usiku, wakaitazve nyeredzi.

¹⁷ Mwari wakazviisa mumukana wedenga, kuti zvijekise padera penyika,

¹⁸ kuti zvitonge padera pemasikati nousiku, kuti zviparadzanise kujeka kubva kune chidima. NaMwari wakaona kuti zvaiya zvakanaka.

¹⁹ Kwakaapo madeekoni nemangwanani, zuva rechirongomuna.

²⁰ Mwari wakati, “Mvura ngaibudise ngokuwanzisa zvisikwa zvinopona, neshiri ngadzimbururuke padera penyika mumukana womudenga.”

²¹ Ndizvo Mwari wakasika zvikara zvikurutu zvomuruandhle, nezvisikwa zveshe zvinopona zvinohamba, izvo zvakabudiswa ngemvura ngokuwanzwa, kudai ngokuteererana kwembeu dzazvo, nembeu dzeshe dzeshiri kudai ngokuteererana kwembeu dzadzo. NaMwari wakaona kuti zvaiya zvakanaka.

²² NaMwari wakazvifumisa echiti, “Baranai muwande, muzadze mvura yomuruandhle, neshiri ngadziwande munyika.”

²³ Kwakaapo madeekoni nemangwanani, zuva rechishanu.

²⁴ NaMwari wakati, “Nyika ngaibudise zvisikwa zvinopona kudai ngokuteererana kwembeu dzazvo; zvifuyo zvipuka zvidoko nezvinogwezva nezvikara zvenyika kudai ngokuteererana kwembeu dzazvo.” Zvakaitika kudaro.

²⁵ NaMwari wakaita zvikara zvenyika kudai ngokuteererana kwembeu dzazvo, nezvifuyo kudai ngokuteererana kwembeu dzazvo, nazvo zveshe zvipuka zvidoko nezvinogwezva pashi kudai ngokuteererana kwembeu dzazvo. NaMwari wakaona kuti zvaiya zvakanaka.

²⁶ Mwari wakati, “Ngatiite vanhu ngomuedzaniso wedu, vatodzane nesu; ngavatonge padera pehove dzomuruandhle, padera peshiri dzomumweya, padera pezvifuyo, padera pemhuka dzeshe dzomushango nepadera pezviro zveshe zvipuka zvidoko nezvinogwezva munyika.”

²⁷ Ndizvo Mwari wakasika vanhu ngomuedzaniso wake wemene, ngomuedzaniso waMwari wakavasika; wakasika mwamuna nomukadzi.

²⁸ Mwari wakavafumisa; naMwari wakati kwavari, “Baranai muwande, muzadze nyika, muinyise; mutonge padera pehove dzomuruandhle, padera peshiri dzomumweya nepadera pezviro zveshe zvipuka zvidoko nezvinopona zvinogwezva padera penyika.”

²⁹ Mwari wakati, “Ringirai ndamupa zvisimwa zveshe zvinobereka tsangu, zviri padera pehope yeshe yenyika, nemiti yeshe, iyo mukati mwayo mune michero ine mbeu inobereka miti; kwomuri inozoita chokudya.

³⁰ Ndapa miriwo yeshe yakasvipirika kuita zvokudya kune zvikara zveshe zvenyika nokushiri dzeshe dzomumweya nokuzviro zveshe zvinogwezva padera penyika, izvo zveshe zvipuka zvidoko nezvinopona.” Zvakaitika kudaro.

³¹ NaMwari wakaona zveshe zvaaiya aita, kuti zvaiya zvakanasa kunaka. Kwakaapo madeekoni nemangwanani, zuva rechitanhatu.